Tolki pamyli, a futbołka ŭžo śmiardzić. Čamu pach cieła zastajecca na adzieńni?
Ci možna pazbavicca ad pachu raz i nazaŭždy?
Źjava, kali tolki što pamytaje adzieńnie vielmi chutka znoŭ pačynaje niepryjemna pachnuć, maje navat asobnyja nazvy — «ustojlivy pach» (permastink) i «viartańnie pachu» (odor rebloom). Jak piša Tegesspiegel, hałoŭnyja vinavatyja hetaha — mikraarhanizmy, dakładniej, latučyja rečyvy, jakija jany vydzialajuć.
Mikraarhanizmy, jakija žyvuć na skury, traplajuć na tkaninu razam z potam i skurnym tłuščam. Tam jany rasščaplajuć tłuščy i białki, utvarajučy latučyja rečyvy. Niekatoryja ź ich čałaviečy nos raspaznaje ŭ nadzvyčaj małych kancentracyjach.
Sintetyka — raj dla pachaŭ
Asabliva składana z poliesteram, ź jakoha šyjuć značnuju častku spartyŭnaha adzieńnia. Pryčyna ŭ tym, što pavierchnia vałoknaŭ poliesteru pa svaich ułaścivaściach padobnaja da tłušču. Jana źviazvaje malekuły pachu, jakija vyzvalajucca z hłybini płastyku tolki pry tempieratury 60 hradusaŭ. Akramia taho, jany pryciahvajuć skurnaje sała. Na hetaj tłuščavaj ploncy asabliva dobra razmnažajucca bakteryi rodu Micrococcus, jakija i stvarajuć mocny niepryjemny smurod.
A voś na bavoŭnie ŭmovy dla ich značna horšyja. Jaje vałokny dobra ŭbirajuć vadu, nabrakajuć padčas myćcia i tamu lahčej ačyščajucca. U toj ža čas bavoŭnu treba chutka vysušyć, bo ŭ vilhotnaj tkaninie mikraarhanizmy znoŭ pačynajuć aktyŭna razmnažacca.
Cikavy vypadak — voŭna. Na joj taksama moža być šmat bakteryj, ale smurod adčuvajecca słabiej. Chitraść u tym, što struktura vałoknaŭ zdolnaja ŭtrymlivać pachučyja rečyvy ŭnutry.
Prałka taksama moža być krynicaj pachu
Usio, što śmiardzić, adpraŭlajecca ŭ prałku — ale mienavita tam časta pačynajucca sapraŭdnyja prablemy. Nizkija tempieratury dapamahajuć ekanomić elektraenierhiju i bierahuć tkaninu, ale nie źniščajuć usie mikraarhanizmy. Bolš za toje, padčas myćcia jany razam z arhaničnymi zabrudžvańniami mohuć pierachodzić z adnoj rečy na druhuju.
Asabliva dobra bakteryi pačuvajucca ŭ humovaj prakładcy dźviercaŭ i ŭ adsieku dla myjnaha srodku. Tam utvarajucca bijaplonki — ślizistyja struktury, jakija abaraniajuć mikraarhanizmy ad vady i chimičnych rečyvaŭ. Suprać hetaha lepš za ŭsio dapamahaje štomiesiačnaje prafiłaktyčnaje prańnie pry vysokaj tepieratury.
Kali adzieńnie nielha myć pry 60 hradusach, daśledčyki źviartajuć uvahu na srodki z kisłarodnym adbielvalnikam («aktyŭnym kisłarodam»). Jany mohuć być efiektyŭnymi i pry nižejšych tempieraturach. Taki ž pryncyp dziejańnia maje trochpracentny pierakis vadarodu, jaki možna zalić u adsiek dla asnoŭnaha prańnia ŭ momant, kali tudy pastupaje vada.
Jašče adzin pierśpiektyŭny padychod — myjnyja srodki z dezaksirybanukleazaj (DNKazaj). Hety fiermient rasščaplaje doŭhija nitki DNK, jakija dapamahajuć utrymlivać bijaplonku razam, i takim čynam spryjaje ačyščeńniu tkaniny ad bakteryjalnaha nalotu. Adnak srodki z DNKazaj pakul sustrakajucca davoli redka.
Bolš parašku — nie značyć čyściej
Pieradaziroŭka myjnaha srodku moža dać advarotny vynik. Kali jon drenna vypałoskvajecca, reštki zastajucca ŭ tkaninie i stvarajuć dadatkovyja ŭmovy dla mikraarhanizmaŭ.
Padobnaja historyja z kandycyjanieram: jon maskuje pach vodaram, ale asabliva na sintetyčnych tkaninach moža pakidać plonku, jakaja ŭtrymlivaje tłušč i zabrudžvańni. Adziny plus kandycyjanieraŭ: jany časta majuć słabakisłaje asiarodździe i niejtralizujuć ščołačnyja reštki pralnaha parašku ŭ bialiźnie. Zamiest ich u adsiek dla pałaskańnia možna dadać trochi vocatu abo limonnaj kisłaty.
I narešcie, kolkaść bakteryj sama pa sabie nie vyznačaje, ci budzie pralnaja mašyna śmiardzieć. Daśledavańni pakazvajuć, što ŭ mašynach bieź niepryjemnaha pachu taksama žyvuć šmatlikija mikraarhanizmy. Važniej toje, jakija mienavita vidy składajuć hetuju supolnaść: adny stvarajuć smurod, a inšyja mohuć kankuryravać ź imi.
Tak što śviežaść bializny — heta nie prosta pytańnie tempieratury i kolkaści parašku. Značeńnie majuć materyjał adzieńnia, chutkaść suški, pałaskańnie i stan samoj prałki. A kali niechta ŭparta nie zaŭvažaje niepryjemnaha pachu svajoj futbołki, pryčyna moža być navat u hienach.
Naprykład, zhodna z adnym z daśledavańniaŭ, bolš za 20% ludziej nie majuć peŭnych varyjantaŭ hienaŭ, nieabchodnych dla ŭsprymańnia niekatorych tłustych kisłot z pacham staroha potu. Tamu asobnyja pachi jany adčuvajuć značna słabiej abo nie adčuvajuć uvohule. Ci isnuje takaja ž hienietyčnaja nieadčuvalnaść mienavita da pachu niaśviežaha adzieńnia, pakul nie dakazana.
Kamientary