Chto tyja miljardery, jakija stajać za Trampam i Charys?

Pa infarmacyi ahienctva Bloomberg, na ciapierašni momant pieradvybarčyja štaby abodvuch kandydataŭ u prezidenty ZŠA Kamały Charys i Donalda Trampa ahułam atrymali achviaravańniaŭ na sumu kala 700 miljonaŭ dalaraŭ, pry hetym Charys sabrała hrošaj amal u paŭtara raza bolš za Trampa (404 miljony ŭ Charys suprać 295 miljonaŭ u Trampa). 

Adnak Tramp, jak adznačaje ahientcva, značna abhaniaje Charys u zbory achviaravańniaŭ ad najbahaciejšych ludziej ZŠA, čyje hołas, hrošy i ŭpłyŭ zvyčajna hulajuć važnuju rolu na prezidenckich vybarach i mohuć istotna pavialičyć šancy adnaho z kandydataŭ na pieramohu ŭ honcy.

«Naša Niva» vyrašyła razabracca, chto ciapier z amierykanskich miljarderaŭ finansuje Trampa i Charys, kolki vydatkoŭvajecca na heta hrošaj i jakaja ŭvohule ŭ hetych pradprymalnikaŭ śfiera dziejnaści i zacikaŭlenaść padtrymlivać peŭnaha kandydata ŭ prezidenty.

U śpis my ŭklučali tolki tych miljarderaŭ, jakija akramia vykazvańniaŭ publičnaj padtrymki svaim kandydatam u prezidenty ZŠA jašče i achviaravali im hrošy. Infarmacyja dla materyjała ŭziata z vydańniaŭ Bloomberg, Forbes, OpenSecrets i The Wall Street Journal, Politico, ABC News i inšych aŭtarytetnych miedyja.
Taksama varta adznačyć, što, pavodle amierykanskich zakonaŭ, pryvatnyja asoby mohuć achviaravać na aficyjnyja bankaŭskija rachunki pieradvybarčych štaboŭ kandydataŭ u prezidenty nie bolš za $6600 za ŭvieś pieryjad kampanii. Kali prychilniki kandydataŭ chočuć achviaravać bolš, jany zvyčajna pieravodziać hrošy na rachunki inšych arhanizacyj, źviazanych z kandydatami, ale nie źviazanych napramuju ź ich pieradvybarčymi štabami. Hetaj adnosna lehalnaj schiemaj daŭno i aktyŭna karystajucca miecenaty i inšyja zamožnyja sponsary kandydataŭ u prezidenty.

Miljardery-sponsary Trampa

Samym pieršym ź miljarderaŭ, jakija prychodziać u hałavu ŭ kantekście padtrymki Donalda Trampa, źjaŭlajecca ŭładalnik tvitara (X), a taksama hiendyrektar kampanij SpaceX i Tesla Iłan Mask, jon ža najbahaciejšy čałaviek płaniety (236,8 miljarda dalaraŭ). 

Mask publična zaniaŭ bok Trampa ŭ lipieni paśla niaŭdałaha zamachu na apošniaha, ale i pierad hetym biznesmien u tvitary nie raz vykazvaŭ simpatyju da Trampa i jahonaj palityki. Jak paviedamlaje Bloomberg, Mask jašče nie pieravodziŭ hrošy na pieradvybarčuju kampaniju Trampa napramuju, a tolki prafinansavaŭ adnu z novych trampaŭskich struktur — supierkamitet pa palityčnaj aktyŭnaści America PAC — na 45 miljonaŭ dalaraŭ.

Adnak hetaja suma, niahledziačy na bahaćcie i mahčymaści Maska, nie źjaŭlajecca samym vialikim z achviaravańniaŭ na patreby Trampa i mocna sastupaje ŭznosu ad jašče adnaho miljardera, jaki ŭ 17 razoŭ biadniejšy za Maska, ale źjaŭlajecca najbujniejšym i hałoŭnym sponsaram Trampa i ŭsioj respublikanskaj partyi ZŠA ŭvohule.

Hetym zahadkavym sponsaram źjaŭlajecca 81-hadovy miljarder Cimaci Mełan, jaki daŭno i metanakiravana paźbiahaje publiki i maje ŭ internecie tolki dvie fatahrafii z maładości. Siamiejnaja biznes-impieryja zdabyčy nafty i transpartnych pieravozak Cimaci Mełana kaštuje bolš za 14 miljardaŭ dalaraŭ (pavodle Forbes, heta ahulny kapitał siamji Mełan, a sam Cimaci Mełan moža mieć krychu bolš za miljard dalaraŭ).

