Pamior aŭstralijec, čyja kroŭ vyratavała žyćci bolš za dva miljony dziaciej
Džejms Charysan pamior u śnie ŭ domie sastarełych u Novym Paŭdniovym Uelsie (Aŭstralija) 17 lutaha, paviedamiła jaho siamja ŭ paniadziełak. Jamu było 88 hadoŭ, piša Bi-bi-si.
Čałaviek z załatoj rukoj — tak nazyvali Charysana ŭ Aŭstralii. Jaho kroŭ utrymlivała redkija antycieły Anti-D, jakija vykarystoŭvajucca dla stvareńnia lekaŭ dla ciažarnych žančyn, čyja kroŭ moža atakavać ich nienarodžanych dziaciej.
Aŭstralijskaja słužba kryvi Čyrvonaha Kryža, jakaja vykazała daninu pamiaci Charysanu, paviedamiła, što jon paabiacaŭ stać donaram paśla taho, jak sam atrymaŭ pieralivańnie kryvi padčas składanaj apieracyi na hrudnoj kletcy ŭ 14 hadoŭ.
Jon pačaŭ achviaravać svaju płazmu va ŭzroście 18 hadoŭ i praciahvaŭ heta rabić kožnyja dva tydni da 81 hoda.
U 2005 hodzie jon ustalavaŭ suśvietny rekord pa kolkaści pieradadzienaj kryvianoj płazmy — zvańnie, jakoje ŭtrymlivaŭ da 2022 hoda, kali jaho abahnaŭ žychar ZŠA.
Dačka Charysana, Trejsi Mełaŭšyp, skazała, što jaje baćka vielmi hanaryŭsia, što zmoh vyratavać tak šmat žyćciaŭ, biez usialakaha koštu i bolu.
«Jon zaŭsiody kazaŭ: heta nie baluča, a žyćcio, jakoje ty ratuješ, moža być tvaim ułasnym», — adznačyła jana.
Mełaušyp i dvoje ŭnukaŭ Charysana taksama atrymali Anti-D vakcynacyju.
«Jamu było pryjemna čuć pra šmatlikija siemji, takija, jak naša, jakija isnujuć dziakujučy jaho dabryni», — skazała jana.
Anti-D vakcyna abaraniaje nienarodžanych dziaciej ad śmiarotnaj kryvianoj chvaroby — hiemalityčnaj chvaroby płoda i novanarodžanych (HDFN).
Heta patałohija ŭźnikaje, kali erytracyty maci niesumiaščalnyja z kryvianymi kletkami dziciaci, što vyklikaje reakcyju imunnaj sistemy maci, jakaja pačynaje źniščać kryvianyja kletki płoda.
Kamientary