U niamieckim bundestahu pracavaŭ rełakant z Rasii z suviaziami ŭ FSB
Pavodle źviestak haziety FAZ i ahienctva dpa, u ofisie deputata bundestahu ad CHDS ź Ciurynhii pracavaŭ rasijanin, jaki źjechaŭ u Niamieččynu paśla pačatku vajny, raskazvaje DW.
Hazieta pryvodzić asabistyja dadzienyja hetaha rasijanina — Kanstancin K. 1984 hoda naradžeńnia. Da bundestahu jon pracavaŭ u maskoŭskim ofisie Fondu imia Konrada Adenaŭera.
Pa infarmacyi žurnalistaŭ, Kanstancin K. maje suviazi z FSB i z rasijskaj apazicyjaj. Jon, pavodle FAZ, zmoh arhanizavać u bundestahu vystupy apanientaŭ Pucina, u tym liku Michaiła Chadarkoŭskaha. Da kanca 2024 hoda ŭ Kanstancina K. było paśviedčańnie, jakoje zabiaśpiečvała jamu nieabmiežavany dostup u niamiecki parłamient.
Vydańnie «Siriena» piša, što ahientam FSB u bundestahu byŭ Kanstancin Chrapaŭ, jaki taksama źjaŭlajecca supracoŭnikam arhanizacyi CASE, zasnavanaj strukturami Chadarkoŭskaha.
Sa słoŭ deputata ź Ciurynhii Kryścijana Chirte, jon paznajomiŭsia z rasijaninam jašče ŭ Rasii — praź blizki da CHDS Fond imia Konrada Adenaŭera.
U 2023 hodzie Chirte pryniaŭ jaho na pracu na minimalnuju staŭku, daručyŭšy ŭstaloŭvać kantakty z rasijskaj apazicyjaj i rasijanami ŭ vyhnańni. Pry hetym jon pieradaŭ jaho daśje dla pravierki niamieckim orhanam biaśpieki.
Prykładna praz hod Chirte paviedamili, što ŭ rasijanina mohuć być suviazi z FSB. Paźniej jamu ŭdakładnili, što niekatoryja padazreńni paćviardžajucca, pry hetym paprasiŭšy nie kazać nikomu hetuju infarmacyju. Jašče praź niekatory čas deputata paprasili «bieź lišniaha šumu» zvolnić rasijanina, što jon i zrabiŭ.
U Fiederalnaj raźviedvalnaj słužbie Hiermanii admovilisia ad kamientaryjaŭ pa hetym pytańni, piša dpa.
Kamientary
z suviaziami ( 💀🐧🥘)
u fsb (🙈)
kapiec