Rasijskaja «Mieduza» zapuściła rekłamu, u jakoj vykarystała videa z paciarpiełymi ad vajny ŭkraincami. Vybuchnuŭ skandał
Rasijskaje vydańnie «Mieduza», štab-kvatera jakoha znachodzicca ŭ Ryzie, zapuściła rekłamnuju kampaniju, u jakoj vykarystoŭvajucca realnyja kadry vajny va Ukrainie. Rekłamu dla vydańnia biaspłatna raspracavała niamieckaje kreatyŭnaje ahienctva Lure. Ale jaje źmiest vyklikaŭ abureńnie ŭ tym liku i na palityčnym uzroŭni, piša «Ukrainskaja praŭda».
Jak piša vydańnie «Dietiektor Miedia», spačatku pra rekłamnuju kampaniju «Mieduzy» paviedamiła siabroŭka ŭkrainskaj hramadskaj arhanizacyi «Vičie Bierlin» Viktoryja Fiešak. Pa jaje słovach, jana ŭbačyła hety rolik u Bierlinskim kinateatry pierad sieansam. Videa ŭtrymlivała šakavalnyja kadry vajny va Ukrainie, u pryvatnaści momant pachavańnia žonki i dačok Jarasłava Bazyleviča, jaki straciŭ siamju praz rasijskuju ataku na Lvoŭ.
U «Vičie Bierlin» rezka asudzili takuju rekłamu, abvinavaciŭšy ahienctva ŭ manipulacyjach i sprobie vystavić rasijan achviarami vajny. Tam taksama zaklikali spynić pakaz hetaj rekłamy ŭ jeŭrapiejskich haradach.
MZS Ukrainy vystupiŭ suprać hetaj rekłamy ŭ paście ŭ sacsietcy X:
«Asablivuju «ŭznaharodu» za markietynhavy cynizm i kryvadušnaść varta addać ahienctvu Lure ź Bierlina. Jany pakazali ŭkraincaŭ, jakija stracili siemji i damy, u rekłamnym roliku dla rasijskaha vydańnia «Mieduza».
U svaju čarhu pres-sakratar ministerstva Hieorhij Cichi zaklikaŭ vydańnie «nieadkładna vydalić uvieś rekłamny kantent, jaki ekspłuatuje ŭkrainskija pakuty, vyklikanyja rasijskim teroram», z usich miedyjapłatformaŭ, dzie jon źjaviŭsia.
Da krytyki «Mieduza» prysłuchałasia: staronka rekłamnaj kampanii, na jakoj było raźmieščana videa z ukraincami, pierastała zahružacca.
Kamientary
Nu niemieckim dizajnieram i pročim budiet nauka: v dalniejšiem budut tŝatielno filtrovať matieriał, podsunutyj russkimi, dažie ruskimi "iz Rihi".