Kiraŭnik RPC paabiacaŭ rasijanam viečnaje žyćcio ŭ vypadku hibieli va Ukrainie i zaklikaŭ malicca za Pucina
Rasijanie, jakija ŭdzielničajuć u vajnie suprać Ukrainy, pavinny pamiatać pra viečnaje žyćcio, jakoje harantavana im u vypadku hibieli na poli boju.
Pra heta patryjarch Maskoŭski i ŭsioj Rusi Kirył napisaŭ u svajoj novaj knizie «Za Ruś Śviatuju: patryjatyzm i viera», ź jakoj aznajomilisia «Viedamaści», pišuć The Moscow Times.
«Heta jość žyćcio viečnaje — i ty idzieš na podźvih, addaješ svajo fizičnaje žyćcio, ale pamiataj: ty nie zahinieš, ty nie pamreš, ty budzieš žyć», — adznačyŭ kiraŭnik Ruskaj pravasłaŭnaj carkvy, spasłaŭšysia na Jevanhielle ad Jana (Jan. 17:3).
Jon zaklikaŭ «mabilizavać» carkvu razam z vajennymi i palityčnymi siłami Rasii, a rasijan — malicca za prezidenta RF Uładzimira Pucina i sałdat, jakija vajujuć va Ukrainie.
Pry hetym patryjarch nazvaŭ Rasiju miralubnaj krainaj, padkreśliŭšy, što rasijski narod nie imkniecca pačynać vojny ź inšymi krainami. Adnak, pavodle jaho słoŭ, čałaviectva niazdolnaje žyć biez vojnaŭ.
«Takoj źjaŭlajecca zaniapałaj pryroda čałavieka, ale my možam i pavinny minimizavać humanitarnuju škodu ad vajennych dziejańniaŭ, kali hetyja dziejańni pačalisia», — padkreśliŭ patryjarch.
U chodzie vajennych dziejańniaŭ, na dumku kiraŭnika RPC, nieabchodna likvidavać «djabalskija pamknieńni» ŭ śviadomaści ludziej, jakija nie imknucca da «duchoŭnaha adzinstva Śviatoj Rusi».
Adnačasova patryjarch padkreśliŭ, što Rasija nie prymaje duchoŭnych kaštoŭnaściaŭ tych, chto «pretenduje na suśvietnuju ŭładu», i stanovicca «vostravam svabody» ad «biasoŭščyny». Jon taksama daŭ aznačeńnie paniaćciu «ruski śviet», jakoje zaklučajecca ŭ «supolnaści śviatyniaŭ» ludziej roznych etnasaŭ, vieravyznańniaŭ i kulturnych tradycyj. Akramia taho, patryjarch pracytavaŭ Pucina, jaki skazaŭ, što «ruski śviet — heta ŭsie pakaleńni našych prodkaŭ i naščadki, jakija buduć žyć paśla nas».
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary