Jeŭrapiejskija lidary vykazvajuć Zialenskamu padtrymku ŭ jahonaj sprečcy z Trampam
Paśla taho, jak prezident Ukrainy Uładzimir Zialenski i prezident ZŠA Donald Tramp mocna pakanfliktavali ŭ žyvym efiry padčas sustrečy ŭ Biełym domie, i dalejšaja sustreča była admienienaja, lidary jeŭrapiejskich krain stali vykazvać da hetaha svajo staŭleńnie. Jany padtrymlivajuć Zialenskaha.
«Darahi prezident Zialenski, darahija ŭkrainskija siabry, vy nie adny», — napisaŭ u sacsietcy X premjer-ministr Polščy Donald Tusk.
«Rasija — ahresar, Ukraina — kraina, jakaja zaznała ahresiju. My pavinny pavažać tych, chto zmahaŭsia z samaha pačatku», — zajaviŭ u svaju čarhu prezident Francyi Emanuel Makron.
«Sceny ź Biełaha doma šakujuć. Jak možna ŭdaryć nažom u śpinu prezidenta krainy, na jakuju napali? Volnaja Jeŭropa nie zdradzić Ukrainie», — skazaŭ namieśnik lidara Chryścijanska-demakratyčnaha sajuza Hiermanii, partyi budučaha kanclera hetaj krainy Frydrycha Mierca Johan Vadepuł.
Nieŭzabavie vykazaŭsia pa hetym pytańni i sam Frydrych Mierc:
«Darahi Uładzimir Zialenski, my padtrymlivajem Ukrainu i ŭ mirny, i ŭ ciažki čas. My nikoli nie pavinny błytać ahresara i achviaru ŭ hetaj strašnaj vajnie».
«Ukraina, Ispanija z taboj»! — napisaŭ u sacsietkach ispanski premjer-ministr Pedra Sančes.
«Iścina prostaja. Rasija ŭvarvałasia va Ukrainu. Rasija — ahresar. Ukraina abaraniaje svaju svabodu – i našu svabodu. My na baku Ukrainy», — napisała prezidentka Małdovy Majia Sandu.
«Ukraina, ty nikoli nie budzieš iści adna», — vykazaŭsia prezident Litvy Hitanas Naŭsieda.
«Šviecyja na baku Ukrainy. Vy zmahajeciesia nie tolki za svaju svabodu, ale i za svabodu ŭsioj Jeŭropy. Słava Ukrainie!», — vykazaŭsia premjer ministr Šviecyi Ulf Krystersan.
«My na baku Ukrainy i na baku volnaha śvietu!», — zajaviŭ premjer ministr Čechii Pietr Fijała.
«Łatvija padtrymlivaje Ukrainu», — napisała Evika Silina, premjer ministarka Łatvii.
«Ukraina źjaŭlajecca achviaraj rasijskaj ahresii. Jana viadzie vajnu z dapamohaj mnohich siabroŭ i partnioraŭ. My pavinny prykłaści ŭsie namahańni dla dasiahnieńnia spraviadlivaha i tryvałaha śvietu. Dypłamatyja časam źjaŭlajecca mastactvam niemahčymaha ŭ składanych abstavinach. Łatvija padtrymlivaje Ukrainu», — najbolš aściarožna adznačyŭ prezident Łatvii Edhars Rynkievič.
Kiraŭnica Jeŭrakamisii Ursuła van der Lajen napisała svoj post u X na ŭkrainskaj movie:
«Vaša hodnaść ušanoŭvaje advahu ŭkrainskaha naroda. Budź mocnym, budź śmiełym, budź biasstrašnym. Vy nikoli nie budziecie adny, darahi prezident Zialenski. My praciahniem pracavać z vami dla spraviadlivaha i ŭstojlivaha miru».
Premjer-ministr Narviehii Jonas Har Sterie ŭ zajavie dla telekanała TV2 skazaŭ:
«Toje, što my ŭbačyli siońnia ŭ Biełym domie, surjozna i biantežyć. Ukraina pa-raniejšamu maje patrebu ŭ padtrymcy ZŠA, a biaśpieka i budučynia Ukrainy taksama važnyja dla ZŠA i Jeŭropy. Prezident Uładzimir Zialenski maje mocnuju padtrymku va Ukrainie, šyrokuju padtrymku ŭ Jeŭropie, i jon pravioŭ svoj narod praź vielmi składany i žorstki čas, znachodziačysia pad atakaj z boku Rasii. Toje, što Tramp abvinavačvaje Zialenskaha ŭ azartnaj hulni z Treciaj suśvietnaj vajnoj, vielmi nieabhruntavana, i ja dystancujusia ad hetaj zajavy. Narviehija padtrymlivaje Ukrainu ŭ jaje baraćbie za svabodu. My spadziajemsia, što administracyja Trampa taksama razumieje važnaść spraviadlivaha i tryvałaha miru va Ukrainie».
Kaja Kałas, eks-premjer-ministarka Estonii, a ciapier Viarchoŭny pradstaŭnik ES pa zamiežnych spravach i palitycy biaśpieki, adznačyła:
«Ukraina — heta Jeŭropa! My padtrymlivajem Ukrainu. My ŭzmocnim našu padtrymku, kab jana mahła praciahvać supraciŭlacca ahresaru. Siońnia stała jasna, što volnamu śvietu patrebny novy lidar. Nam, jeŭrapiejcam, treba budzie pryniać hety vyklik».
Ciapier čytajuć
Startavała anłajn-apytańnie biełarusaŭ nakont ekanomiki i žyćcia, anansavanaje premjeram Turčynym10
Kamientary