«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu
Śviežaje fota Maryi Kaleśnikavaj z uśmieškaj na tvary vyklikała šalenstva ŭ apazicyjnych błohieraŭ-kanśpirołahaŭ. Jany syšlisia z ananimnymi prałukašenkaŭskimi telehram-kanałami ŭ mahčymaści paździekavacca z palitźniavolenaj. Hetyja ž naratyvy raspaŭsiudžvajuć u sacsietkach (pieravažna ŭ fejsbuku) akaŭnty, pieravažna padpisanyja vydumanymi imionami. Što jany chočuć dakazać?
Spačatku ścisła nahadajem pieradhistoryju.
Maryja Kaleśnikava, kiraŭnica štaba Viktara Babaryki, znachodzicca ŭ źniavoleńni z 7 vieraśnia 2020 hoda, kali parvała pašpart pry sprobie hvałtoŭna vyvieźci jaje ź Biełarusi va Ukrainu. Joj prysudzili 11 hadoŭ źniavoleńnia. U druhoj pałovie 2022 hoda Kaleśnikavu pieraviali ź SIZA ŭ homielskuju kałoniju.
28 listapada 2022 hoda Maryja trapiła ŭ reanimacyju homielskaj balnicy. Paśla hetaha da jaje na 10 chvilin puścili tatu.
U lutym 2023 dla Kaleśnikavaj uviali režym poŭnaj izalacyi — svajaki nie atrymlivajuć listy ad jaje, nie puskajuć i advakata. Paŭtara hoda rodnyja mahli tolki zdahadvacca, ci žyvaja Maryja.
12 listapada 2024 hoda da Kaleśnikavaj u druhi raz puścili tatu — razam z Ramanam Pratasievičam.
Da jakich vysnovaŭ pryjšli kanśpirołahi i čamu bolšaść ich idej — sproba manipulavać hramadskaj dumkaj? Davajcie raźbiracca.
«Kaleśnikavu nichto nikoli nie bačyŭ u turmie»
Heta chłuśnia. U SIZA na vulicy Vaładarskaha jana siadzieła ŭ adzinočnaj kamiery, kala jakoj byŭ abstalavany dadatkovy post. Susiedak u jaje nie było, ale Maryju bačyli ŭ kalidorach, kali jaje vadzili da śledčaha ci advakata.
U kałonii jana spačatku była ŭ atradzie ź inšymi źniavolenymi i chadziła ź imi na pracu. Ź ciaham času Kaleśnikavu stali ŭsio čaściej adpraŭlać u štrafny izalatar. Paśla hetaha, pa słovach jaje byłych susiedak, Maryju izalavali — pieraviali ŭ pamiaškańnie kamiernaha typu. Usie dalejšyja zhadvańni pra jaje — situacyi, kali niechta z asudžanych zdalok ubačyŭ Kaleśnikavu, naprykład, u miedčaści. Razmaŭlać pry hetym ź joj zabaroniena.
Ciapierašniaje fota było zroblena ŭ pamiaškańni miedčaści homielskaj kałonii, byłyja palitźniavolenyja paznali anturaž.
«Nasamreč Kaleśnikava znachodzicca ŭ sanatoryi ci na śpiecdačy KDB, a nie ŭ turmie»
Nivodnaha kankretnaha śviedčańnia ad niejkaha čałavieka ab tym, što za apošnija paŭtara hoda Maryju kudyści vyvozili i ŭtrymlivali ŭ inšym miescy, niama.
Anałahičnyja plotki raspaŭsiudžvajucca i pra inšych palityčnych lidaraŭ, u dačynieńni jakich uviedzieny režym inkamunikada.
«U Kaleśnikavaj kaśmietyka i modnaja pryčoska»
Źniavolenyja ŭ ŠIZA i PKT nie majuć mahčymaść nafarbavacca kaśmietykaj. Stryžka dla ich taksama niedasiažnaja.
Ci źjaŭlajecca prablemaj dazvolić Kaleśnikavaj zrabić makijaž i pastryhčysia pierad prychodam haściej? Nijakaj. Vidavočna, što prapahanda sprabuje stvaryć bolš prezientabielnuju karcinku. Naprykład, pry zdymkach u mužčynskich kałonijach u Škłovie i Babrujsku źniavolenych zapisvali ŭ pamiaškańniach z samym śviežym ramontam.
«U Kaleśnikavaj na ruce smart-hadzińnik»
Źniavolenyja ŭ atradach i ŭ pamiaškańni kamiernaha typu majuć mahčymaść nasić naručny hadzińnik. Na čas znachodžańnia ŭ štrafnym izalatary jaho adbirajuć.
U Maryi nie smart-hadzińnik, a zvyčajny elektronny.
«Ci ŭsie palitviaźni dvojčy sustrakajucca sa svaim baćkam?»
Nie ŭsie. U roznych kałonijach sistema spatkańniaŭ palitviaźniaŭ z rodnymi pracuje pa-roznamu. Niedzie atrymać dazvoł na doŭhaterminovaje spatkańnie (chacia b na adzin dzień!) uvohule niemahčyma. Niedzie dajuć spatkańnie na dzień — u tym liku i statusnym, miedyjnym palitviaźniam, — ale admaŭlajuć u spatkańni na dva-try dni, jak u pryncypie praduhledžvajecca zakonam. Jość ščaśliŭčyki, jakija chadzili i na try dni.
Karotkaterminovyja spatkańni — niekalki hadzin razmovy pa telefonie praz škło — dajuć jašče praściej.
Adnak siemji palitviaźniaŭ u ciapierašnich realijach imknucca nie publičyć nijakija svaje pryvatnyja abstaviny — kab nie zrabić horš.
Vidavočna, što da palitykaŭ kštałtu Kaleśnikavaj padychod piersanalny, a nie pa ahulnaj pracedury. Pieršaje jaje spatkańnie z tatam — dziesiacichvilinnaja razmova ŭ balnicy paśla apieracyi — uvohule nie apisvajecca jak źjava ŭ zakanadaŭstvie. Vyhladaje, što i ciapierašniaja sustreča nie adpaviadaje nijakim normam. Heta rašeńnie źvierchu, vyklikanaje pytańniem karespandenta BBC i reakcyjaj Alaksandra Łukašenki na jaho.
«Kaleśnikava na fota nie važyć 45 kiłahramaŭ»
Tak, nie važyć, i heta dobra.
Infarmacyja pra vahu Maryi ad pačatku vyklikała sumnievy — jak zhadvałasia vyšej, nichto ź viaźniaŭ nie moža kamunikavać ź joj, a značyć, nie moža i spytać i pra stan zdaroŭja. Maksimum — acanić źniešni vyhlad na voka, što nie daje nijakaj harantyi dakładnaści
«A čamu jana ŭśmichajecca?»
Zastajecca tolki paradavacca za mocnaha čałavieka, jaki znachodzić siły na ŭśmiešku navat u takich abstavinach.
Ciapier čytajuć
Bietanavać hrošy — nacyjanalnaja ideja biełarusaŭ? Paraŭnali tempy budaŭnictva ŭ Biełarusi, Polščy, Litvie i Łatvii11
Kamientary
Tak ja-to na dijetie postojanno i na tabletkach i vračach, a jej i pieriedači zaprieŝieny, i inkomunikado i nikakoho mied.obsłuživanija.