«Zaminavańnie» ofisu BNF paličyli chulihanstvam

16 žniŭnia nieviadomyja prymacavali na dźviarach siadziby prystasavańnie, padobnaje da bomby, a vokny j dźviery vypackali smałoj. Vyklikanyja sapiory vyjavili, što prystasavańnie – mulaž bomby.

Na miescy zdareńnia pracavała hrupa kryminalistaŭ i operupaŭnavažanych kryminalnaha vyšuku. Kiraŭnictva partyi BNF ličyć, što ŭłady nie zacikaŭleny ŭ pošukach złačyncaŭ.

Kiraŭnictva ŭpraŭleńnia ŭnutranych spraŭ Savieckaha rajonu Miensku sankcyjanavała raspačać kryminalnuju spravu nie za teraryzm, jak nastojvali siabry partyi BNF, a za chulihanstva. Namieśnik adździełu hramadzkaj biaśpieki j achovy hramadzkaha paradku Mikałaj Silič paviedamiŭ «Svabodzie»:

(Silič: ) «Raspačali kryminalnuju spravu pavodle faktu – chulihanstva. Nu, jaki tut moža być teraryzm? Tut niama teraryzmu. Tut jość chulihanstva».

Učastkovy inspektar Michaił Prudnikaŭ, na terytoryi jakoha znachodzicca ofis partyi BNF, ciaham dziesiaci dzion pravodziŭ pravierku materyjałaŭ, atrymanych ad kiraŭnictva. 16 žniŭnia na miescy zdareńnia kryminalisty źbirali ŭsie rečy, jakija, na ich dumku, mahli dapamahčy ŭ pošukach złačyncaŭ. Adbitki palcaŭ zdymali ŭ labaratoryi. Raz nieviadomyja pakinuli ŭlotki z abrevijaturaj RNIE (Rasiejskaje nacyjanalnaje adzinstva) pad mulažom bomby j la siadziby BNF, kryminalisty šukali supadzieńniaŭ adbitkaŭ palcaŭ z tymi, što raniej byli ŭziaty ŭ zatrymanych prychilnikaŭ RNIE. Mulaž bomby z vyjavaj svastyki milicyjanty zabrali ŭ jakaści rečavaha dokazu.

Lider BNF Vincuk Viačorka ŭpeŭnieny, što milicyjanty nia stali b raspačynać spravu za teraryzm.

(Viačorka: ) «Nie vyklikaje ździŭleńnia, što sprava tak i nie adkryta pavodle artykułu «Teraryzm». Mnie ŭžo davodziłasia havaryć: kali b, nia daj Boh, było niešta takoje ŭčyniena adnosna dziaržaŭnych orhanaŭ albo jakoha-niebudź BRSM, to byli b adrazu i kryminalnaja sprava, i šumicha».

Namieśnik kiraŭnika partyi BNF Viktar Ivaškievič ličyć, što złačyncaŭ šukać nia buduć.

(Ivaškievič: ) «U hetaj sytuacyi, jak heta j napačatku było viadoma, milicyja sama ničoha nie vyrašaje. Na ŭsio budzie palityčnaje rašeńnie. A palityčnaje rašeńnie možna rastłumačyć tak: nichto nikoha nikoli nia znojdzie, bo znajści tych, chto heta zrabiŭ, – aznačaje pakarać prychilnikaŭ abjadnańnia z Rasiejaj i pakazać niejkuju pravatu prychilnikaŭ nacyjanalnaj niezaležnaści. A na heta ŭłada nijakim čynam pajści nia choča».

Namieśnik kiraŭnika adździełu hramadzkaj biaśpieki Savieckaha RUUS patłumačyŭ «Svabodzie», što kryminalnaj spravaj buduć zajmacca supracoŭniki ŭsich adździełaŭ upraŭleńnia milicyi.

• 0
• 0
• 0
• 0
• 0
• 0
• 0
• 0