Palaki Piensilvanii mohuć vyznačyć chto stanie prezidentam ZŠA, Charys ci Tramp. Jak tak atrymałasia?

Na cikavy epizod, jaki adbyŭsia padčas debataŭ Charys i Trampa i moža paŭpłyvać na vyniki vybaraŭ, źviarnuŭ uvahu aŭtar kanała ŭ tvitary pad nikam @prof_preobr.

Viedučy havorku pra vajnu va Ukrainie, Kamała Charys zaŭvažyła, što nastupnaj cellu Pucina moža stać Polšča. I nahadała pra toje, što 800 tysiač žycharoŭ Piensilvanii — etničnyja palaki.

Niama nijakich sumnieńniaŭ, što hetaja zaŭvaha była zahadzia padrychtavanaja štabam pretendentki. Ale čamu takaja ŭvaha da palakaŭ Piensilvanii?

U bolšaści štataŭ pieramoha demakrataŭ ci respublikaŭcaŭ pradvyznačanaja. Zmahańnie idzie pieradusim za tyja štaty, jakija vahajucca. I mienavita Piensilvaniju ekśpierty nazyvajuć samaj važnaj. Ličycca, što vyjhryš u hetym štacie amal na 100% harantuje pieramohu i ŭ cełym u krainie.

Zhodna z madellu prahnazavańnia vybaraŭ palityčnaha analityka Niejta Silviera, Piensilvanija maje 35% vierahodnaści paŭpłyvać na vyniki vybaraŭ, što značna bolš, čym u luboha inšaha sa štataŭ, što vahajucca. Kali Charys pieramoža ŭ Piensilvanii, u jaje budzie 91% šancaŭ na pieramohu na vybarach, u toj čas jak u Trampa — ažno 96%. Tamu i Tramp, i Charys viaduć u hetym štacie samyja aktyŭnyja kampanii.

Pavialičyć

Nasielnictva Piensilvanii — 13 miljonaŭ čałaviek. Ź ich etničnyja palaki składajuć 800 tysiač, ci 6%. U adroźnieńnie ad inšych hrup nasielnictva, jany bolš aktyŭna chodziać na vybary. Siarod udzielnikaŭ hałasavańnia ich kožny dziasiaty.

Analityki źviartajuć uvahu, što ŭ 2016 i 2020 hadach roźnica ŭ padadzienych hałasach za kandydataŭ u cełym pa krainie była vielmi małaja. Tak, Tramp u 2016-m vyjhraŭ z adryvam ŭsiaho 0,7%, a Bajden u 2020-m — u 1,1%. Tamu 10% hałasoŭ palakaŭ Piensilvanii mohuć lohka źmianić vynik.

Asablivaść situacyi ŭ tym, što etničnyja palaki nie źjaŭlajucca vidavočnymi prychilnikami adnoj partyi. U minułym jany hałasavali jak za demakrataŭ (Kienedzi, Klintana, Abamu), tak i za respublikancaŭ (Niksana, Rejhana, Buša-starejšaha i Buša-małodšaha).

Ichni vybar časta zaležyć ad taho, kaho jany paličać bolš blizkim sabie i Polščy. Naprykład, za Kienedzi jany hałasavali, bo jon byŭ katalikom. Rejhana i Buša-starejšaha palaki padtrymali za baraćbu z SSSR, a Klintana — za ŭstupleńnie Polščy ŭ NATA.

Aŭtar zaŭvažaje, što za Rejhana, jaki byŭ prezidentam dva terminy, etničnyja palaki prahałasavali tolki na druhich vybarach, u 1984 hodzie. Heta adbyłosia paśla taho, jak jany ŭpeŭnilisia, što Rejhan sapraŭdy zmahajecca z Savieckim Sajuzam, krainaj, jakaja ŭ 1981 hodzie ŭviała ŭ Polščy vajennaje stanovišča.

Niezrazumieła, čamu ŭ 2016 hodzie simpatyi palakaŭ byli na baku Trampa niahledziačy na jahonuju krytyku NATA i pachvalbu Pucina. Mahčyma, jany paličyli, što heta jon robić tolki dla pijaru. Žyćcio pakazała, što Tramp byŭ ščyry. U vyniku ŭ 2020-m hetyja vybarščyki addali svaje hałasy Bajdenu.

Aŭtar zaŭvažaje, što dla etničnych palakaŭ, jak i dla ŭsich vybarščykaŭ, hałoŭnymi prablemami źjaŭlajucca ekanomika i ceny. Adnak apytańni pakazvajuć, što ŭ štatach, jakija vahajucca, uzrovień davieru da abodvuch kandydataŭ vyraŭnivajecca.

Tamu vyrašalnym moža stać niejki druhasny faktar. Im i moža stać zakłapočanaść etničnych palakaŭ biaśpiekaj Polščy. Pahrozu z boku Rasii jany zusim nie ŭsprymajuć jak žart i padtrymlivajuć Ukrainu bolš aktyŭna, čym siaredni amierykaniec.

Tamu zhadka palakaŭ u vystupleńni Charys była zusim nie vypadkovaj. Analityk ličyć, što jaje štab i nadalej budzie źviartacca da hetaj aŭdytoryi. U vyniku, pry dakładnym raźliku, Charys moža atrymać dadatkova dziasiatki tysiač hałasoŭ u Piensilvanii, dzie razryŭ pamiž pieramožcam i tym, chto prajhraje, zvyčajna jakraz takimi ličbami i vymiarajecca.

• 17
• 0
• 4
• 0
• 1
• 0
• 0
• 0