«Nam nie patrebnyja pasiaredniki, nam patrebnyja sajuźniki». Ukrainski dypłamat rezka vykazaŭsia ab vynikach Miunchienskaj kanfierencyi
«My nie śpim bolš za tysiaču dzion», — zajaviŭ pasoł Ukrainy ŭ Hiermanii Alaksiej Makiejeŭ. «Kožnuju noč hučać sireny pavietranaj tryvohi. Maja maci piša mnie: koła vakoł našaha doma ściskajecca — tut udar, tam udar, tam dron», piša Bild.
Makiejeŭ emacyjna zaŭvažyŭ: «słovazłučeńnie «tryvožny sihnał» stała samym nienavisnym na Miunchienskaj kanfierencyi. Hospadzie, kamu jašče patrebien tryvožny sihnał, kali ciabie tysiaču dzion zapar budziać sireny?».
Pasoł vyrazna paznačyŭ ukrainskuju pazicyju: «My viedajem pa svaim vopycie: z Rasijaj možna vieści pieramovy tolki z pazicyi siły. Nam nie patrebnyja pasiaredniki, nam patrebnyja sajuźniki. Jak maha bolš sajuźnikaŭ».
«Jeŭropie patrebnyja palityki, jakija zojmuć žorstkuju pazicyju i sumlenna skažuć ludziam, u tym liku padčas vybarčaj kampanii: bieź biaśpieki nie budzie ničoha. Jak Rasija pieravodzić ekanomiku na vajskovyja rejki, tak i Ukraina robić toje ž samaje. I tut havorka idzie daloka nie pra 35-hadzinny pracoŭny tydzień», — zajaviŭ Makiejeŭ.
Vajskovy ekśpiert Karła Masała taksama vykazaŭ zaniepakojenaść pavodle vynikaŭ kanfierencyi: «My znoŭ reahujem u Jeŭropie adnymi tolki łozunhami: «tryvožny sihnał», «heta čas Jeŭropy». Kali ŭsio praciahniecca tak, jak ciapier raźvivajecca, to pierad Jeŭropaj paŭstanie realnaja pahroza novaj vajny! I heta adbudziecca zusim chutka».
Ekśpiert padkreśliŭ: «Pucin nie spynicca. Ci budzie heta tyčycca pakinutaj častki Ukrainy abo pravierki NATO — my nie viedajem, ale Rasija rychtujecca da hetaha dva-try hady. Ciapier naša zadača — pakłapacicca pra ŭłasnuju biaśpieku. Bolš nichto hetaha za nas nie zrobić».
Člen Chryścijanska-demakratyčnaha sajuza, śpiecyjalist pa zamiežnaj palitycy Norbiert Rethien taksama daŭ krytyčnuju acenku vynikaŭ Miunchienskaj kanfierencyi pa biaśpiecy i novych sihnałaŭ z Vašynhtona z nahody vajny va Ukrainie.
«Ciapier situacyja takaja, što ŭ nas bolš niama vybaru. My ŭsio jašče dumali, što možam ihnaravać toje, što adbyvajecca, možam uciačy. Ciapier my sami staim na krai prorvy», — zajaviŭ jon.
Daśviedčany palityk padkreśliŭ: «My pavinny pryniać, što ciapier mienavita jeŭrapiejcy niasuć adkaznaść za biaśpieku Ukrainy, i heta, u pieršuju čarhu, pytańnie našaj ułasnaj biaśpieki. Treba rabić toje, što treba. Heta zapatrabuje vielizarnych finansavych vydatkaŭ, ale kali my nie zrobim hetaha ciapier, paźniej cana budzie jašče vyšejšaj».
Rethien adznačyŭ: «Heta naša zadača. Kali my jaje nie voźmiem na siabie, my ŭpadziem u prorvu. Takaja novaja realnaść».
Kamientary
U SŠA, v sojuźnikach, Rośsija i Kitaj, putin i si......