U ZŠA niezadavoleny napaŭ na šeście ŭ padtrymku izrailskich zakładnikaŭ u Hazie
U amierykanskim štacie Kałarada, u horadzie Boŭłder, čałaviek pa imieni Machamied Sabry Sulejman z vokličami «Svabodu Paleścinie!» kinuŭ butelki z haručaj vadkaściu va ŭdzielnikaŭ šeścia ŭ padtrymku izrailskich zakładnikaŭ u Hazie. Apioki atrymali šeść čałaviek, piša Bi-bi-si.
FBR, jakaja ahučyła imia zatrymanaha, zajaviła, što razhladaje heta złačynstva jak mierkavany terakt. Śpiecyjalny ahient FBR Mark Michalek paviedamiŭ na pres-kanfierencyi, što zatrymanamu, Machamiedu Sabry Sulejmanu, 45 hadoŭ.
Kiraŭnik palicyi Boŭłdera Styvien Redfiern raniej paviedamiŭ žurnalistam, što niekatoryja z paciarpiełych atrymali surjoznyja apioki. Jany byli špitalizavanyja. Uzrost paciarpiełych — ad 67 da 88 hadoŭ.
Kiraŭnica FBR Keš Pateł adrazu zajaviła, što havorka idzie pra metanakiravany terakt, ale Redfiern skazaŭ žurnalistam, što pra matyvy zatrymanaha pakul havaryć rana. Pavodle słoŭ Marka Michaleka, Sulejman, kidajučy butelki z padpalenymi knotami ŭ pažyłych udzielnikaŭ šeścia, vykrykvaŭ: «Svabodu Paleścinie!»
Ministr zamiežnych spraŭ Izraila Hideon Saar nazvaŭ heta zdareńnie prajavaj «čystaha antysiemityzmu».
«Pryhniečany žudasnym antysiemickim teraktam suprać jaŭrejaŭ u Boŭłdery. Heta čysty antysiemityzm, padsiłkavany kryvavymi paklopami, jakija raspaŭsiudžvajuć miedyja», — napisaŭ ministr Saar u sietcy X.
Pasoł Izraila ŭ AAN Dani Danon nazvaŭ zdareńnie teraryzmam.
Padčas zatrymańnia Sabry jašče byli ŭ jaho rukach dźvie takija butelki z knotami z čyrvonaj tkaniny.
Napadzieńniu ŭ Boułdery padvierhlisia pažyłyja ŭdzielniki ruchu «Bieh za ich žyćci» (Run for Their Lives).
Hety ruch, zasnavany izrailcianami, što žyvuć u Kalifornii, ciapier, pavodle infarmacyi na jaho sajcie, składajecca z 230 samastojnych miascovych hrup, pieravažna ŭ Paŭnočnaj Amierycy i Jeŭropie.
Hetyja hrupy ładziać štotydniovyja zabiehi, šeści abo prahułki, meta jakich — pakazać, što pra izrailskich zakładnikaŭ u Hazie nie zabylisia, i znoŭ i znoŭ zaklikać da ich vyzvaleńnia.
Na hetyja prahułki ŭdzielniki vychodziać u čyrvonych futbołkach i ź ściahami tych krain, hramadzianie jakich dahetul zastajucca ŭ pałonie ŭ siektary Hazy.
Napad na hrupu «Bieh za ich žyćci» ŭ Boŭłdery staŭ trecim za dva miesiacy hučnym zdareńniem z antysiemickim abo antyizrailskim padtekstam.
Kamientary