Tolki za dva apošnija hady tajamničy miljarder vydatkavaŭ na padtrymku Trampa 126,5 miljona dalaraŭ, što pieravyšaje absalutna ŭsie publična viadomyja achviaravańni miljarderaŭ-prychilnikaŭ Trampa razam uziatyja padčas ciapierašniaj pieradvybarnaj honki.

Zahadkavaść i dziŭnaść takoj ščodraści Cimaci Mełana składajecca jašče ŭ tym, što biznesmien da 2020 hoda amal nie rabiŭ nijakich publičnych achviaravańniaŭ na palityčnyja arhanizacyi i partyi, a potym raptoŭna staŭ raskidvacca istotnymi sumami na patreby pravych sił ZŠA, adznačaje amierykanski finansavy manytorynhavy prajekt OpenSecrets.

Pavialičyć

Ahułam pieradvybarčuju kampaniju i struktury Trampa z 2022 hoda padtrymali hrašyma bolš za 15 miljarderaŭ z amierykanskaha śpisu Forbes, častka ź jakich uvachodzić u sotniu najbahaciejšych ludziej płaniety. Charakterna, što samymi vialikimi achviaravańniami, niahledziačy na rehularnyja sekścisckija vykazvańni Trampa i sudovaje abvinavačvańnie ŭ zhvałtavańni, adznačylisia adrazu 5 amierykanskich upłyvovych biznesvumien.

Aproč Iłana Maska i Cimaci Mełana, u śpis samych ščodrych sponsaraŭ Trampa ŭvachodziać nastupnyja miljardery.

1. Linda Makmen (bahaćcie: 3,2 miljarda dalaraŭ) — amierykanskaja biznesvumien, jakaja razam z mužam, viadomym miedyjamahnatam i restleram Vinsentam Makmenam, zasnavała miehapapularnaje ŭ ZŠA i śviecie spartova-zabaŭlalnaje reślinhavaje šou i brend WWE (World Wrestling Entertainment). Padčas pieršaha prezidenckaha terminu Trampa Makmen uznačalvała Upraŭleńnie pa spravach małoha biznesu ZŠA. Achviaravała Trampu 16 miljonaŭ dalaraŭ.
2. Elizabet Jułajn (bahaćcie: 6,7 miljarda dalaraŭ) — adna z samych ščodrych sponsaraŭ respublikanskaj partyi ZŠA. Razam z mužam, kansiervatyŭnym miljarderam Ryčardam Jułajnam, zasnavała kampaniju Uline, jakaja vyrablaje pakavalnyja materyjały i inšyja pramysłovyja tavary dla rynku ZŠA. Achviaravała Trampu 10 miljonaŭ dalaraŭ.
3. Dyjana Chendryks (bahaćcie: 21,9 miljarda dalaraŭ) — samaja paśpiachovaja amierykanskaja žančyna-miljarder pa viersii Forbes, jakaja stvaryła svoj biznes z nula. Biznesvumien kiruje kampanijaj ABC Supply, adnym z najbujniejšych aptovych pastaŭščykoŭ budmateryjałaŭ i voknaŭ u ZŠA. Źjaŭlajecca pierakananaj patryjotkaj i kansiervatarkaj, jakaja publična zachaplajecca «dziełavoj chvatkaj» Donalda Trampa. Achviaravała Trampu 6,3 miljonaŭ dalaraŭ.
4. Miryjam Adelsan (bahaćcie: 32,1 miljarda dalaraŭ) — udava kazino-mahnata i daŭniaha sponsara respublikanskaj partyi ZŠA Šełdana Adelsana. Žančyna naradziłasia ŭ Izraili i ŭ minułym pracavała zvyčajnym doktaram. Ciapier jana vałodaje kantrolnym pakietam akcyj impieryi ihralnych zaviadzieńniaŭ Las Vegas Sands i topavaj prafiesijnaj baskietbolnaj kamandy «Dałas Mavieryks». Płanavała achviaravać Trampu 90 miljonaŭ dalaraŭ, ale niadaŭna pasvaryłasia ź im i vydatkavała tolki 5,8 miljona.
5. Kełsi Uoren (bahaćcie 7,1 miljarda dalaraŭ) — miljarder-naftavik i ŭładalnik enierhietyčnaj kampanii Energy Transfer, jakomu Tramp u svoj pieršy prezidencki termin u abychod masavaj hramadskaj niezadavolenaści i krytyki ekołahaŭ dapamoh pabudavać naftapravod Dakota Access. Achviaravaŭ Trampu 5,8 miljona dalaraŭ.
6. Cimaci Dan (bahaćcie: 2,2 miljarda dalaraŭ) — jašče adzin naftavy miljarder, kiraŭnik enierhietyčnaj kampanii CrownQuest Operating, jaki niezadavoleny šeraham ekałahičnych abmiežavańniaŭ na raspracoŭku amierykanskich naftavych radoviščaŭ, uviedzienych administracyjaj prezidenta ZŠA Džo Bajdena. Achviaravaŭ Trampu 5 miljonaŭ dalaraŭ.
7. Keli Lefler (bahaćcie: 1,1 miljarda dalaraŭ) — amierykanskaja pradprymalnica i siabra respublikanskaj partyi ZŠA, ad jakoj paśpiachova abrałasia ŭ Sienat ZŠA padčas pieršaha prezidenckaha terminu Donalda Trampa. Nazyvała sabie «samaj kansiervatyŭnaj respublikankaj u Sienacie» i admaŭlała niebiaśpieku pandemii karanavirusa, naŭmysna vychodziačy na publiku biez maski. Razam z mužam, finansistam Džefam Sprekieram, uvachodziać u kiravańnie kampanii Intercontinental Exchange, jakoj naležyć najbujniejšaja ŭ śviecie Ńju-Jorkskaja fondavaja birža. Achviaravała Trampu 4,9 miljona dalaraŭ.
8. Fił Rafin (bahaćcie: 2,6 miljarda dalaraŭ) — važny dziełavy partnior i blizki siabar Donalda Trampa. Jany razam vałodajuć elitnym hatelem Trump International Hotel u Łas-Viehasie, a sam Rafin u tym ža horadzie asabista ŭznačalvaje hateli-kazino Treasure Island i Circus Circus. Rafin dapamahaŭ Trampu apłočvać jurydyčnyja vydatki padčas rasśledavańnia suviazaŭ Trampa z Kramlom u 2018 hodzie, a sam Tramp byŭ šafieram na viasielli Rafina z «Mis Ukraina 2001» Alaksandraj Nikałajenka ŭ 2008 hodzie. Achviaravaŭ Trampu 3,3 miljona dalaraŭ.

