Bukieraŭskuju premiju atrymała kniha, dzie padziei adbyvajucca na MKS
Heta taksama samy karotki raman u historyi premii — u knizie ŭsiaho 136 staronak.
Premiju 2024 hoda atrymała anhlijskaja piśmieńnica Samanta Charvi za raman «Arbita», jaki raspaviadaje pra adzin dzień z žyćcia šaści astranaŭtaŭ, što znachodziacca na Mižnarodnaj kaśmičnaj stancyi, piša Bi-bi-si.
Cyrymonija ŭručeńnia premii prajšła ŭ Łondanie, žury ŭ hetym hodzie ŭznačaliŭ brytanski piśmieńnik i mastak Edmund de Vaał. Jon skazaŭ, što ŭsia kamanda adzinahałosna addała pieravahu ramanu Samanty Charvi.
«Inšy raz vy sustrakajecie knihu i nie možacie zrazumieć, jak adbyłosia heta cudoŭnaje zdareńnie. Jak sudździ my byli poŭnyja rašučaści znajści knihu, jakaja b nas schvalavała, jakaja b mieła jomistaść i rezanans, jakoj my chacieli b padzialicca», — skazaŭ de Vaał.
Charvi stała pieršaj žančynaj, jakaja atrymała premiju z 2019 hoda, a «Arbita» stała samoj pradavanaj knihaj z šort-lista ŭ Vialikabrytanii.
Heta pieršaja kniha — łaŭreat Bukieraŭskaj premii, dzie dziejańnie adbyvajecca ŭ kosmasie, a taksama samy karotki raman — u knizie ŭsiaho 136 staronak.
«Hety kampaktny, ale ŭ toj ža čas pryhožy pa źmieście raman zaprašaje nas panazirać za vieličču Ziamli i adnačasova zadumacca pra indyvidualnuju i kalektyŭnuju vartaść kožnaha čałaviečaha žyćcia», — havorycca ŭ zajavie premii.
U šort-list, akramia Charvi, uvajšli knihi «Voziera stvareńnia» amierykanki Rejčeł Kušnier, «Schovišča» niderłandska-izrailskaj piśmieńnicy Jael van der Vuden, «Utrymany» kanadki En Majkłs, «Malitva ŭ kamiennym miašku» aŭstralijki Šarłot Vud i raman «Džejms» amierykanca Piersivala Eviereta.
Na premiju mohuć pretendavać mastackija tvory piśmieńnikaŭ luboj nacyjanalnaści, napisanyja na anhlijskaj movie i apublikavanyja ŭ Vialikabrytanii abo Irłandyi za apošni hod.
Premija ŭručajecca z 1969 hoda.
«Biełarusy buduć cichieńka dumać svajo. A vada kamień točyć, dyj Łukašenka fizična nie viečny». Hłyboki manałoh byłoha mytnika Alesia Jurkojcia3
Kamientary