Čamu alimpijskija čempijony masava siadziać na zvyčajnaj charčovaj sodzie
Bikarbanat natryju, zvyčajnaja charčovaja soda, stała abaviazkovym kampanientam spartoŭcaŭ. U čym sakret i ci ŭsim jana dapamoža?
Karyść bikarbanatu natryju, ci charčovaj sody, dla spartoŭcaŭ była adkrytaja bolš za 40 hadoŭ tamu. Šmatlikija daśledavańni prademanstravali, što charčovaja soda dapamahaje źmiakčyć balučyja fizijałahičnyja nastupstvy intensiŭnych trenirovak i dapamahaje spartoŭcam daŭžej zastavacca ŭ tonusie.
Jak charčovaja soda ŭździejničaje na arhanizm?
Pry vysokaintensiŭnych nahruzkach našyja ciahlicy pačynajuć pracavać va ŭmovach niedachopu kisłarodu. U takich umovach jany pierachodziać na anaerobny mietabalizm, pry jakim hlukoza (vuhlavody) rasščaplajecca biez udziełu kisłarodu i pieratvarajecca ŭ małočnuju kisłatu. Heta dazvalaje chutka atrymać enierhiju, ale pryvodzić da nazapašvańnia małočnaj kisłaty ŭ ciahlicach. Što ŭ vyniku vyklikaje adčuvańnie piakučaści i stomlenaści.
Bikarbanat natryju, jaki ŭtvarajecca ŭ arhaniźmie naturalnym čynam, dapamahaje jamu niejtralizavać małočnuju kisłatu, vyvieści jaje ź ciahlicavych kletak, i takim čynam padoŭžyć pieryjad aktyŭnaści, adterminavać nadychod stomlenaści. Ale nie zaŭsiody jaho naturalnaha zapasu dastatkova. Tamu jaho pavialičvajuć za košt pryjomu rastvoraŭ z charčovaj sodaj pierad intensiŭnaj treniroŭkaj abo spabornictvami.
Šmatlikija ekśpierymienty pakazali, što charčovaja soda moža być karysnaj dla spartsmienaŭ, jakija ŭdzielničajuć u spabornictvach, praciahłaść jakich składaje ad 1 da 7 chvilin. Heta takija vidy, jak bieh na dystancyi ad 400 da 1500 mietraŭ, płavańnie na dystancyi ad 100 da 400 mietraŭ, spryntarski viełasport, spabornictvy pa viesłavańni na bajdarkach, kanoe i akademičnym viesłavańni.
Ale ŭžyvańnie bikarbanatu natryju moža pryvodzić i da razładaŭ straŭnika, uzdućcia žyvata dy panosu. Tamu šmat chto sa spartoŭcaŭ admaŭlaŭsia ad jaho vykarystańnia.
Novy sposab vykarystańnia sody
Vytvorca spartyŭnaha charčavańnia kampanija Maurten sa Šviecyi znajšła, jak źnizić pabočnyja efiekty. Rašeńnie praduhledžvaje ŭklučeńnie ŭ recepturu svojeasablivaha bufieru. Pierad užyvańniem spartsmieny źmiešvajuć bikarbanat natryju z kruchmalistym hielem, jaki pa kansistencyi nahadvaje johurt.
Niadaŭniaje padvojnaje ślapoje daśledavańnie pakazała, što pradukt Maurten nie tolki krychu pavysiŭ ciahavitaść mužčyn-ravarystaŭ, ale i praduchiliŭ niepryjemnyja pabočnyja efiekty.
Kampanija zrabiła pradukt dastupnym dla hramadskaści ŭ lutym 2023 hoda.
Vytvorca śćviardžaje, što ich pradukcyju ŭžo pratestavali spartoŭcy ŭ roznych vidach sportu, ale asablivuju efiektyŭnaść jana zaśviedčyła ŭ finale zabiehu na 800 mietraŭ na Alimpijskich hulniach u Paryžy.
Jak śćviardžaje The Wall Street Journal, spasyłajučysia na brend-mieniedžara kampanii, pa mienšaj miery pałova spartoŭcaŭ hetaha finalnaha zabiehu vykarystoŭvali pradukcyju Maurten. I vynik byŭ vidavočnym. Pieramožca kienijec Emanuel Vańjońji (Emmanuel Wanyonyi), a taksama srebny pryzior kanadziec Marka Arop (Marco Arop) prabiehli dystancyju prykładna na try siekundy chutčej, čym jany heta zrabili ŭ finale čempijanatu śvietu hodam raniej.
Jak śćviardžajuć śpiecyjalisty, pradukcyja Maurten z vykarystańniem bikarbanatu natryju šyroka dastupnaja, całkam licenzavanaja, adpaviadaje kodeksam Suśvietnaha antydopinhavaha ahienctva. Sapraŭdy, soda, jak i kafiein, dopinham nie ličycca.
Kamientary
urynaterapija jašče leps