Pavialičyć

Pavialičyć

Miljardery-sponsary Charys

Jak piša Bloomberg, kolkaść miljarderaŭ, jakija adkryta achviavarali Kamale Charys, ciapier składaje 20 čałaviek. Samym zamožnym ź ich ahienctva nazyvaje byłoha hiendyrektara karparacyi Google Eryka Šmita (z kapitałam 30,2 miljarda dalaraŭ), jaki vydatkavaŭ kala 3 miljonaŭ dalaraŭ na padtrymku kandydata ad demakratyčnaj partyi.

Pry hetym ahienctva nie ŭklučyła ŭ śpis sponsaraŭ Charys svajho ŭładalnika — miljardera i fiłantropa Majkła Błumbierha (z kapitałam 104,7 miljarda dalaraŭ) — ale zajaviła, što biznesmien padčas ciapierašniaj prezidenckaj pieradvybarčaj kampanii achviaravaŭ niekalkim arhanizacyjam dempartyi ZŠA kala 20 miljonaŭ dalaraŭ, što robić jaho ŭniosak pakul što samym ščodrym z usich publična viadomych, zroblenych na karyść demarkataŭ. 

Achviaravańni ad Majkła Błumbierha pieršapačatkova pryznačalisia dla Džo Bajdena, ale ciapier, kali toj źniaŭsia z prezidenckaj honki, pa zakonie imi jak asnoŭny kandydat ad demakrataŭ moža skarystacca Kamała Charys.

Pavialičyć

Astatni śpis top-10 pa ŭzroŭni achviaravańniaŭ na padtrymku Charys vyhladaje ciapier tak (usie nižejpieraličanyja miljardery spačatku achviaravali na kampaniju Bajdena, hetyja ž hrošy ciapier moža vykarystoŭvać Charys).

