Šmatdzietnamu baćku ź Biełarusi nie padoŭžyli dazvoł na žycharstva ŭ Litvie — jon pracavaŭ u MNS 12 hadoŭ tamu
Viktar Jevilin — aktyvist z Marjinaj Horki, aktyŭny ŭdzielnik vybarčaj kampanii 2020 hoda. U jaho čaćviora dziaciej, žonka maje litoŭskija karani, piša Radyjo Svaboda.
U kancy červienia aktyvist z Marjinaj Horki Viktar Jevilin (takoje napisańnie proźvišča ŭ dakumentach u hieroja publikacyi. — Red.) daviedaŭsia ad Departamentu mihracyi Litvy, što niasie pahrozu nacyjanalnaj biaśpiecy. Jamu nie padoŭžyli dazvołu na žycharstva, chacia raniej prablem z hetym nie było. U Litvie Viktar znachodzicca z 2020 hodu.
«U mianie byŭ dazvoł na žycharstva z metaj złučeńnia siamji. U sakaviku ja padaŭsia na padaŭžeńnie (dahetul mnie jaho praciahvali dva razy). Hetym razam vyklikali ŭ mihracyjnuju słužbu na videainterviju, pahavaryli pra žyćcio ad škoły da ciapierašniaha momantu. Pytalisia, jak ja staŭlusia da vajny dy inšaje. Prasili paćvierdžańnie, što ja byŭ naziralnikam na vybarach u 2015 hodzie», — raskazvaje Viktar Jevilin.
Taksama, pa słovach aktyvista, mihracyjnaja słužba zaprasiła skany pracoŭnaj knižki. A 26 červienia pryjšła admova ŭ časovym dazvole na žycharstva, bo biełarusa pryznali «pahrozaj nacyjanalnaj biaśpiecy Litvy» (tekst paviedamleńnia jość u redakcyi. — RS).
«Ja pracavaŭ u MNS, a jano nibyta padkantrolnaje specsłužbam. Praz dva dni jašče prysłali paviedamleńnie, što mnie na 2 hady zabaronieny ŭjezd u Litvu. Ciapier rychtujusia da taho, kab asprečyć takoje rašeńnie», — kaža Viktar.
U žonki Viktara baćka ź Litvy, tamu jana maje pastajanny dazvoł na žycharstva. A dazvoł na žycharstva ŭ Viktara byŭ atrymany dla ŭźjadnańnia siamji. U pary čaćviora dziaciej: dva darosłyja syny i dźvie dački — adna abituryjentka, druhaja školnica. Usie jany žyvuć u Vilni.
Paŭhoda za kratami paśla pracy ŭ MNS
U 2012 hodzie Viktar sapraŭdy pracavaŭ u MNS, zajmaŭsia aceńvańniem pažaraŭ, statystykaj. Tady ž trapiŭ za kraty na paŭhoda. Jak miarkuje surazmoŭca, heta była «pastanoŭka» z boku siłavikoŭ.
«Ja bačyŭ, jak na terytoryi bryhady specnazu trenavałasia siłaviki ŭ nas u Marjinaj Horcy pierad vybarami 2010 hodu. Viedaŭ, što da vybuchu ŭ metro ŭ krasaviku 2011 hodu pažarnyja raźliki byli ŭ dvarach za 20 chvilin. Mnie zdavałasia, heta było splanavana, i ja aktyŭna dzialiŭsia hetymi dumkami. Miarkuju, tady i trapiŭ pad pilnuju ŭvahu i byŭ «na ałoŭku»», — dzielicca dumkami Viktar.
U 2012 hodzie Viktara Jevilina zatrymali supracoŭniki HUBAZiKu praz padazreńnie ŭ davańni chabaru. Surazmoŭca nazyvaje heta pravakacyjaj.
