Biełaruska padzialiłasia ŭražańniami ad aŭtobusnaha tura ŭ Dahiestan — 32 hadziny da pieršaha načleha
Błohierka Palina vybrałasia z maci ŭ ekzatyčny adpačynak i raskazała pra jaho detali ŭ tyktoku.
Kab trapić u Dahiestan, Palina nabyła miesca ŭ tury adnaho ź biełaruskich turahienctvaŭ. Tur byŭ aŭtobusny, tamu dziaŭčynie i jaje maci daviałosia pieražyć doŭhuju darohu. Našmat daŭžejšuju, čym u pierajezdach pa Jeŭropie: da pieršaha načleha, jaki byŭ zapłanavany ŭ Piacihorsku, turysty jechali ažno 32 hadziny, a ahulny šlach da Dahiestana zaniaŭ dva dni.
Hrupa nabrałasia vialikaja — ažno 50 biełarusaŭ. Palina raskazała, jak udzielniki tura bavili hety čas:
«Ja dajechała da Homiela i ŭžo ŭ cełym stamiłasia, dumała — kapiec. Sto hadoŭ nie jeździła na aŭtobusie tak daloka. Ale potym ci zvykaješsia, ci źmiraješsia z tym, što daroha dalokaja, i ŭžo było narmalna.
Kali b jašče vaj-faj byŭ na šlachu, było b uvohule cudoŭna, ale jon dazvalaŭ tolki zahruzić paviedamleńni ŭ telehramie. Sprabavała spać, hladzieła ŭ akno… Zrazumieła, što daroha ciažkaja. My dvojčy za hetyja 32 hadziny spynialisia ŭ prydarožnych kafeškach, kab pajeści haračaj ježy, u astatni čas spynialisia na zapraŭkach kožnyja try hadziny».
Na hetym pobytavyja niepryjemnaści tolki pačynalisia, bo ŭ piacihorskim hateli, dzie pasialili hrupu, nie było haračaj vady.
Tur byŭ ekstremalny: naprykład, daviałosia pałazić pa piačorach u humavych botach. Turysty naviedali hory, u tym liku pabyvali la Elbrusa, bačyli šmat malaŭničych piejzažaŭ, a taksama byli ŭ Dzierbiencie — heta samy staražytny horad Rasii — i na bierazie Kaśpijskaha mora. Na zvarotnym šlachu hrupa spyniałasia dla adpačynku ŭ Varoniežy.
Try dni hrupa žyła ŭ hornych damkach z cudoŭnym vidam. Palinie miesca duža spadabałasia, ale, miarkujučy pa kamientarach, nie ŭsich turystaŭ tudy zasialajuć — u minułyja zajezdy hetaha tura niekatorych raźmiaščali i ŭ padvalnych pamiaškańniach.
Tur, u jaki pajechała Palina, kaštavaŭ 350 dalaraŭ na čałavieka. Z ulikam dadatkovych vydatkaŭ u adpačynku ahułam atrymałasia suma prykładna ŭ 750 dalaraŭ.
Biełaruska kaža, što zastałasia ŭ zachapleńni ad Dahiestana: «Ci varta tudy jechać? Tak, i jak maha chutčej, mnie padajecca. Dahiestan imkliva raźvivajecca jak turystyčny kirunak, i pakul tam adekvatnyja ceny — jany jašče nie zrazumieli, što na turystach možna zarablać našmat bolš».
«Naša Niva» — bastyjon biełaruščyny
PADTRYMAĆ
Ciapier čytajuć
Asudžany za «Hajun» da chimii brat Ihara Łosika ŭciok ź Biełarusi1
Asudžany za «Hajun» da chimii brat Ihara Łosika ŭciok ź Biełarusi
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary