«Šancy na spynieńnie ahniu roŭnyja nulu». ZŠA paviedamili Jeŭropie, što pieramovy z Pucinym zajšli ŭ tupik
Čynoŭniki administracyi Donalda Trampa, jakija za apošnija dva miesiacy nie mienš za 6 razoŭ sustrakalisia z rasijskimi dypłamatami, viarnulisia ź pieramoŭ z pustymi rukami, i heta pačynaje ich turbavać. Pra heta Financial Times raskazali krynicy, znajomyja z bryfinham, jaki amierykancy praviali dla jeŭrapiejskich i ŭkrainskich kalehaŭ pa vynikach svaich kantaktaŭ z Rasijaj.
Choć Bieły dom padrychtavaŭ dla Kramla ščodry pakiet prapanoŭ, uklučajučy admienu sankcyj, sumiesnyja biznes-prajekty i pryznańnie Kryma, Uładzimir Pucin praciahvaje nastojvać na maksimalisckich ambicyjach, u tym liku na «denacyfikacyi» Ukrainy.
Sa słoŭ krynic FT, Pucin admoviŭsia pahadzicca na toje, kab Ukraina zachavała adekvatnaje vojska, choć hetaje patrabavańnie Kijeva padtrymali ZŠA. Niekatoryja čynoŭniki praciahvajuć spadziavacca, što Kreml usio ž pojdzie na ŭhodu z Trampam, ale ciapier «niama ničoha, kab u realnaści mahło prymusić jaje zapracavać», skazaŭ adzin z surazmoŭcaŭ vydańnia.
Niezhavorlivaść Pucina zmušaje ZŠA pierahledzieć svoj padychod, padkreślivajuć krynicy FT. Pa ich słovach, Tramp imkniecca vyjści ź mirnaha pracesu i zaklučyć luboje pahadnieńnie jak maha chutčej, navat kali jano akažacca ściplejšym za jahonyja pieršapačatkovyja ambicyi. Tramp, jaki abiacaŭ u chodzie pieradvybarnaj kampanii skončyć vajnu za 24 hadziny, za 100 dzion u prezidenckim kreśle zmoh damahčysia tolki karotkaha spynieńnia ahniu na Vialikdzień, jakoje supravadžałasia ŭzajemnymi abvinavačvańniami ŭ parušeńniach i abstrełach.
U kancy sakavika administracyja ZŠA abviaściła ab dasiahnieńni pieramirja ŭ Čornym mory, jakoje Maskva adrazu ž admoviłasia vykonvać: u jakaści ŭmovy Kreml zapatrabavaŭ źniać sankcyi z Raśsielhasbanka i pierapadklučyć jaho da sistemy SWIFT.
U vyniku Tramp, jaki śpiarša paźbiahaŭ publičnaj krytyki Pucina, pierastaŭ chavać svajo razdražnieńnie. 24 krasavika jon zajaviŭ, što «nie zadavoleny» rasijskim udaram pa Kijevie, jaki zabraŭ bolš za 30 žyćciaŭ i staŭ samym kryvavym ź lipienia minułaha hoda. «Uładzimir, spynisia!» — pisaŭ Tramp u sacsietcy Truth Social. A praz dva dni jon zajaviŭ, što Pucin, mahčyma, «vodzić jaho za nos». Vierahodna, z Rasijaj treba dziejničać «pa-inšamu» — praz bankaŭskija abo druhasnyja sankcyi, napisaŭ Tramp.
Rasija adkazała ZŠA ŭzmacnieńniem vajaŭničaj rytoryki. Na minułym tydni sakratar rasijskaj Rady Biaśpieki Siarhiej Šajhu pryhraziŭ Zachadu «treciaj suśvietnaj vajnoj» z vykarystańniem jadziernaj zbroi, a kiraŭnik MZS Rasii Siarhiej Łaŭroŭ zapatrabavaŭ, kab prynaležnaść da Rasii anieksavanych rehijonaŭ Ukrainy pryznali nie tolki ZŠA, ale i ŭsia suśvietnaja supolnaść. 29 krasavika pamočnik Pucina Mikałaj Patrušaŭ zajaviŭ, što ŭ Maskvie ličać Adesu rasijskim horadam i prapanavaŭ miascovym žycharam pravieści refierendum — anałahičny tym, što adbylisia ŭ anieksavanych rehijonach, a namieśnik kiraŭnika Rady Biaśpieki Dźmitryj Miadźviedzieŭ pryhraziŭ zładzić denacyfikacyju Jeŭropy.
U Rečycy ludzi vyjšli prybirać śnieh. Ich aštrafavali5
U Rečycy ludzi vyjšli prybirać śnieh. Ich aštrafavali
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»1414
Kamientary
Tramp i kamanda zusim nijakija i ŭ mižnarodnaj palitycy. Ich maštaby - hulnia za vybarščyka ŭnutry dvuchpartyjnaj sistemy ZŠA, nie bolš.
Zaraz zastajecca viarnucca da mocnaj patrymcy Ukrainy i cisku na Rasieju. Ale ž toje EHA nie dazvolić - jamu ž soramna paŭtarać za Bajdenam.
Po mojemu tolko u nieho odnoho i jesť.