«Tam śpiarša było try kryminalnyja spravy, dźvie ź ich razvalilisia. Da sudu zastałasia adna. Sprava nibyta za chabar. Byŭ pažar, byŭ chłopiec, jaki ŭ hetym vinavaty. Spaliŭ čužuju chatu. Ja musiŭ raspačać kryminalnuju spravu, ale jaje nikoli ratavalniki nie pačynali. Mnie treba było, kab hety chłopiec zamiryŭsia z haspadyniaj domu. U niejki dzień jon mnie pačaŭ prapanoŭvać, kab ja pieradaŭ joj hrošy, bo jon saromiejecca. Ja admaŭlaŭsia, jon zvaniŭ kožny dzień. U adzin ź dzion jon pryjechaŭ z hrašyma: 300 dalaraŭ, my byli ŭ majoj mašynie. I tut ža pryjechali siłaviki i zatrymali mianie», — pryhadvaje Viktar.
U vyniku sud prysudziŭ jamu 5 hadoŭ «chatniaj chimii». Viktar padkreślivaje, što za ŭvieś čas pracy ŭ MNS nia mieŭ kantaktaŭ z KDB.
Paśla MNS Viktar pracavaŭ u roznych pryvatnych kampanijach, na kiraŭničych dy inšych pasadach. Paśla 2014 hodu siamja zadumałasia pra pierajezd. Adnak tady chutka pradać dom nie atrymałasia, sarvałasia i mahčymaść vyjechać.
«Arhanizoŭvali pikiety, źbirali hrošy palitviaźniam»
Pry hetym Viktar byŭ aktyŭny ŭ roznych palityčnych supołkach.
«Ja byvaŭ na varcie ŭ Kurapatach, kali tam adkryli restaran «Pojediem pojedim», byŭ na śviatkavańni stahodździa BNR u Miensku. A ŭ 2020 hodzie my aktyŭna ŭlilisia ŭ chvalu, padtrymlivali Cichanoŭskuju. Ja ŭvachodziŭ u miascovuju hrupu ŭ Puchavickim rajonie, i my kaardynavali sustrečy, vystupy, viali pierapisku ź miascovymi ŭładami. Arhanizoŭvali pikiety, zaprašali aktyvistaŭ ź Miensku. Paśla ŭžo źbirali hrošy na dapamohu palitviaźniam», — pieraličvaje Viktar.
Taksama, pa słovach surazmoŭcy, jon raspaŭsiudžvaŭ ulotki, administravaŭ razam z žonkaj rehijanalny telehram-kanał.
«Ja rabiŭ heta ŭsio akuratna, praca viałasia akuratna, tamu zatrymańnia ŭdałosia paźbiehnuć. U śniežni my atrymali litoŭskija humanitarnyja vizy praź niebiaśpieku znachodžańnia ŭ Biełarusi. I vyjechali. Žonka i dzieci atrymali pastajanny dazvoł na žycharstva, a ja atrymaŭ časovy», — kaža Viktar.
U Biełaruś surazmoŭca pajechać nia moža, bo mohuć aryštavać. Źbirajecca asprečvać rašeńnie, bo «inšych varyjantaŭ niama».
«U Biełaruś 100% niemahčyma. Budu prachodzić usie instancyi abskardžańnia. Ad takoj sytuacyi vyjhraje tolki Łukašenka. U Biełarusi mianie mohuć tolki pasadzić, dy i dom my pradali», — razhublena havoryć surazmoŭca.
U Litvie Viktar da admovy ŭ praciahu dazvołu na žycharstva pracavaŭ elektramantažnikam. Aficyjna pracu ŭ Litvie mieŭ z 2021 hodu.
Svaboda źviarnułasia ŭ mihracyjnuju słužbu Litvy nakont hetaha vypadku, tam adkazali, što nie kamentujuć infarmacyju adnosna jurydyčnaha statusu i asabistych źviestak hramadzian.
Biełaruskija śpiecsłužby kupili na imia Ramana Pratasieviča dva aŭtamabili ŭ Polščy. Našto?6
Kamientary