1. Džordž Soras (bahaćcie: 7,2 miljarda dalaraŭ) — viadomy na ŭvieś śviet miljarder, fiłantrop, abaronca libieralna-demakratyčnych kaštoŭnaściaŭ i pravoŭ čałavieka. Jahonaja vialikaja sietka niedziaržaŭnych arhanizacyj i adnajmiennych fondaŭ u mnohich aŭtarytarnych i tatalitarnych krainach sutykajecca ź ciskam i represijami. Achviaravaŭ Charys / Bajdenu 15,9 miljona dalaraŭ. 
2. Hienry Łaŭfier (bahaćcie: 7,8 miljarda dalaraŭ) — vice-prezident bujnoj amierykanskaj finansavaj kampanii Renaissance Technologies, jakaja raspracoŭvaje prahramnaje zabiaśpiečańnie dla biržavych tarhoŭ. Źjaŭlajecca daŭnim sponsaram demakratyčnaj partyi ZŠA i aktyŭna padtrymlivaŭ Bajdena ŭ jahony pieršy prezidencki termin. Achviaravaŭ Charys / Bajdenu 2,1 miljona dalaraŭ.  
3. Ryd Chofman (bahaćcie: 2,5 miljarda dalaraŭ) — technałahičny miljarder, vienčurny inviestar, adzin z zasnavalnikaŭ papularnaj płaftormy LinkedIn. Akurat pierad pieramohaj Bajdena na vybarach 2020 hoda dapamahaŭ demakratam raspracoŭvać prahramu Alloy, dadatak dla ŭnutranaha i abaronienaha abmienu infarmacyjaj pamiž pradstaŭnikami dempartyi, adnak startap paciarpieŭ krach. Achviaravaŭ Charys / Bajdenu 2 miljonaŭ dalaraŭ.  
4. Łoren Paŭeł Džobs (bahaćcie: 14,8 miljarda dalaraŭ) — upłyvovaja amierykanskaja biznesvumien, udava pamierłaha zasnavalnika kampanii Apple Styvy Džobsa. Łoren Džobs kiruje bujnymi niekamiercyjnymi arhanizacyjami Emerson Collective i XQ Institute, jakija zajmajucca pieradavymi reformami ŭ śfierach adukacyi, imihracyjnaj palityki, navakolnaha asiarodździa, žurnalistycy i achovy zdaroŭja. Achviaravała Charys / Bajdenu 1 miljon dalaraŭ.
5. Pet Strajkier (bahaćcie: 4 miljardaŭ dalaraŭ) —zasnavalnica bujnoha dabračynnaj arhanizacyi Bohemian Foundation i adna z hałoŭnych akcyjanieraŭ mižnarodnaj karparacyi Stryker Corp., jakaja vyrablaje miedyčnaje abstalavańnie. Źjaŭlajecca zaciatym supiernikam rasizmu i parušeńniaŭ praŭ čałavieka, a taksama vystupaje za ŭzmacnieńnie i pašyreńnie sacyjalnych prahram u ZŠA. Achviaravała Charys / Bajdenu 1 miljon dalaraŭ.
6. Styvien Śpiłbierh (bahaćcie: 5,3 miljarda dalaraŭ) — suśvietna viadomy kinapradziusar i scenaryst, samy kamiercyjna paśpiachovy režysior suśvietnaha kiniematohrafa. Pierakanany prychilnik dempartyi ZŠA i adzin z samych aktyŭnych miedyjnych pamočnikaŭ Ukrainy na Zachadzie. Achviaravaŭ Charys / Bajdenu 1 miljon dalaraŭ.
7. Hordan Hieci (bahaćcie: 5 miljardaŭ dalaraŭ) — bujny amierykanski inviestar, fiłantrop i kampazitar kłasičnaj muzyki. U minułym atrymaŭ u spadčynu ad baćki, Džordža Poła Hieci, 40% akcyj bujnoj naftavaj impieryi Getty Oil, jakaja potym pryjšła ŭ zaniapad i navat nienadoŭha (u 2000-ych) trapiła va ŭłasnaść rasijskaha «Łukojła», a paśla znoŭ była pierapradadziena i viarnułasia pad amierykanski kantrol. Hordan Hieci pieryjadyčna akazvaje finansavuju dapamohu dempartyi ZŠA. Achviaravaŭ Charys / Bajdenu 1 miljon dalaraŭ.
8. Daścin Moskavic (bahaćcie: 13,8 miljarda dalaraŭ) — amierykanski IT-pradprymalnik i adzin z zasnavalnikaŭ sacsietki Facebook i płatformy Asana. Da 2016 hoda nie rabiŭ nijakich palityčnych achviaravańniaŭ, ale paśla źjaŭleńnia Donalda Trampa ŭ roli respublikanskaha kandydata ŭ prezidenty staŭ aktyŭna finansavać kandydata ad demakrataŭ, Chiłary Klintan. Moskavic adkryta krytykuje Trampa i aścierahajecca, što toj pryviadzie da poŭnaj izalacyi ZŠA ŭ śviecie. Achviaravaŭ Charys / Bajdenu 1 miljon dalaraŭ.

Pavialičyć

• 2
• 0
• 0
• 0
• 1
• 0
• 0
• 0