Etałonnaha jabaćku pryznali nieadekvatnym i źbirajucca lačyć

Historyja Siarhieja Zasłaŭskaha (raniejšaje proźvišča Aŭtuchovič) mahła adbycca tolki ŭ Biełarusi i tolki paśla 2020 hoda. Šmatrazova sudzimy recydyvist z machlarskimi talentami prysiahnuŭ u lubovi Alaksandru Łukašenku — i heta stvaryła pierad im navat nie karjernuju leśvicu, a paŭnavartasny karjerny lift.

@nashaniva Etałonnaha jabaćku pryznali nieadekvatnym i źbirajucca lačyć #politika #novosti #biełaruś ♬ Funny lazy donkey (hilarious song)(937200) - LEOPARD

Recydyvist da 2020 hoda

U anamniezie Siarhieja Aŭtuchoviča da 2020 hoda — pad 20 kryminalnych złačynstvaŭ, ź jakich 15 razbojaŭ.

Jon adbiraŭ u inšych hrošy prosta na prypynkach, załaziŭ u čužyja kvatery. Pradstaŭlaŭsia rabotnikam pravaachoŭnych orhanaŭ, traplaŭ u kamiercyjnyja kijoski i pahrozami i hvałtam adbiraŭ u pradprymalnikaŭ tavar. Adnojčy navat umudryŭsia «šlacham padmanu» adabrać u paciarpiełaha hrošy prosta ŭ pamiaškańni Frunzienskaha RUUS Minska!

Jaho pryciahvali da kryminalnaj adkaznaści, ale pa vynikach psichijatryčnych ekśpiertyz vyzvalali, adpraŭlajučy pad uzmocnienaje nazirańnie.

Hramadski dziejač paśla 2020 hoda

Adnak Aŭtuchovič nie byŭ całkam nieadekvatnym. Paśla 2020 hoda jon zrazumieŭ, adkul i kudy dźmie viecier.

Načapiŭ majorskija pahony, paviesiŭ na kiciel znački ab «samaaddanaj słužbie», skančeńni Akademii MUS i słužbie ŭ v/č 3214 — i pajšoŭ u ludzi.

Nasamreč ni ŭ vojsku, ni ŭ orhanach unutranych spraŭ jon nikoli nie słužyŭ, adnak chto b ryzyknuŭ pastavić pad sumnieŭ słovy etałonnaha jabaćki ŭ formie siłavika?

Pavialičyć

Zasłaŭski (a ciapier u jaho było mienavita takoje proźvišča) hastralavaŭ pa vajennych čaściach i adździełach milicyi z majstar-kłasami dla siłavikoŭ i kursantaŭ i pa škołach z «patryjatyčnymi» lekcyjami dla dziaciej.

Kožny jahony ruch padrabiazna aśviatlaŭsia ŭ dziaržaŭnych miedyja: STB, «Minsk-Naviny», «Vajar».

Jon pravodziŭ pryzyŭnikoŭ u vojska, cisnuŭ ruki milicejskim hienierałam i łukašenkaŭskim ministram, abdymaŭsia z kiraŭnikom AMAPu Bałabam. Zasłaŭski sabraŭ ceły ikanastas padziak i hramat ad siłavych struktur Biełarusi. Jon pravodziŭ sieminary dla rabotnikaŭ MUS i Minabarony pa ŭsioj krainie.

Zasłaŭski stvaryŭ «patryjatyčna-spartovy ruch «Za mocnuju Biełaruś» i staŭ namieśnikam Dźmitryja Paŭličenki ŭ Asacyjacyi vieteranaŭ śpiecnaza «Čiesť». Zadumaŭsia i pra palityčnuju karjeru, ustupiŭšy ŭ Libieralna-demakratyčnuju partyju Aleha Hajdukieviča — zrešty, kudy ž jašče iści recydyvistu?

Pavialičyć

Čytajcie padrabiaznaści: Jabaćka lejtenanta Šmita. Šmatrazova sudzimy recydyvist vydaŭ siabie za vieterana śpiecnaza i daros da ministerskaha ŭzroŭniu

Prank, jaki vyjšaŭ z-pad kantrolu

Biada padkrałasia da Zasłaŭskaha-Aŭtuchoviča ŭ 2023 hodzie. Tut syšłosia dva faktary. Pa-pieršaje, jon vypadkova trapiŭ na Akreścina za repost niejkaha «ekstremisckaha» materyjału. Pa-druhoje, na hetyja 15 sutak dla etałonnaha jabaćki źviarnuła ŭvahu «Naša Niva» i raskazała sapraŭdnuju bijahrafiju hetaha piersanaža.

Tolki paśla hetaha siłaviki schapilisia za hałavu i zrazumieli, chto ŭciorsia da ich u davier. Niejki čas pa iniercyi jaho jašče zaprašali na mierapryjemstvy, ale patrochi karjera Zasłaŭskaha skončyłasia — ni siužetaŭ u dziaržaŭnym telebačańni, ni abdymkaŭ ź ministram.

Paśla hetaha jon jašče pasprabavaŭ skaryć Rasiju, ale atrymałasia nie tak paśpiachova, jak u Biełarusi.

Letaś «Našaj Nivie» stała viadoma, što Zasłaŭskaha aryštavali. Doŭhi čas jon znachodziŭsia pad śledstvam, i tolki ciapier sprava dajšła da suda. Praces pačniecca 4 sakavika 2025 hoda.

Jamu inkryminujucca čatyry kryminalnyja artykuły:

• 209 č. 2 — machlarstva;
• 209 č. 3 — machlarstva;
• 382 — samavolnaje prysvajeńnie zvańnia ci ŭłady słužbovaj asoby;
• 431 č. 2 — dača chabaru.

U raskładzie Kastryčnickaha suda Minska paznačana, što Zasłaŭski — asoba, jakaja ździejśniła hramadska niebiaśpiečnaje dziejańnie. Kali pierakłaści ź jurydyčnaj movy na čałaviečuju, pa vynikach ekśpiertyzy jon pryznany nieadekvatnym. Značyć Zasłaŭskaha čakaje nie vyznačanaja kolkaść hadoŭ u kałonii, a prymusovaje lačeńnie na niavyznačany termin.

• 4
• 0
• 51
• 7
• 0
• 0
• 1
• 0