U chodzie načnoj ataki na vajenny aeradrom u Krasnadarskim krai paranieny vajskoviec
Rehijon atakavali nie tolki bieśpiłotniki, ale i jak minimum dźvie rakiety.
Adzin vajskoviec paranieny ŭ vyniku napadu ŭ noč na 5 lipienia na vajskovy aeradrom «Prymorska-Achtarsk» (v/č 75387), paviedamili krynicy Astra ŭ ekstranych słužbach Krasnadarskaha kraju. Raniej ab udary pa hetym aeradromie paviedamlali ŭkraincy.
Akramia trapleńnia ŭ aeradrom, u Prymorska-Achtarsku ŭdar pryjšoŭsia pa elektrapadstancyi, u častki abanientaŭ uźnikli pieraboi z elektryčnaściu. Akramia hetaha, jak raniej užo paviedamiŭ hubiernatar, trapleńnie zafiksavana ŭ žyły dom. Šeść čałaviek paranieny, zahinuła dzicia.
Rehijon atakavali nie tolki bieśpiłotniki, ale i jak minimum dźvie rakiety. U Minabarony RF ža aficyjna paviedamili, što źbityja 14 bieśpiłotnikaŭ, pramaŭčaŭšy pra rakiety i pra trapleńni pa vajennym aeradromie i ŭ elektrapadstancyju.
Pavodle adkrytych danych, «Prymorska-Achtarsk» — aeradrom sumiesnaha bazavańnia ŭ Krasnadarskim krai, raźmieščany na paŭnočna-ŭschodniaj uskrainie horada Prymorska-Achtarska.
Na aeradromie dysłakavany 960-y hvardziejski šturmavy avijacyjny połk v/č 75387, jaki ŭvachodzić u skład 1-j hvardziejskaj źmiašanaj avijadyvizii 4-j hvardziejskaj armii VPS i SPA. Na ŭzbrajeńni pałka znachodziacca šturmaviki Su-25, Su-25UB i Su-25SM3.
Kamientary