Dźmitryj Varaniuk niadoŭha pabyŭ pieršym sakratarom BRSM — usio sapsavaŭ 2020 hod. Jon adyšoŭ u cień, ale ciapier vybraŭsia sa ssyłki na telebačańnie.
Dźmitryj Varaniuk staŭ na čale BRSM naprykancy 2018 hoda. Zdavałasia, što karjera ambicyjnaha 31-hadovaha chłopca z Uźbiekistana (naradziŭsia Dźmitryj u Taškiencie) idzie ŭhoru. U 2019 hodzie jaho pryznačyli ŭ Saviet Respubliki — Dźmitryja navat nazyvali samym maładym sienataram siomaha sklikańnia.
Ale praca BRSM i asabista Dźmitryja ŭ 2020 hodzie łukašenkaŭcam nie spadabałasia. Niepublična jaho šmat krytykavali za toje, što BRSM nie zmoh nakiravać moładź u patrebnaje ideałahičnaje rečyšča. Vyśvietliłasia, što samaja masavaja (na papiery) moładzievaja arhanizacyja krainy ničoha nie moža zrabić sa studenckimi pratestami.
Demanstratyŭna i sa skandałam zvalniać Dźmitryja Varaniuka nie stali. Ale na bližejšym źjeździe BRSM u žniŭni 2021 hoda abrali novaha pieršaha sakratara — Alaksandra Łukjanava. Taho samaha, jaki ciapier trapiŭ pad sankcyi Jeŭrasajuza za sadziejničańnie ŭ vyvazie ŭkrainskich dziaciej z akupavanych terytoryj.
Dla Varaniuka novaja epocha składvałasia nie vielmi paśpiachova. Jon vidavočna pajšoŭ na panižeńnie — staŭ kiraŭnikom pres-centra ŭ Domie presy. Pasada Dźmitryja hučała bolš-mienš pryhoža — namieśnik dyrektara Doma presy, — ale ž značnuju častku jaho pracoŭnaha času zajmała arhanizacyja nikomu nie cikavych pres-kanfierencyj, na jakija treba było jašče niejak sahnać dziaržaŭnych žurnalistaŭ.
Tydzień tamu Dźmitryj radasna paviedamiŭ u instahramie, što heta byŭ jaho apošni pracoŭny dzień u Domie presy. Jon padziakavaŭ kalektyvu za cudoŭnyja try hady, a ŭ adkaz atrymaŭ hramatu za «biezdakornuju šmathadovuju pracu, vysoki prafiesijanalizm i vialiki asabisty ŭkład u raźvićcio pres-centra».
Darečy, dušeŭnyja raźvitalnyja pasty — svojeasablivaja fiška Varaniuka. Naprykład, padvodziačy vyniki svaich čatyroch hadoŭ sienatarstva, Dźmitryj napisaŭ, što znajšoŭ, z kim hulać u futboł.
Pa infarmacyi «Našaj Nivy», Dźmitryj budzie pracavać namieśnikam dyrektara na telekanale «Biełaruś 24» u struktury Biełteleradyjokampanii.
ES uvioŭ sankcyi suprać BRSM, a taksama rasijskich śpievakoŭ Šamana i Paliny Haharynaj
Pamiatajecie kamunista Ciuchaja, adyjoznaha funkcyjaniera BRSM? Jaho sudziać za zdradu dziaržavie — da 25 hadoŭ źniavoleńnia
Jak spadčynny pažarnik staŭ hałoŭnym kamsamolcam krainy. Historyja žyćcia kiraŭnika BRSM Alaksandra Łukjanava
Kamientary