Prapucinski papulist pieramoh u pieršym tury vybaraŭ u Rumynii, ale prezidentam maje stać žančyna-libierał

Małaviadomy palityk biez dośviedu dziaržaŭnaha kiravańnia i partyi za plačyma nabraŭ 23% hałasoŭ u pieršym tury vybaraŭ u Rumynii. Heta 62-hadovy Kelin Džardžesku, jaki asnoŭnuju ahitacyju pravodziŭ u tyktoku. U pasłužnym śpisie ŭ jaho — praca drobnym klerkam u struktury AAN. Adnak za śpinaju ŭ jaho, mahčyma, Maskva, bo jaho rytoryka istotna adroźnivałasia ad pazicyi inšych kandydataŭ: jon krytykuje NATA, ES, dapamohu Ukrainie, vystupaje suprać amierykanskaj vajskovaj bazy ŭ Devesele. 

Pazicyi Džardžesku blizkija da tych, jakija zajmaje Aŭstryjskaja partyja svabody i vienhierski premjer Viktar Orban. Jon taksama chvaliŭ maršała Antanesku — rumynskaha sajuźnika Hitlera.

Džardžesku nabraŭ nie tak i šmat hałasoŭ, ale vyjšaŭ na pieršaje miesca tamu, što šmatlikija prajeŭrapiejskija kandydaty ad mejnstrymavych partyj supierničali miž saboj. 

Libierał Elena Łaskoni i sacyjał-demakrat Marčeł Čałaku nabirajuć pa 19% hałasoŭ. 14% — u nacyjanalista Džordže Simiona. 9% sabraŭ pravacentryst Nikałaje Ciuke. 5% hałasoŭ u byłoha namieśnika hienieralnaha sakratara NATA Mirčy Džaane i 4% — u kandydata vienhierskaj mienšaści.

Sacyjołahi ličyli harantavanym vychad u druhi tur premjer-ministra Marčeła Čałaku, adnak jon sabraŭ mała hałasoŭ u stalicy, Buchareście, i siarod vybarcaŭ dyjaspary: sacyjał-demakrataŭ vinavaciać u karupcyi.

U vyniku hetaha ź minimalnaj pieravahaj, usiaho kala 2000 hałasoŭ, abo 0,02%, na druhoje miesca vychodzić kandydatka ad pravacentrysckaj, prajeŭrapiejskaj libieralnaj partyi Sajuz vyratavańnia Rumynii Elena Łaskoni. Jak i Džardžesku, jana taksama čałaviek u vialikaj palitycy novy.

52-hadovaja Łaskoni — žurnalistka, u 2020 hodzie stała meram rajcentra Kympułunh u centry krainy.

Cikava, što proźvišča jaje muža — Džardžesku, jak i jaje budučaha supiernika ŭ druhim tury.

U Rumynii rola prezidenta abmiežavanaja. Asnoŭnaja vykanaŭčaja ŭłada naležyć uradu, jaki farmiruje bolšaść u parłamiencie. Prezident, adnak, vyznačaje zamiežnapalityčny kurs. Papiaredni prezident Kłaŭs Jachanis nie mieŭ prava bałatavacca na treci termin.

ZŠA rabili staŭku na Rumyniju, paralelna z Polščaj, jak na punkty apory NATA kala Čornaha i Bałtyjskich moraŭ adpaviedna. Rumyny, jak i palaki, majuć histaryčnyja rachunki z Maskvoju paśla 1939—1940 hadoŭ. Tady Stalin dzialiŭ Jeŭropu z Hitleram, ad Rumynii jon adrezaŭ Biesarabiju i Bukavinu.

Pośpiech Džardžesku pakazvaje, što Maskva zdolnaja pazmahacca za ŭpłyŭ navat u tych krainach, jakija tradycyjna ličylisia antyrasijskimi.

Možna mierkavać, što ŭ druhim tury pieramoža praciŭnik Džardžesku, ale budučyja parłamienckija vybary pryviaduć da pierafarmatavańnia ŭradavaj kaalicyi. 

• 3
• 1
• 1
• 5
• 4
• 4
• 3
• 0