Bieły dom aficyjna pryznaŭ, što dazvoliŭ Ukrainie nanasić udary ŭ hłybiniu Rasii
«Ciapier va ŭkraincaŭ jość mahčymaść vykarystoŭvać ATACMS dla samaabarony», — skazaŭ Džon Kirbi.
Administracyja prezidenta ZŠA ŭpieršyniu aficyjna paćvierdziła, što źniała abmiežavańni dla Ukrainy ŭ vykarystańni amierykanskich balistyčnych rakiet ATACMS dla udaraŭ pa terytoryi Rasii. Kaardynatar pa stratehičnych kamunikacyjach Biełaha doma Džon Kirbi zajaviŭ pra heta na bryfinhu ŭ paniadziełak, piša Rasijskaja słužba Radyjo Svaboda.
«Ciapier u ich [ukraincaŭ. — RS] jość mahčymaść vykarystoŭvać ATACMS dla samaabarony ŭ vypadku nieadkładnaj nieabchodnaści. I ciapier heta adbyvajecca pobač z Kurskam i Kurskaj vobłaściu», — skazaŭ jon.
Naviny pra toje, što prezident ZŠA Džo Bajden źniaŭ zabaronu Ukrainie nanosić udary rakietami bolšaj dalnaści pa celach na rasijskaj terytoryi, źjavilisia ŭ ŚMI 17 listapada — pra heta napisali The New York Times i Reuters sa spasyłkaj na krynicy ŭ ŭradzie. Adnak publičnaha paćviardžeńnia hetaj infarmacyi raniej nie było.
Minabarony Rasii paviedamiła ab naniasieńni USU ŭ noč na 19 listapada ŭdaru pa abjekcie ŭ Branskaj vobłaści šaściu ATACMS. Maskva zajaviła, što budzie razhladać dazvoł Biełaha doma jak pramy kanflikt z krainami Zachadu.
20 listapada Ukraina, vierahodna, prymianiła rakiety Storm Shadow dla ŭdaru pa sanatoryi Administracyi prezidenta ŭ Marjinym Kurskaj vobłaści. Tady, pavodle roznych krynic, byŭ paražany kamandny bunkier, jaki znachodziŭsia pad sanatoryjem.
Biez uchvaleńnia Vašynhtona i pastaŭlenych amierykancami danych Ukraina nie mahła b atakavać celi ŭ Rasii francuzskimi i brytanskimi kryłatymi rakietami. Łondan i Paryž paśladoŭna vystupajuć za prava Ukrainy atakavać lubyja vajennyja celi ŭ Rasii ŭ łohicy samaabarony.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary