Chto takija «bežavyja mamy», jakija razdražniajuć usich

Moda na «bežavaje maciarynstva» źjaviłasia ŭ 2022 hodzie. Mienavita tady Kim Kardašjan praviała dla žurnalistaŭ Vogue ekskursiju pa svaim domie. Ludzi pa ŭsim śviecie pabačyli, jak žyvie zorka.

Kim (miž inšym, šmatdzietnaja maci) u bežavaj sukiency siadzieła ŭ bežavym pakoi na bežavaj kanapie i raskazvała, jakoje vialikaje značeńnie dla jaje maje minimalizm doma — z ulikam taho, jaki chaos panuje na płaniecie. U Kim navat baskietbolnaja placoŭka ŭ vielmi strymanych kolerach! Miarkujučy pa videa, i mašyny ŭ aŭtaparku zorki ŭsie vyklučna bežavyja.

Pavialičyć

Videa na YouTube nabrała 12 miljonaŭ prahladaŭ — a tysiačy (kali nie dziasiatki tysiač) žančyn u samych roznych krainach zachacieli, kab ich dom byŭ u takoj samaj estetycy.

Dzieci taksama stali častkaj hetaj instahramnaj karcinki. The Guardian tady zaŭvažała, što na handlovaj anłajn-płatformie Etsy ŭ 2022 hodzie ažno na 67% uzrasła kolkaść pošukavych zapytaŭ na bežavaje dziciačaje adzieńnie.

Siarod mamfluensieraŭ (tak nazyvajuć błohierak, jakija robiać pieravažna kantent, pryśviečany maciarynstvu) źjaviłasia šmat tych samych «bežavych mam». Jany robiać bežavyja dziciačyja pakoi, nabyvajuć cacki (pieravažna draŭlanyja ci z tkaniny) spakojnych koleraŭ, a taksama radujucca, što ich dzieci na vulicy samyja stylovyja.

Prychilniki «bežavaha maciarynstva» śćviardžajuć, što takoje asiarodździe źmianšaje praźmiernuju vizualnuju stymulacyju dla dziaciej i spryjaje spakoju. Kažuć i pra ekałahičnaść idei: bo kali ŭsie rečy ŭ harderobie dziciaci niejtralnych koleraŭ, ich možna vykarystoŭvać i dla nastupnych dziaciej niezaležna ad ich połu. Aproč taho, tyja samyja bežavyja cacki zvyčajna robiacca nie z płastyka, a z dreva.

Krytyki «bežavych mam» u pieršuju čarhu havorać ab tym, što dla maleńkaha dziciaci vielmi važna bačyć vakoł siabie roznyja kolery. Roznyja adcieńni dapamahajuć im aceńvać i razumieć mnostva abjektaŭ, ź jakimi jany znajomiacca ŭ pieršyja miesiacy i hady žyćcia. A, naprykład, stylovyja bežavyja mabili nad łožkami niemaŭlat u pryncypie biessensoŭna źmiaščać, tamu što dzieci fizična nie mohuć bačyć blakłyja cacki.

Časam «bežavyja mamy» dachodziać da niejkich vielmi dziŭnych rašeńniaŭ. Naprykład, u 2023 hodzie sacsietki abmiarkoŭvali anhłamoŭnuju tyktokierku Nećci. Jana nabyła dla svajoj maleńkaj dački płastykavuju jalinku jarkaha zialonaha koleru. Šary dla ŭpryhožvańnia taksama byli vielmi jarkimi, a vierchavina-zorka tradycyjna załatoj.

Błohierka vyrašyła, što takoje dreva nie pasuje jaje haścioŭni. Tamu pierafarbavała ŭsio, kab było bolš estetyčna: jalinka stała pryhłušanaha zialonaha koleru, šary — karyčnievymi i bežavymi, zorka šeraj. Na žančynu abrynułasia chvala krytyki praz heta.

Pavialičyć

Darečy, siarod biełarusak «bežavyja mamy» taksama jość. I ździŭlać jany taksama ŭmiejuć.

Adna ź biełaruskich błohierak paskardziłasia, što jaje maleńkaj dačce padaryli jarkuju žoŭtuju mašynku. Dziaŭčynka pasłuchmiana vykinuła novuju cacku ŭ śmietnicu.

 — Ja chutka joj rastłumačyła, što z takimi jarkimi cackami hulać nielha. Jana ŭsio zrazumieła i sieła hulać u bežavy sortar.

Rolik nabraŭ 1,2 miljona prahladaŭ.

Jašče adna biełaruskaja mama-błohierka pakazała svaju dačku ŭ bežava-karyčnievym adzieńni i paraiła niezadavolenym «bežavymi mamami» pačytać u Vikipiedyi značeńnie słova hust.

Amal paŭmiljona prahladaŭ sabraŭ rolik mamy-tyktokierki, jakaja zapisała zvarot da chejtaraŭ.

— Ja taksama lublu naturalnyja adcieńni, apranaju siabie i dzicia ŭ takija kolery. Ale heta nie pieraškadžaje mnie kuplać roznakalarovyja cacki i niekatoryja rečy ŭ jarkich kolerach. Prosta pamiatajcie, što pryhožaja karcinka ŭ sacyjalnych sietkach — heta ŭsiaho tolki 5% žyćcia čałavieka.

Biełaruski biznes tym časam pačaŭ vykarystoŭvać idei «bežavaha maciarynstva» ŭ rekłamie. Tak, adzin ź minskich prakataŭ cacak zrabiŭ dla sacsietak rolik ź dziećmi ŭ bežavym adzieńni, jakija siadziać u bežavym interjery. Hołas za kadram zaklikaje arandavać «vizualnyja razdražnialniki» (kalarovyja cacki).

«Naša Niva» spytała biełaruskaha psichołaha (jaho imia nie pryvodzicca ŭ metach biaśpieki), što jon dumaje nakont «bežavaha maciarynstva».

— «Bežavaja mama» — vielmi cikavy fienomien u psichałohii. Bežavy koler uvohule ličycca abarončym, — adznačaje ekśpiert. — Heta śviedčyć pra toje, što čałaviek, jaki vybiraje minimalizm i taki koler dla svajho žyćcia, znachodzicca ŭ stanie niejkaj tryvohi abo nieŭrozu. Naradžeńnie dziciaci samo pa sabie źjaŭlajecca nieŭratyčnym epizodam u žyćci žančyny, źviazanym ź pieražyvańniami i tryvohaj. Maładaja maci nie moža kantralavać śviet vakoł siabie, tamu moža sprabavać kantralavać chacia b svaju prastoru, ustaloŭvajučy zrazumiełyja i prostyja praviły.

Druhoje, ab čym moža śviedčyć «bežavaje maciarynstva», — heta zaležnaść čałavieka ad čužoha mierkavańnia. Dla takoj mamy vielmi važna, što pra jaje kažuć inšyja, i jana imkniecca prytrymlivacca niejkich štučnych standartaŭ.

 — Možna vykazać zdahadku, što ŭ «bežavaj mamy» nizkaja samaacenka i žadańnie kampiensavać unutranyja pieražyvańni. I mienavita tamu jana pierajmaje čužyja standarty estetyki i sprabuje ich naviazać inšym. Pahladzicie, kolki ŭ internecie rolikaŭ, dzie «bežavaja maci» kaža, što tolki jaje dzicia na placoŭcy vyhladaje stylova, ci vyśmiejvaje «niapravilnyja» kalarovyja padarunki svajmu dziciaci ad svajakoŭ.

Ekśpiert ličyć, što možna kazać i pra imaviernyja nastupstvy «bežavaha maciarynstva».

— U dziciaci, jakoje raście ŭ atmaśfiery pierfiekcyjanizmu, mohuć uźniknuć kahnityŭnyja skažeńni. Naprykład, padzieł koleraŭ na «dobryja» i «drennyja», što ŭ budučyni pryviadzie da taho, što čałaviek žyvie ŭ čorna-biełym śviecie. Žorstkija standarty, jakija zasnoŭvajucca na nieabchodnaści być «instahramnym», taksama nie buduć spryjać farmiravańniu zdarovaj asoby. Plus, kali maci zaležyć ad kolkaści łajkaŭ u sacyjalnych sietkach, dzicia, imavierna, taksama budzie zaležać ad čužoha mierkavańnia i mieć prablemy z samaacenkaj. Usio heta razam nie spryjaje raźvićciu narmalnaha emacyjanalnaha intelektu dziciaci.

Ekśpiert raić pryščeplivać dzieciam hust praz raznastajnaść: niachaj budzie bolš koleraŭ, bolš raznastajnaj muzyki ŭ domie, roznaj litaratury — usio heta patrebna, kab sfarmiravać kahnityŭny repiertuar dziciaci.

Ale ci zaŭsiody luboŭ da bežavaha śviedčyć ab niejkich prablemach?

— Kali vy robicie bežavy interjer i nabyvajecie bežavyja rečy prosta tamu, što vam padabajecca, i pry hetym nie chvalujeciesia praz čyrvonuju mašynku ci kalarovuju sukienku ad babuli — značyć, z vami ŭsio ŭ paradku.

• 2
• 0
• 5
• 40
• 1
• 0
• 2
• 0