«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ
Praz dva miesiacy, 26 studzienia, u Biełarusi projduć «prezidenckija vybary». Biełarusy ŭnutry krainy raskazali «Salidarnaści», jaki ŭ ich nastroj, što źmianiłasia ŭ ich haradach u suviazi z hetaj kampanijaj i što ich chvaluje ciapier bolš za ŭsio. Usie imiony surazmoŭcaŭ źmienienyja.
Ściapan, 43 hady. «Usie razumiejuć, što heta vybary biez vybaru»
«Apošnim časam u Breście raściahnuli baniery i płakaty z rekłamaj «vybaraŭ». Ale nie skažu, što šmat. U Minsku, jak raskazvajuć siabry, i ŭ doždž, i ŭ choład źbirajuć podpisy za Łukašenku.
Usie razumiejuć, što heta vybary biez vybaru. Asabista ja hałasavać nie pajdu. Budzie tolki adznaka, što naviedaŭ, a vynik — i tak jasny. Dyk navošta ŭdzielničać u hetym i marnavać svoj čas?»
Surazmoŭca adznačaje, što ludzi ŭ jahonym atačeńni abmiarkoŭvajuć temu palityki tolki z pravieranymi abo blizkimi ludźmi:
«Usie imknucca paźbiahać hetaha, bo nie viedajuć, jakim bokam vylezie. Da nas niadaŭna pryjšoŭ novy kaleha i my taksama pry im pieršy čas ničoha takoha nie abmiarkoŭvali. Praŭda, niejak u pierapynku ad pracy mnie trapiłasia videa z Hajdukievičam, dzie toj kaža, što ŭsie, chto źjechaŭ, pavinny viarnucca, adsiedzieć, a tam užo buduć raźbiracca, byŭ čałaviek da niečaha datyčny ci nie. I majho novaha kalehu takaja zajava Hajdukieviča aburyła, my abmianialisia dumkami».
Z apošnich navin, adznačaje Ściapan, jaho taksama aburyła prapanova Łukašenki ab pryznačeńni kiraŭnikoŭ pryvatnych kampanij rajvykankamam.
«Pračytaŭ mierkavańnie, što, mahčyma, takim čynam chočuć prystrojvać na pracu byłych siłavikoŭ. Jany vychodziać na piensiju ŭ 45 hadoŭ. Viedaju, što navat tyja, chto pajšoŭ da 2020 hoda, nie mahli znajści novuju pracu. Tak što vielmi łahičnaje mierkavańnie».
Što ciapier chvaluje ludziej? Mužčyna nazyvaje niekalki tem. Pa-pieršaje, u Breście heta składanaści z atrymańniem vizy (a ŭ mnohich žycharoŭ horada dzieci žyvuć u Polščy). Pa-druhoje, zarobki, padaražańnie dalara i ceny ŭ kramach.
«Bulba kaštuje 2 rubli, i jana amal usia hniłaja. Pryčym tak u mnohich kramach. Heta žach. U astatnim na pryłaŭkach usiaho chapaje. Praŭda, u inšych śfierach sankcyi prykmietnyja. Dapuścim, nam pa pracy patrebnyja niejkija amierykanskija zapčastki. U Biełarusi ich niama. Ale jość u Rasii. Choć, zdavałasia b, tam taksama sankcyi».
Arciom, 24 hady. «Usie razumiejuć: Łukašenka ničoha nie moža zrabić, kab pieraharnuć staronku»
«Ni ŭ kaho, z kim ja maju znosiny, niama sumnievaŭ, chto «pieramoža» na «vybarach». Ale ŭ ludziej uźnikaje pytańnie — navošta tak nachabna?»
U mnohich dziaržstrukturach prymušajuć stavić podpisy za Łukašenku, heta mnohich kranaje, i tema palityki aktyŭna padymajecca ŭ razmovach.
Sam Arciom taksama pracuje na dziaržpradpryjemstvie. Jon raskazvaje, što raniej zboram podpisaŭ za vyłučeńnie ŭ kandydaty zajmaŭsia adździeł kadraŭ, pry hetym stavić podpisy nichto nie prymušaŭ. Zaraz ža heta daručyli kiraŭnictvu, i, kali chtości stavić svoj podpis nie choča, na jaho mohuć nakryčać abo prystrašyć zvalnieńniem.
Hałasavać 26 studzienia chłopiec nie źbirajecca.
«Ja nie chaču iści, heta prosta prafanacyja. Ale nie viedaju, čaho čakać. Nie ździŭlusia, kali nas pad ručku paviaduć na daterminovaje hałasavańnie, — kaža surazmoŭca «Salidarnaści». — Ale, darečy, navat niahledziačy na prymus, usie razumiejuć: Łukašenka ničoha nie moža zrabić, kab pieraharnuć staronku. Navat jaho prychilniki zrazumieli, što žyć jak raniej užo nie atrymajecca — inšyja časy.
Pry hetym ja b adznačyŭ, što ciapier mnohija ludzi ŭ Biełarusi bolš dumajuć nie pra toje, što Łukašenka «pieramoža», a pra toje, što ekanamičny stan krainy paharšajecca. Kali asobnyja biełaruskija vytvorčaści pačali pracavać na rasijski VPK, u mnohich rabočych zarobki mocna vyraśli. Tyja, chto atrymlivaŭ 500$, ciapier atrymlivajuć 1000$. Ale kali vajna skončycca, takich hrošaj u ich nie budzie.
