Niekalki niamieckich ŚMI napisali, što Hiermanija ŭ metach ekanomii zamarožvaje dadatkovyja vypłaty Ukrainie na 2025 hod. Ci značyć heta, što dapamoha prypynicca? U MZS Ukrainy i ministerstvie finansaŭ Hiermanii adkazali na hetyja zajavy.
Vydańni BILD i Frankfurter Allgemeine Zeitung napisali pra zamarozku dadatkovych vypłat Ukrainie. Skaazana, što biahučyja kantrakty FRH vykanaje, ale novych zapytaŭ ad Minabarony Ukrainy prymać nie budzie. U 2024 hodzie Bierlin pavinien vyłučyć na padtrymku Ukrainy vosiem miljardaŭ jeŭra, na 2025 hod zapłanavana čatyry miljardy jeŭra — zvyš hetaha, jak śćviardžali vydańni, dapamohi nie budzie, bo heta nie zakładziena ŭ niamieckim biudžetnym płanavańni.
Śpikier Ministerstva zamiežnych spraŭ Ukrainy Hieorhij Cichi ŭ kamientary Ukrinfarmu abvierh heta.
«Paviedamleńni ab tym, što Hiermanija nibyta spyniaje vajennuju dapamohu Ukrainie, niekarektnyja. Heta takaja ž manipulacyja, jak i papiarednija paviedamleńni ab skaračeńni dapamoh na nastupny hod udvaja».
Pa słovach śpikiera, biudžet FRH budzie zaćvierdžany ŭ listapadzie hetaha hoda — tolki tady stanie viadoma, nakolki Bierlin budzie dapamahać Ukrainie z vajennymi patrebami.
Vydańnie «Suśpilnie» źviarnułasia pa kamientar u ministerstva finansaŭ Hiermanii. Tam adznačyli, što dvuchbakovaja dapamoha z boku Niamieččyny ŭ budučyni budzie častkova pieraniesienaja na mižnarodnyja prahramy. Havorka idzie, u pryvatnaści, ab rašeńni krain G7 vyłučyć Ukrainie kredyty na 50 miljardaŭ dalaraŭ za košt zamarožanych rasijskich aktyvaŭ.
Adnak u kamientary napisali, što fiederalny ŭrad padtrymlivaje Ukrainu ŭ finansavańni i asnaščeńni vajskovaj technikaj u takoj stupieni, jakoj nie robić hetaha ni adzin inšy jeŭrapiejski partnior. Hetaj mety słužyć artykuł «madernizacyja» ŭ fiederalnym biudžecie na 2024 hod, a taksama metavyja asihnavańni na nastupnyja hady.
«Fiederalnaje ministerstva finansaŭ hatova razhledzieć mahčymaść karotkaterminovaha pradastaŭleńnia dadatkovych srodkaŭ da taho času. Dla hetaha, adnak, dadatkovyja patreby pavinny być dakładna vyznačanyja i zrazumiełyja, kab adpaviadać usim biudžetnym praviłam i na hetaj asnovie možna było źviarnucca ŭ bundestah z prośbaj ab vydačy dazvołu», — adznačyli ŭ Minfinie FRH.
U pres-słužbie niamieckaha viedamstva dadali, što jašče nie atrymali nivodnaha kankretnaha paviedamleńnia ab patrabavańniach. «Tamu ni razhlad, ni rašeńnie nie mohuć być pryniatyja», — reziumavali tam.
U lipieni 2023 hoda kancler Niamieččyny Ołaf Šolc anansavaŭ pieradaču zbroi Ukrainie na sumu 19 miljardaŭ dalaraŭ, jakaja raźličana da 2027 hoda, nahadvaje «Suśpilnie».
A ŭ žniŭni 2024-ha hienierał-major bundeśviera Kryścijan Frojdynh zajaviŭ, što ŭ hetym hodzie abjom vajennaj dapamohi Hiermanii Ukrainie budzie dasiahać ad 6,5 da 7 miljardaŭ jeŭra.
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?5
Kamientary
Dla ... u mienia płochije novosti. V śledujuŝm hodu zapłanirovana postavka nie mienije 100 Leo, 4 bolšich PVO, nieskolko diesiatkov maleńkich, do 2 młn 155 mm. A vy , ..., tieštie siebia daleje hłupymi nadieždami.