Viarchoŭny dypłamat ES: Rasija datyčnaja da aktaŭ dyviersij u Jeŭropie
Viarchoŭny jeŭradypłamat, eks-premjer Estonii Kaja Kałas zaklikała budučaje kiraŭnictva ZŠA dziejničać bolš stroha ŭ adnosinach da Maskvy.
Sprabavańni dyviersij u Jeŭropie za apošnija miesiacy — heta nie asobnyja vypadki, a častka sistemy kaardynavanych dziejańniaŭ pa destabilizacyi infrastruktury ES. Da hetych incydentaŭ maje dačynieńnie RF, zajaviła viarchoŭny pradstaŭnik ES pa zamiežnych spravach i palitycy biaśpieki Kaja Kałas u intervju haziecie Welt, apublikavanym u paniadziełak, piša Deutsche Welle.
Kolkaść dyviersij u Jeŭropie pavialičyłasia z taho času, jak Rasija pačała poŭnamaštabnaje ŭvarvańnie va Ukrainu, adznačyła viarchoŭny jeŭradypłamat. U jakaści prykładu Kałas pryviała paškodžańnie padvodnaha kabiela Estlink 2 u Bałtyjskim mory, u datyčnaści da jakoha finskija śledčyja padazrajuć tankier Eagle S z tak zvanaha rasijskaha «cieniavoha fłotu».
Na hetym fonie Kałas abviaściła pra ŭviadzieńni bolš strohich mier u dačynieńni da rasijskich karabloŭ.
Jana adznačyła, što karabli «cieniavoha fłotu» RF, jakija parušajuć rehłamienty, taksama niasuć adkaznaść za zabrudžvańnie navakolnaha asiarodździa. Paśla pierachodu ŭłady ŭ ZŠA da kamandy abranaha prezidenta Donalda Trampa Vašynhton pavinien dziejničać «upeŭniena i žorstka» ŭ adnosinach da RF i padtrymlivać Kijeŭ u praciahłym rasijskim uvarvańni va Ukrainu, ličyć Kałas.
«Dapamoha Ukrainie — nie miłaścina, a inviestycyja ŭ biaśpieku ŭsich nas. Kali Złučanyja Štaty buduć ćviorda supraćstajać Rasii, heta praduchilić prablemy z Kitajem. Padtrymka Ukrainy abaronić amierykancaŭ ad budučych kanfliktaŭ», — zajaviła viarchoŭny jeŭradypłamat.
Kałas taksama zhadała ŭ intervju katastrofu pasažyrskaha samalota ŭ Aktau.
U chodzie intervju viarchoŭny jeŭradypłamat taksama zakranuła pytańnie dalejšaha vykarystańnia prybytku ad zamarožanych aktyvaŭ RF dla padtrymki Ukrainy ŭ vajnie i adnaŭleńnia krainy.
«Rasija pavinna zapłacić za naniesienuju joj škodu. Patrabavańnie Kijeva ab kampiensacyi zakonnaje. Nam varta abmierkavać, jak niekatoryja ci ŭsie zamarožanyja aktyvy mohuć być vykarystanyja dla ŭzmacnieńnia Ukrainy», — skazała Kałas.
Bližejšym časam buduć vyzvaleny bolš za 150 palitźniavolenych39
Kamientary