6 vieraśnia frakcyja Eŭrapiejskaha parlamentu «Eŭrapiejskaja narodnaja partyja – Eŭrapiejskija demakraty», u jakuju ŭvachodziać 268 jeŭradeputataŭ i jakaja źjaŭlajecca daminujučaj parlamenckaj hrupaj, pryniała rašeńnie ab padtrymcy kandydatury Alaksandra Milinkieviča na atrymańnie ŭznaharody imia Andreja Sacharava «Za svabodu dumki».
Kamentujučy rašeńnie frakcyi vice-staršynia Eŭraparlamentu Jacek Saryjuš-Volski adznačyŭ: «Alaksandar Milinkievič, jak mała chto inšy, jość prykładam čałavieka, jaki zmahajecca za našy supolnyja eŭrapiejskija kaštoŭnaści. Biełaruś siońnia jość (…) apošnim miescam u Eŭropie, dzie pravy čałavieka śviadoma parušajucca palityčnymi ŭładami. Tamu dziejnaść Alaksandra Milinkieviča i ŭsioj demakratyčnaj apazycyi, lideram jakoj jon źjaŭlajecca, całkam adpaviadaje misii hetaj uznaharody».
Vice-staršynia Eŭraparlamentu padkreśliŭ, što rašeńnie frakcyi «Eŭrapiejskaj narodnaj partyi – Eŭrapiejskija demakraty» ab padtrymcy biełaruskaha palityka jość «jaskravym syhnałam dla inšych palityčnych hrup, što Alaksandar Milinkievič źjaŭlajecca nadzvyčaj surjoznaj kandydaturaj».
Nahadajem, što pazaletaś sacharaŭskaj premijaj, što ŭručajecca z 1988 h., była ŭznaharodžana Biełaruskaja asacyjacyja žurnalistaŭ
