Biełaruś stavić pad pytańnie metazhodnaść isnavańnia Mytnaha sajuza pry zachavańni pošliny na naftu.
Biełaruś stavić pad pytańnie metazhodnaść isnavańnia Mytnaha sajuza pry zachavańni pošliny na naftu.
Źbirańnie pošliny na rasijskuju naftu, jakaja pastaŭlajecca ŭ Biełaruś, supiarečyć pryncypam adzinaj mytnaj prastory, zajaviŭ namieśnik dyrektara departamienta źniešnieekanamičnaj dziejnaści Ministerstva zamiežnych spraŭ Anton Kudasaŭ na pres‑kanfierencyi ŭ Minsku 19 lutaha.
Jon nahadaŭ, što zaraz pastaŭki syroj nafty ŭ Biełaruś rehulujucca biełaruska‑rasijskim mižuradavym pratakołam ad 27 studzienia 2010 hoda, jaki «lehalizuje prymianieńnie rasijskim bokam hetaj pošliny». «Hety pratakoł nie adpaviadaje pravavoj bazie Mytnaha sajuza i tym dakumientam, jakija pryniaty ŭ suviazi z rašeńniem prezidentaŭ Biełarusi, Rasii i Kazachstana stvaryć adzinuju mytnuju terytoryju z 1 lipienia 2010 hoda», — padkreśliŭ Kudasaŭ.
Na jaho dumku,
nieabchodna pravieści trochbakovyja pieramovy, «jakija pavinny pryvieści da zrazumiełaj sistemy ekspartu nafty z Rasii ŭ Biełaruś i Kazachstan bieź źbirańnia mytaŭ».
«Ja spadziajusia, što takija pieramovy ŭ chutkim časie buduć praviedzieny», — zajaviŭ pradstaŭnik MZS.
Pry hetym jon dadaŭ, što pieramoŭny praces «budzie ciažkim». «Pytańnie staić, ci hatovy ŭ Rasii madyfikavać svaju sistemu źbirańnia renty z pryrodnych resursaŭ», — rastłumačyŭ Kudasaŭ.
«Kali hetaha nie adbudziecca, adzinuju mytnuju terytoryju, unutry jakoj biarecca pošlina, nielha ŭjavić. Tut uźnikaje pytańnie ab vykanańni rašeńnia ŭradaŭ ab stvareńni takoj terytoryi», — padkreśliŭ pradstaŭnik MZS. Pavodle jaho słoŭ, «kali maje miesca adstupleńnie ad niejkich bazavych pryncypaŭ Mytnaha sajuza ŭ adnosinach da nafty i naftapraduktaŭ, to jość adstupleńnie ad mižnarodnych praviłaŭ u adnosinach da adnaho tavaru, vielmi važnaha z punktu hledžańnia našych intaresaŭ, to vyklučyć ničoha nielha».
Kudasaŭ taksama prakamientavaŭ infarmacyju niekatorych rasijskich ŚMI ab mahčymym uviadzieńni Rasijaj uvaznoj pošliny na pryrodny haz. «Uviadzieńnie pošliny luboha pamieru na pryrodny haz, što pastaŭlajecca ŭ Biełaruś,
budzie źjaŭlacca pramym parušeńniem dziejnych pahadnieńniaŭ pamiž bakami», — zajaviŭ jon.
Jak paviedamlałasia raniej, da 1 sakavika Minekanamraźvićcia RF płanuje padrychtavać prajekt pahadnieńnia ab pastaŭkach nafty ŭ miežach Mytnaha sajuza.
«Da 1 sakavika my pavinny padać prajekt pahadnieńnia va ŭrad. Heta prajekt, źviazany z administravańniem vyvaznych mytnych pošlin», — zajaviŭ 9 lutaha ŭ Maskvie namieśnik dyrektara zvodnaha departamienta analizu i rehulavańnia źniešnieekanamičnaj dziejnaści Minekanamraźvićcia Andrej Točyn.
Pavodle jaho słoŭ, na praciahu sakavika ŭdzielniki Mytnaha sajuza pavinny damovicca pa ekspartnych pošlinach na naftu. Pakul ža ich administravańnie zastajecca na nacyjanalnym uzroŭni i, jak zaznačyŭ čynoŭnik, budzie zachoŭvacca takim praciahły čas. Heta źviazana z tym, što ekspartnyja pošliny źjaŭlajucca nie tolki rehulacyjnymi, ale častka ź ich źjaŭlajucca tavarnaj rentaj (u tym liku pa nafcie), rastłumačyŭ jon. Takim čynam, skazaŭ Točyn, bakam daviadziecca damaŭlacca, jakija miechanizmy administravańnia ekspartnych pošlin buduć prymianiacca, kab eksparciory nie mieli mahčymaści adychodzić ad vypłaty hetaj renty za košt vyvazu tavaraŭ z terytoryi Biełarusi ci Kazachstana.
Kamientary