Iłan Mask uvioŭ publiku ŭ zman, bo jaho robaty kiravalisia ludźmi — Bloomberg
Niadaŭniaja vystava pradukcyi kampanii Tesla Iłana Maska, jakaja pakazała publicy i inviestaram novyja bieśpiłotnyja aŭtamabili i robataŭ, azmročyłasia tym faktam, što prasunutyja ruchi cieła «samastojnych» humanoidaŭ Optimus nasamreč addalena rehulavalisia supracoŭnikami Tesla, pra što Mask zmaŭčaŭ.
Vydańnie The Bloomberg sa spasyłkaj na supracoŭnikaŭ kampanii Tesla daviedałasia, što pradstaŭlenyja na niadaŭniaj vystavie miljarderam Iłanam Maskam robaty-humanoidy Optimus nasamreč addalena kiravalisia ludźmi.
Mask na prezientacyi We, Robot zajaviŭ, što robaty Optimus, jakija buduć kaštavać da 30 tysiač dalaraŭ (amal 96 tysiač biełaruskich rubloŭ), źjaŭlajucca aŭtanomnymi pad kiravańniem štučnaha intelektu i «ŭ niedalokaj budučyni zmohuć rabić usio što zaŭhodna»: vyhulvać sabaku, nasić pasyłki, palivać raśliny, nahladać za dziećmi, padstryhać hazon, padavać napoi i h.d.
Na samoj vystavie niekalki hatovych ekzemplaraŭ Optimus tancavali, raźlivali napoi dla haściej, davali ludziam ruku i navat hulali ź imi ŭ kamień-papieru-nažnicy.
Jak akazałasia, štučny intelekt kantralavaŭ vyklučna chadźbu robataŭ, a astatnija funkcyi — apieratyŭnyja hałasavyja adkazy, žestykulacyju, tancavalnyja ruchi i hulni — rehulavalisia supracoŭnikami Tesla, jakija nie znachodzilisia na vystavie, raskazali Bloomberg krynicy z kampanii Tesla, blizka znajomyja ź situacyjaj.
Adnak, niahledziačy na ŭsio heta, inviestary i ekśpierty ŭ cełym zastalisia niezadavolenyja prezientacyjaj, dzie pakazali nie tolki robataŭ Optimus, ale i novyja bieśpiłotnyja aŭtamabili Cybercab i Robovan. Pa ich słovach, usio, što jany ŭbačyli, adnosicca da doŭhaterminovaj pierśpiektyvy, a pa sutnaści na siońnia nie było prapanavana ničoha kankretnaha.
Śpiecyjalisty ličać, što asartymient najaŭnaj pradukcyi Tesla sastareŭ i što novaja vystava mała što źmianiła ŭ nieprazrystych siarednieterminovych pierśpiektyvach prybytku.
Iłan Mask daŭno imkniecca stać pieršym biznesmienam, jaki napoŭnić vulicy haradoŭ taksi-bieśpiłotnikami, ale dahetul jamu nie ŭdavałasia pierajści ad słoŭ da spraŭ. Upieršyniu jon publična zahavaryŭ pra svaje płany amal 10 hadoŭ tamu, paabiacaŭšy, što da kanca 2017 hoda amierykancy zmohuć karystacca pasłuhami robataksi. U 2019 hodzie jon zajaviŭ, što da 2020-ha na darohach ZŠA budzie adzin miljon takich aŭtamabilaŭ.
U 2024 Mask znoŭ zapeŭniŭ inviestaraŭ, što ŭžo ŭ nastupnym hodzie taksi-bieśpiłotniki mohuć stać dastupnymi ŭ Techasie i Kalifornii, kali rehulujučyja orhany nie buduć stvarać pieraškody. Tym časam miljarder paabiacaŭ, što masavaja vytvorčaść i prodaž całkam aŭtanomnych robataŭ Optimus adbudziecca ŭ bližejšaj budučyni.
Kamientary
Kali ni abiaruć Trampa ..voźmucca za ašukanca Iłonu ...pi..pi Didi ad technałohij
Što našyja šachraji , što toj Mask )