U Minsk ź lekcyjaj jedzie skandalny «huru adnosin» — padčas adnaho z vystupaŭ jon pabiŭ žančynu jaje ž sumkaj
Błohier Saćja Das nie strymlivajecca ŭ vyrazach i pavodzinach. Ceny na jaho lekcyju niemałyja.
Pačniom z adkazu na spradviečnaje pytańnie čytačoŭ «Našaj Nivy»: «Chto heta?!». Šalona papularny ŭ sacyjalnych sietkach błohier Saćja Das nasamreč nosić imia Siarhiej Jakaŭleŭ (ale jamu nie padabajecca, kali niechta da jaho źviartajecca tak).
Jon naradziŭsia va Ukrainie (u Dniapry). Paśla škoły pastupiŭ u technałahičny technikum, vybraŭšy śpiecyjalnaść technołaha hramadskaha charčavańnia. Potym była armija. Paśla dembielu mužčyna pračytaŭ knihu «Bchahavadhita» i vyrašyŭ stać kryšnaitam. Ad adnaho z nastaŭnikaŭ Siarhiej i atrymaŭ toje imia, jakoje vykarystoŭvaje ŭ jakaści psieŭdanima, — Saćja Das.
A paśla 30 hadoŭ nastaŭ zorny čas mužčyny. Jon vyrašyŭ, što moža vučyć ludziej, jak pravilna treba žyć: i jak adnosiny budavać, i jak dziaciej hadavać.
U rekłamie Saćju Dasa časta nazyvajuć psichołaham. Ale, nakolki viadoma, jon nie maje adpaviednaha dypłomu. Na jaho sajcie paznačana, što mužčyna — śpiecyjalist pa siamiejnych adnosinach, papularny lektar, fiłosaf i piśmieńnik.
Saćja Das asabliva nie strymlivajecca ŭ vyrazach, ale jaho demanstratyŭnaja nachabnaść pryvablivaje miljony prychilnikaŭ. Na staronku «huru adnosin» u instahramie padpisanyja 2,2 miljona čałaviek, na supołku va «Ukantakcie» — kala 1,5 miljona.
Darečy, siarod fanataŭ «huru adnosin» chapaje i prychilnikaŭ Łukašenki. Na staronku Saćji Dasa ŭ instahramie padpisanyja artysty Alona Łanskaja, Hanna Trubiackaja i Ivan Zdaniuk, žonka prapahandysta Ihara Tura, a taksama błohierka-jabaćka Julija Chomič.
Mabyć, najbolšuju słavu Saćju Dasu prynios vystup u rasijskim Noŭharadzie ŭ 2023 hodzie. Tady jon udaryŭ pa hałavie žančynu, jakaja vyrašyła spračacca ź lektaram padčas vystupu, jaje ž sumačkaj.
Niadaŭna «Kvitki.baj» pačali rekłamavać lekcyju «ekśpierta pa niasumnaj siamiejnaj psichałohii». U Minsk Saćja pryjeździe ŭ pačatku krasavika — choča sabrać Falcon Club Arena. Kvitki kaštujuć ad 75 da 247 rubloŭ, ale pakul što asablivaha ažyjatažu nie nazirajecca — volnych miescaŭ u zale dastatkova.
Kamientary