«Biełaruski Čerčyl» — usio? Ci zastaniecca Sachaščyk u kamandzie Cichanoŭskaj paśla kanfierencyi ŭ Vilni
Padpałkoŭnik Valeryj Sachaščyk, jaki vyjšaŭ na scenu ŭ vostry momant 2022 hoda, užo doŭhi čas nahadvaje pra siabie tolki zredku, zasunuŭšy ŭ šufladku tyja ambicyjnyja prajekty, ź jakimi jon prychodziŭ u palityku. Ci čakaje «ministra abarony» Cichanoŭskaj los Alaksandra Azarava?
![](http://nashaniva.com/img/w840d4webp1/photos/stock/sachascyk-gftk7.jpg.webp)
U pačatku žniŭnia Śviatłana Cichanoŭskaja sklikaje ŭ Vilni svaju štohadovuju kanfierencyju, na jakoj palityki i dziejačy mihracyi pad kamiery zadumajucca nad situacyjaj i publična abaznačać, jak i što jany majuć rabić dalej.
Kanfierencyja źbirajecca ŭ ciomny dla demakratyi čas: Zachad addaŭ Biełaruś Maskvie i navat hatovy zamarozić ukrainski kanflikt, pakinuŭšy akupavanyja terytoryi Rasii.
I Kabiniet pradstaŭnikoŭ Cichanoŭskaj taksama padychodzić da druhoj svajoj hadaviny ŭ niapoŭnym składzie: paśla raskołu Bajpoła straciŭ pasadu «ministr unutranych spraŭ» Alaksandr Azaraŭ, ź ćmianymi farmuloŭkami padaŭ u adstaŭku «ministr zamiežnych spraŭ» Valer Kavaleŭski.
Doŭhi čas pad pytańniem byŭ i ŭdzieł «ministra abarony» Valeryja Sachaščyka. Jaho proźvišča źjaviłasia ŭ prahramie kanfierencyi ŭ samy apošni momant.
Pres-sakratarka Sachaščyka Lizavieta Kochman na pramoje ździŭleńnie «Našaj Nivy» adkazvała, što «nie moža skazać ni tak, ni nie» pra płany svajho načalnika ab udziele.
Ź niejkaha boku, adsutnaść Sachaščyka vyhladała b łahičnaj: lidarka demakratyčnaha ruchu i jaje daradcy nikoli nie hladzieli na pytańnie viartańnia ŭ krainu z pazicyi pałkavodcaŭ.
Tamu Sachaščyku naŭrad ci lohka pracujecca i, pry takim padychodzie, jaho rola ŭ kabiniecie nie zusim jasnaja: heta hienierał armii, jakuju nie źbirajucca sklikać, prynamsi ŭ hety histaryčny momant.
A kali taki momant nastanie i ci nastanie ŭvohule, nie zusim jasna.
Metu ž sabrać vakoł Kabinieta biełarusaŭ, jakija ŭmiejuć vajavać, Sachaščyk taksama nie vyciahnuŭ.
Paŭtara hoda tamu, u svajoj pieršaj spravazdačy paśla pryznačeńnia ŭ Kabiniet, Sachaščyk padkreślivaŭ, što jamu ŭdałosia naładzić kantakt z USU, vynikam jakoha miełasia stać stvareńnie dobra ekipiravanaha biełaruskaha padraździaleńnia ź ciažkim uzbrajeńniem; a taksama ličyŭ pośpiecham stvareńnie «Paspalitaha rušeńnia» — paramilitarnych abjadnańniaŭ emihracyi.
Raźvićcia nie vyjšła.
Choć Sachaščyk i mieŭ kantakt z byłym kamandziram USU hienierałam Załužnym, ukrainskaje padraździaleńnie Sachaščyka ŭ zadumanym vyhladzie nie stvaryłasia; pieratoku tudy łukašenkaŭskich aficeraŭ u adčuvalnaj kolkaści taksama nie adbyłosia.
Z paramilitarnymi kłubami zamiežža Sachaščyk taksama pa niejkich pryčynach rassvaryŭsia, straciŭšy ŭpłyŭ.
Viarnuć kantrol jon pasprabavaŭ tonkim trukam, rukami polskich i litoŭskich śpiecsłužbaŭ: Sachaščyk abvinavaciŭ kłuby ŭ faktyčna terarystyčnych zadumach — u padrychtoŭcy ŭdaru bajavym bieśpiłotnikam pa biełaruskich abjektach.
A kab takoha nie zdaryłasia, prasiŭ pravieści ź imi prafiłaktyčnuju rabotu z udziełam kamandy svajho «Departamienta nacyjanalnaj biaśpieki». Taki vybar mietadaŭ pastaviŭ kropku ŭ adnosinach z «Paspalitym rušeńniem» i naradziŭ pytańni, ci zdaje sabie spravazdaču Sachaščyk u tym, na čyj młyn lije vadu.
Možna było b taksama parazvažać, ci abiacaje niešta Sachaščyku i struktury, u jakoj jon zajmaje pazicyju, źmiena ŭłady ŭ Pałku Kalinoŭskaha. Viadoma, što z papiaredniaj viarchuškaj padraździaleńnia — «Vanišam», «Kitom» i Vadzimam Kabančukom — u Sachaščyka adnosiny zusim nie skłalisia.
Ale, jak kažuć «Našaj Nivie» blizkija i dalokija ad kamandavańnia bajcy pałka Kalinoŭskaha, i ŭ ciapierašniaj situacyi Sachaščyka tam nie čakajuć.
Navat u ramkach uzajemadziejańnia blizkich pa duchu struktur jość niuansy: pradstaŭnik «Biełpoła» Uładzimir Žyhar kazaŭ u intervju «Našaj Nivie», što dziejnaść Sachaščyka i sam hety čałaviek im «niecikavy».
Kalehi pa demakratyčnym ruchu nie daviarajuć toj kamandzie, jakoj atačyŭ siabie Sachaščyk. Zachodnija dypłamaty skardzilisia surazmoŭcam ź Biełarusi, što Sachaščyk prynosić im na sustrečy razdrukavanuju kanśpirałohiju z telehram-kanałaŭ i vydaje heta za čystuju manietu.
Dobra, što proźvišča Sachaščyka ŭsio ž źjaviłasia ŭ prahramie kanfierencyi. Heta, prynamsi, čałaviek, jaki nie ŭciakaje ad adkazaŭ na pytańni, jaki moža adkryta raskazać pra los tych prajektaŭ, u jakija jon pavieryŭ sam, i ŭ jakija pavieryli mnohija inšyja.
«Chiba što jaho padmanuli. Pytańnie tolki ŭ tym, chto i našto». I apazicyja, i jeŭrapiejcy ździŭlenyja listom Sachaščyka
«Paspalitaje rušeńnie» adkazała Sachaščyku: U nas niama mety siłavoha zachopu ŭłady ŭ Biełarusi, my jaho nikoli nie płanavali
Adkul Sachaščyk čerpaje insajdy pra jadziernuju vajnu? Jany supadajuć z dopisami kanśpirałahičnaha telehram-kanała
Ułady Rasii i Biełarusi rychtujuć vykarystańnie jadziernaj zbroi i «blickryh na Vilniu» — Sachaščyk
Sachaščyk — pra Załužnaha, Chrenina, Prakopjeva i pra toje, jak ledź nie zahinuŭ pad «Iskanderam». Novy «Tok»
Kamientary
Niama čaho biełarusaŭ źlivać.