Jak ciapier žyvie padletak Roma Kahadoŭski, jaki 3 hady tamu ledź nie zahinuŭ, ratujučy brata z pažaru?
Try hady tamu 12-hadovy Roma Kahadoŭski vyratavaŭ dvuchhadovaha brata z pałajučaha doma. Sam jon mocna abhareŭ i pieranios dziasiatki apieracyj. Što ciapier z chłopcam?
![](http://nnexpictures.fra1.digitaloceanspaces.com/img/w732d4webp1/photos/z_2024_07/3-lbivd.jpg.webp)
U krasaviku 2021 hoda ŭ siamji Kahadoŭskich, jakija žyli ŭ vioscy Sidarovičy Miadzielskaha rajona, zdaryłasia trahiedyja: ich chata zaharełasia. Doma ŭ toj momant byli tolki dva chłopčyki: 12-hadovy Roma i jaho maleńki brat.
Da prybyćcia ratavalnikaŭ Roma paśpieŭ vynieści z ahniu brata na rukach. Bryhada chutkaj dapamohi dastaviła Romu z apiokami roznaj stupieni ciažkaści (było paškodžana 50% cieła) i parezami ruk i tvaru ŭ balnicu. Niekalki miesiacaŭ stan chłopčyka zastavaŭsia vielmi ciažkim, jon pieranios bolš za 20 apieracyj, ale daktary zmahli vyratavać padletka. Vosieńniu taho ž hoda chłopčyka ŭznaharodzili ordenam «Za asabistuju mužnaść».
Pra ciapierašniaje žyćcio Romy raspaviali na STB. Na jaho rachunku ŭžo bolš za 30 apieracyj, da hetaha času padletak znachodzicca pad kantrolem lekaraŭ. Roma vučycca ŭ licei MUS.
![](http://nnexpictures.fra1.digitaloceanspaces.com/img/w732d4webp1/photos/z_2024_07/4-vte4k.jpg.webp)
— Dzień, kali ŭsio adbyłosia, ja nie vielmi pamiataju, — pryznaŭsia padletak. — Tak, kropka-prabieł-kropka-prabieł. Pamiataju niekalki siekund. Jak nios jaho (brata. — «NN»), jak lažaŭ, jak zabrała chutkaja — usio.
Pra małodšaha brata, jakoha Roma vyratavaŭ, kursant raspaviadaje ścipła. Kaža, što tamu ŭžo čatyry hady, jon chodzić u dziciačy sadok i lubić hulać z bratam. Ale Roma ŭpeŭnieny, što, kali chłopčyk padraście, nie treba jamu raspaviadać praŭdu pra pažar i toje, jakuju canu zapłaciŭ starejšy brat za jaho vyratavańnie.
— Značyć, tak pavinna było zdarycca, — z sumam u vačach dadaŭ Roma. Zhadvajučy, jak ciažka było pieršy hod paśla trahiedyi mamie, jon nie moža strymać ślozy. Chłopiec raspavioŭ, što za čas biaskoncych apieracyj daktary stali jamu ŭžo amal rodnymi ludźmi.
Padletak skončyŭ 9 kłas, zdaŭ ekzamieny. Kaža, što z pradmietaŭ jamu bolš za ŭsio padabajecca historyja, a voś chimija dajecca ciažej za inšyja pradmiety.
![](http://nnexpictures.fra1.digitaloceanspaces.com/img/w732d4webp1/photos/z_2024_07/2-bmapb.jpg.webp)
Jon taksama dadaŭ, što ŭ licei MUS kursantaŭ adpuskajuć dadomu na vychodnyja ŭ tym vypadku, kali siaredni bał za tydzień vyšejšy za 7 bałaŭ. Kali mienš — treba zastavacca ŭ navučalnaj ustanovie. Padletak ščyra kaža, što praz hetaje praviła davoli časta byŭ pazbaŭleny mahčymaści pravieści z rodnymi vychodnyja.
Roma raspavioŭ, što chacieŭ vučycca ŭ niejkaj takoj ustanovie, jašče budučy ŭ 4-5 kłasie. Ale prapanova stać kursantam liceja MUS pastupiła paśla trahiedyi.
— Praviali ekskursiju — i ja pastupiŭ. Mama skazała, što ja dobry vybar zrabiŭ, što ja małajčyna. Tut, u pryncypie, vučycca niaciažka, hałoŭnaje — ciarpieńnie, starańnie, praca.
![](http://nnexpictures.fra1.digitaloceanspaces.com/img/w732d4webp1/photos/z_2024_07/-mkhga.jpg.webp)
Jašče krychu pra licejskija budni:
— Vučoba ŭ licei hartuje, dyscyplinuje. Kožny dzień ustajom rana. U nas padjom u 6.50. Apranucca, zasłać łožak, pastroicca na zaradku. Paśla śniadanku — naviadzieńnie paradku ŭ pakoi, padrychtoŭka da navučalnaha pracesu. Paśla abiedu ŭ nas jość asabisty čas: my možam pahulać u futboł, baskietboł. Telefony vydajuć u 19.50, zabirajuć u 20.30. U asnoŭnym ja ŭvieś hety čas razmaŭlaju z mamaj. Sacyjalnyja sietki ja nie viadu, nie lublu publičnaść.
Padletak kaža, što navat nie pahladzieŭ nivodnaha intervju, jakija ź im zapisvali.
Paśla zakančeńnia liceja Roma płanuje pajści ŭ Akademiju MUS, a paśla pracavać u milicyi. Try hady tamu jon kazaŭ u intervju: «Ja chaču być vyratavalnikam. A jašče navukoŭcam, mantažoram, baksioram».
U Miadzielskim rajonie 12-hadovy chłopčyk vynies z pažaru dvuchhadovaha brata. Sam jon mocna abhareŭ i znachodzicca ŭ ciažkim stanie
Jak spravy ŭ 12-hadovaha Romki ź Miadzielskaha rajona, jaki vynies z ahniu maleńkaha brata
12-hadovaha Romu, što vyratavaŭ na pažary brata, uznaharodzili ordenam «Za asabistuju mužnaść»
Kamientary
heta kali chuncie - nie da zakonaŭ,
a astatnim - niepravavy zakon.