MARH choča zabaranić pradavać tavary ŭ Biełarusi daražej, čym za miažoj
Niekatoryja biełaruskija pradpryjemstvy ličać unutrany rynak premijalnym i ŭstanaŭlivajuć na im ceny vyšejšyja, čym na źniešnim. Pra heta zajaviŭ kiraŭnik MART Artur Karpovič. Jon ličyć, što tak moža być tolki z dazvołu čynoŭnikaŭ.
Pavodle ministra, MARH fiksavaŭ vypadki, kali pradukcyja adnaho i taho ž pradpryjemstva ŭnutry krainy kaštuje značna daražej, čym pry prodažy za miažu. Viedamstva ličyć takuju situacyju niespraviadlivaj u adnosinach da biełaruskich pakupnikoŭ.
— Vytvorca čaściakom u pahoni za vykanańniem pakazčyka pa eksparcie zabyvaje pra ŭnutrany rynak, razumiejučy, što heta nikudy ad jaho nie dzieniecca. Jość fakty, kali na ŭnutrany rynak vytvorcy pastaŭlajuć pradukcyju značna daražej, čym pradajuć jaje na ekspart. Našy ludzi nie pavinny pierakryvać rentabielnaść, jakuju niedaatrymlivaje pradpryjemstva na terytoryi zamiežnych dziaržaŭ, — adznačyŭ Karpovič.
Kab paźbiehnuć takoj praktyki, ministerstva prapanuje na zakanadaŭčym uzroŭni ŭstanavić praviła: biełaruskija vytvorcy nie zmohuć pastaŭlać pradukcyju na ekspart tańniej, čym jana kaštuje ŭnutry krainy.
«U vyklučnych vypadkach pradastavić prava abłasnym vykanaŭčym kamitetam, Minharvykankamu… uzhadniać vyvaz pradukcyi pa cenach nižejšych, čym tavar pastaŭlajecca na ŭnutrany rynak. Ja dumaju, što efiekt budzie», — kaža Karpovič.
Kamientary