Možna skazać, što prosta ciapier finansavaje stanovišča niekatorych rabočych palepšyłasia. Ale kali kazać, naprykład, pra budaŭnictva kvatery, to navat z dobrym zarobkam heta nierealna. My bačym, što razhaniajecca inflacyja, što raście dalar. I heta chvaluje ŭsich. U tym ža «Hrošyku» padymajucca ceny — dzieści na 10-20 kapiejek, a dzieści i na rubiel.
U nastupnym hodzie mnie spoŭnicca 25 hadoŭ, i ja pačynaju zadumvacca pra siamju. Ale ciapier takija niestabilnyja časy, što mnie prosta strašna. Nie vyklučaju, što mnie daviadziecca źjechać u Jeŭropu, kab być svabodnym i narmalna zarablać».
Anhielina, 24 hady. «Narod zhurtavaŭsia ŭ 2020-m, a ciapier usie maŭčać i bajacca»
«Nijakaj asablivaj «pieradvybarčaj» atmaśfiery ŭ Minsku ja nie adčuvaju. Kruciać rekłamu «vybaraŭ», u praduktovych kramach źbirajuć podpisy za kandydataŭ. Nijakich čakańniaŭ ad hetych vybaraŭ u mianie taksama niama. Razumieju, što heta prosta farmalnaść i falš — usio zastaniecca, jak raniej. Ja navat nie baču sensu ŭ ich udzielničać. Choć, ščyra kažučy, bajusia, što praz heta da mianie mohuć uźniknuć pytańni. Dumaju navat uziać balničny na hety pieryjad».
Dziaŭčyna taksama adznačaje, što nie abmiarkoŭvaje temu palityki sa svaim asiarodździem:
«Niadaŭna padumała: jak ža zhurtavaŭsia narod u 2020 hodzie, a ciapier usie maŭčać, bajacca niešta skazać».
Asablivych źmienaŭ u stalicy za apošni čas Anhielina nie zaŭvažyła. Ale adznačaje, što atrymać vizu ŭ Jeŭropu ciapier vielmi składana, i heta jaje chvaluje.
Karyna, 33 hady. «Pavinien być maksimalna «čysty» čałaviek — heta značyć ni jon sam, ni jaho svajaki, nie pavinny byli pryciahvacca za ŭdzieł u mitynhach»
«Ciapier mnohija biełarusy ŭsio bolš dumajuć pra studzień. U kaho zakančvajucca kantrakty ŭ hety pieryjad, razvažajuć, ci praciahvać ich, ci biaśpiečna ciapier zvalniacca. Tyja, chto nie pracuje, zadumvajucca, ci varta ciapier kudyści ŭładkoŭvacca.
Samaje śmiešnaje — heta kali ŭ praduktovaj kramie staić pałatka z hučnaj muzykaj, kab pryciahnuć uvahu da zboru podpisaŭ za Łukašenku, ale tam zaŭsiody pusta.
Vidać, što dziaržava ŭzmocniena rychtujecca da «vybaraŭ». Mnohija maje znajomyja ciapier ekstranna rełakavalisia, tamu što siłaviki znoŭ «pajšli» pa aktyvistach i tych, chto zatrymlivaŭsia ŭ 2020-m.
Viedajecie, biełarusy ciapier radujucca drobiaziam. Naprykład, pieršamu śniehu. Ale jak ža sumna, kali ja baču, što ŭ sacsietkach usio bolš pakazvajuć pieršy śnieh u Varšavie, a nie ŭ Minsku».
Biełaruska raskazvaje, što joj viadoma, jak adbirajuć ludziej u kamisiju na vybarčyja ŭčastki. Pavodle jaje słoŭ, heta pavinien być maksimalna «čysty» čałaviek — heta značyć ni jon sam, ni jaho svajaki nie pavinny byli pryciahvacca za ŭdzieł u mitynhach.
Taksama Karyna adznačaje, što mnohija jaje znajomyja, dy i jana sama, uzmocniena kłapociacca pra svaju biaśpieku i pastajanna čyściać telefon.
«Usie razumiejuć, chto «pieramoža», i razumiejuć, što mitynhaŭ nie budzie. Sama ja jašče nie vyrašyła, ci iści mnie hałasavać. U minuły raz, kali pravodzili refierendum, na maim učastku pastajanna chadzili kala kabinak, kab nie daj boh ty ničoha nie sfatahrafavaŭ. Jość adčuvańnie, što hołas pojdzie nie tudy, tak što škada na heta marnavać čas».
Što jašče ciapier chvaluje ludziej unutry krainy? Surazmoŭnica «Salidarnaści» adznačaje, što ŭłady stvarajuć usio bolš składanaściaŭ dla ludziej: pavialičvajuć bazavuju vieličyniu, abmiažoŭvajuć koła ludziej, jakija mohuć ličycca samazaniatymi. I heta daloka nie poŭny śpis.
Prahnoz Šrajbmana: paśla vybaraŭ represii źmienšacca
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary
«U Žodzinie podpisy vyprošvajuć navat u carkvie». Biełarusy raskazali, ci padpisvajucca jany za Łukašenku
Hanna Kanapackaja patłumačyła, čamu nie vydalaje zdymki z BČB-simvolikaj z sacsietak. Vy budziecie śmiajacca
Hrodzienskaja hazieta źniała kryndžovuju rekłamu i paraŭnała vybary z hvałtoŭnym šlubam VIDEA
Kamientary
A kali jašče za "ekstrymizm" kašmaryć nie buduć, to 99,9% zadavolenyja buduć.
I tut darečy niama ničoha dziŭnaha, bo ludzi stamilisia ad represij. Za 4,5 hady režym svaimi dziejańniami narod užo tak zapałochaŭ, što moža jašče hadoŭ 10 ničoha nie rabić, a narod usio adno suprać ničoha nie skaža.
Žudasnaja horkaja praŭda