14 žniŭnia
Z aktyvistam AHP Maratam Afanaśjevym z Žłobina nie pradoŭžyli pracoŭnaha kantraktu: jon 20 hadoŭ adpracavaŭ na Biełaruskim metalurhičnym zavodzie. Zvalnieńnie adbyłosia ŭ dzień naradžeńnia aktyvista. Jon deputat, i zvalnieńnie treba ŭzhadniać z harsavietam, čaho nie rabiłasia.
Pratestanckaja carkva «Novaje žyćcio» padała apelacyju ŭ Haspadarčy sud Miensku, patrabujučy pakinuć joj budynak.
15 žniŭnia
Dyrektar Mahiloŭskaha zavodu štučnaha vałakna admoviŭsia sustrakacca z kiraŭnictvam prafsajuzu REP, kab vyrašyć prablemu prafsajuzu na pradpryjemstvie.
16 žniŭnia
U Horadni redaktara časopisu «Magazyn Polski na uchodzstwie» Andreja Pačobuta vyklikali na dopyt u milicyju. Śledčaha Leninskaha RUUS cikaviła, chto finansuje vydańnie i ci atrymlivaŭ žurnalist hrošy ad polskich kaleh, kab spłacić letašni štraf 2500 dalaraŭ za niesankcyjavany pikiet. 18 žniŭnia aktyvistaŭ Sajuzu palakaŭ A.Pačobuta, Miečysłava Jaskieviča i Ihara Bancara zatrymali, źvinavaciŭšy, što jany zaminali zdymkam dziaržaŭnych žurnalistaŭ. Kab sarvać pasiedžańnie Rady SPB, pryznačanaje na 19 žniŭnia, DAI niekalki razoŭ spyniała mašynu Viktara Maculeviča, jaki jechaŭ z Brasłava. U Mazyry Majnu Šmarhun vyklikali na 19-ha «dla razmovy» ŭ KDB. A ŭ Navahradku Vajciecha Baradzina terminova vyklikali ŭ DAI dla pravierki dakumentaŭ na aŭtamabil.
Administracyja babrujskaha zavodu «Biełšyna» admoviłasia raspaŭsiudžvać dziejańnie kalektyŭnaj damovy na siabroŭ Biełaruskaha niezaležnaha prafsajuzu i nia vypłaciła im 75% prybaŭki da adpačynku na azdaraŭleńnie, parušyŭšy Pracoŭny kodeks.
Padatkovaja inspekcyja Mahilova aštrafavała na 4 bazavyja vieličyni aktyvista PKB prafesara Valera Bierazijenku za toje, što na partyjnaj siadzibie niama knihi zaŭvah i prapanovaŭ. Jašče adnaho aktyvista PKB Valerja Zaŭjałava aštrafavali na 10 b.v. za zbor składak pavodle sastarełych viedamaściaŭ.
Niedziaržaŭnaja hazeta z Baranavičaŭ «Intex-press» vyjhrała sud u dyrektara abutkovaj fabryki, jaki vinavaciŭ vydańnie ŭ źniavazie honaru i hodnaści.
Na akcyi Dzień salidarnaści ŭ Miensku zatrymali Alaksandra Sprahoŭskaha, Vitala Stažarava, Jaŭhiena Navinskaha, apranutych u majki z patretami źnikłych, i jašče 7 čałaviek. U pastarunku milicyjanty śpiarša skłali raparty pra «niesankcyjavany schod», a potym adpuścili maładych ludziej biez pratakołaŭ.
U Homieli na fłeš-mobie «dla vyśviatleńnia asobaŭ» zatrymali kala 10 junakoŭ: ich źniali na videakameru i adpuścili biez pratakołaŭ.
Padčas fłeš-mobu na Dni salidarnaści ŭ Mahilovie zatrymali 10 čałaviek – «dla vyśviatleńnia asobaŭ». Paśla akcyi padčas raspaŭsiudu niezaležnaj presy zatrymali Sieržuka Niahacina.
17 žniŭnia
U Homieli ź inicyjatyvy administracyi čynoŭniki Minjustu zabaranili supołku prafsajuzu REP u aŭtobusnym parku №1.
Viarchoŭny sud nie zadavoliŭ kasacyjnaj skarhi HA «Inavacyjny fond pravavych technalohijaŭ», aficyjna skasavaŭšy arhanizacyju.
18 žniŭnia
Aktyvisty prafsajuzu REP Uładzimier Tuzaŭ i Halina Drazdova vyjhrali sud u Mahiloŭskaha zavodu štučnaha vałakna: z zvolnienymi jašče ŭviesnu aktyvistami nie raźličylisia całkam, a Tuzavu jašče i nie adrazu addali pracoŭnuju knižku.
20 žniŭnia
U Miadzieli aktyvista AHP Andreja Abaleviča vyklikali na dopyt u milicyju: dastaviŭ jaho načalnik rajonnaha kryminalnaha vyšuku. Aktyvista chacieli źvinavacić, što jon zrabiŭ «antydziaržaŭnyja» hrafici «Dastaŭ» i «Nadakučyŭ».
21 žniŭnia
Na volu vyjšli aktyvisty «Partnerstva» Enira Branickaja i Alaksandar Šałajka.
Stała viadoma, što jašče 3 žniŭnia Viarchoŭny sud likvidavaŭ HA «Biełaruskija fabryki dumak». Pasiedžańnie adbyłosia pry adsutnaści adkazčyka.
U Bieraściejskim rajonie kala Stradzičaŭ milicyjanty zatrymali aŭtobus z 26 maładymi sacyjał-demakratami, jakija jechali na letnik va Ŭkrainu. Paśla pieratrusu i asabistaha nadhladu maładych ludziej adpuścili, a aŭtobus zatrymali jak «technična niaspraŭny».
Na biełaruska-polskaj miažy zatrymali aŭtamabil aktyvista BSDP (H) Aleha Voŭčaka: u jaho kanfiskavali knihu pra Jurja Zacharanku i knihi «Vybary prezydenta Respubliki Biełarusi ŭ 2006 hodzie. Fakty. Kamentary».
Kamientary