Litoŭski błohier naviedaŭ Minsk — i voś jaki rajon nazvaŭ najlepšym
Błohier-pačatkoviec Memellander z Kłajpiedy ceły tydzień pravioŭ u Biełarusi. Dniami na jaho kanale vyjšaŭ rolik, dzie jon raskazaŭ pra dva kantrastnyja rajony Minska — samy horšy i samy prestyžny. Vybar rajonaŭ vyklikaŭ škvał kamientaroŭ pad rolikam.
Zvańnie najhoršaha rajona biełaruskaj stalicy atrymała Čyžoŭka. Ale, jak kaža sam aŭtar videa, heta nie jon sam prydumaŭ, a taki adkaz vydaŭ jamu Huhł.
Pošukavaja sistema pryviała jaho na artykuł ad 2019 hoda, apublikavany na sajcie banana.by.
«Čyžoŭka, jak i sam Zavodski rajon, ličycca centram kryminalnych elemientaŭ. Hetym rajonam u Minsku dziaciej pałochajuć. Mnohija ličać, što tut žyvuć tolki tyja, chto schilny da praźmiernaha spažyvańnia ałkaholu i złačynnych dziejańniaŭ. Čaściej za ŭsio ŭ hetaj častcy stalicy rehistrujuć kradziažy, rabavańni i chulihanstvy», — havorycca ŭ artykule, na jaki spasyłajecca hość ź Litvy.
Paśla 20-chvilinnaha špacyru pa «samym horšym» rajonie Minska błohier nakiravaŭsia ŭ «samy lepšy». Im niečakana akazaŭsia «Minsk-Śviet».
«Tak, my pryjechali ŭ darahi rajon Minska», — kazaŭ błohier, pakul zdymaŭ «Minsk-Śviet» z sałona mašyny.
Dzie jon adšukaŭ infarmacyju pra elitarnaść hetaha rajona, zastajecca zahadkaj.
«Pahulajem, pahladzim, jak vyhladajuć prestyžnyja rajony Minska», — z takich słoŭ pačaŭsia špacyr pa dvarach mikrarajona.
Amal na pieršych krokach błohier adznačyŭ, što aŭtamabili na parkoŭkach stajać prostyja.
Kali ŭ Čyžoŭcy błohier kazaŭ pra toje, što ludziej u dvarach mała i asnoŭny kantynhient, jakija jamu sustrakaŭsia, — babuli na łaŭkach, to ŭ «Minsk-Śviet» było šmat maładych siemjaŭ i dziaciej.
Litoŭski padarožnik źviarnuŭ uvahu i na toje, jak adroźnivajucca dziciačyja placoŭki. Kali ŭ Čyžoŭcy heta byli placoŭki savieckaha ŭzoru, to ŭ «Minsk-Śviet» — bolš sučasnyja, padobnyja da tych, što možna ŭbačyć u Litvie.
Taksama jon źviarnuŭ uvahu na adsutnaść dreŭ i inšaj zielaniny ŭ rajonie.
Kamientatary nie pahadzilisia z takoj acenkaj rajonaŭ
Praz davoli sprečnuju acenku rajonaŭ biełaruskaj stalicy pad videa naźbirałasia šmat kamientaryjaŭ ad biełarusaŭ, jakija nie pahadzilisia ź mierkavańniem litoŭca. Voś niekatoryja ź ich.
«Samaje strašnaje, što moža adbycca z čužyncam u Čyžoŭcy — heta kaštan, jaki ŭpaŭ na hałavu», — hučyć samy papularny kamientar pad videa.
«Što za bzdura? Huhł vydaŭ sucelnuju łuchtu. Usio chłuśnia», «Čyžoŭka — nie najhoršy rajon Minska, a «Minsk-Śviet» daloka nie najlepšy», — pišuć inšyja.
Mnohija adznačyli ŭ kamientarach, što infarmacyja pra Čyžoŭku kali i była aktualnaja, to tolki dla 1980-1990-ch hadoŭ.
Da acenki «Minsk-Śviet» taksama šmat pytańniaŭ:
«Zusim nie najlepšy rajon. Rajon dla moładzi z adnosna dastupnym žyllom. Damy vielizarnyja i niazručnyja».
«Nie viedaju, jak ciapier, ale ŭ «Minsk-Śviet» raniej pradavali samyja tannyja kvatery», — adznačajuć inšyja.
Adzin z karystalnikaŭ napisaŭ, što darma aŭtar davieryŭsia Huhł.
Taksama znajšoŭsia kamientatar, jaki paraiŭ aceńvać aŭtamabili ŭ Biełarusi z ulikam ich cany, a nie tolki źniešnaści:
«Vy kali na mašyny hladzicie i kažacie «zvyčajnyja», to trymajecie ŭ hałavie, što ŭ nas zaharadžalnyja pošliny na aŭto i hetyja mašyny nam kaštujuć na paradak daražej, čym vam».
Na što błohier ź Litvy adkazaŭ, što razumieje pra ceny, ale hladzić na ich vačyma žychara Litvy.
«Vačyma žychara Litvy hetyja mašyny davoli taki staryja. I heta niezvyčajna», — adkazaŭ litoviec.
Siarod inšaha kamientatary adznačajuć, što błohier błytaje ŭvachody ŭ mietro z padziemnymi pierachodami (mahčyma, heta tamu, što ŭ Litvie mietro niama).
«U samym pačatku rolika — mikrarajon Sierabranka. I prosta padziemny pierachod, heta jašče nie mietro. Kala mietro zaŭsiody možna ŭbačyć čyrvonuju litaru «M», — źviartaje ŭvahu adzin z kamientataraŭ.
Kamientary
Vilnia ŭžo nie naša.