Prezydentam abvieščany Felipe Kalderon, ale Manuel Abrador taksama rychtujecca abvieścić siabie kiraŭnikom dziaržavy. Čym toje skončycca, niemaviedama.
Vynik najbolš zaciataj elektaralnaj baraćby ŭ historyi Meksyki vybarčy trybunał abviaściŭ u paniadziełak. Nasupierak abvinavačvańniam apazycyi jon paćvierdziŭ, što ciaham hałasavańnia 2 lipienia i padčas padliku hałasoŭ nie było značnych parušeńniaŭ, nia kažučy ŭžo pra vialikaje, arhanizavanaje falšavańnie vybaraŭ.
Kanservatar Felipe Kalderon z Partyi nacyjanalnaha dziejańnia atrymaŭ minimalnuju pieramohu nad kandydatam ad levaha kryła Andresam Manuelem Łopesam Abradoram. Heta jon u śniežni, kali skončycca termin Visente Foksa, maje pryniać na siabie abaviazki kiraŭnika dziaržavy.
Pieramohu Kalderona pryznali ŭsie palityčnyja siły za vyniatkam Revalucyjna-demakratyčnaj partyi (PRD). Z kaalicyi Por el bien de todos (Za dabro dla ŭsich), kandydatam jakoj byŭ Abrador, navat vyjšła partyja Convergencia, jakaja zaakceptavała pastanovu trybunała.
Vinšavańni pačali prychodzić taksama i ad zamiežnych uradaŭ. Adnak vyhladaje na toje, što spakoju ŭ Meksycy nia budzie jašče vielmi doŭha.
Fašysty i złodziei
Staličnaje Mechika, dzień abviaščeńnia rašeńnia trybunała. 53-hadovy Abrador, były burmistar stalicy, vystupaje na mitynhu na placy Kanstytucyi pamiž katedraj i daŭnim prezydenckim pałacam.
Kala mianie małady pradaviec pracaŭ Lenina razvažaje pra złačynstvy «režymu Foksa» i zapeŭnivaje, što zmahacca buduć, bo «ludziej ŭžo dastaŭ uvieś hety bandytyzm uradu». Jamu zusim nia dzika, što Abrador, zdarałasia, uzhadvaŭ imia Stalina jak natchnialnika svajoj baraćby za demakratyju.
Mitynh pačynajecca karotkim vystupam Razaryi Ibary de Pjedra, deputatki ad Revalucyjna-Demakratyčnaj Partyi. Jana abviaščaje, što PRD nie dapuścić ustupleńnia na pasadu prezydenta Kalderona, a narodny schod prymaje hetaje rašeńnie radasnymi vokličami. Vokličy «No pasar?n!» zahłušajuć słovy deputatki, a ŭ eŭfaryi ŭjaŭnaj pieramohi niašmat chto źviartaje ŭvahu na doždž.
Pa niejkaj chvilinie nadychodzić kulminacyja prahramy – słaŭnaja svaimi antyimperyjalistyčnymi vuličnymi vidoviščami aktorka Chiesusa Radryhiez abviaščaje vystup «prezydenta Abradora». «Ty nie adzin!» i «Złodziei!» kryčać ludzi, a Abrador daje pierunoŭ fašystoŭskamu režymu, jaki hańbić Meksyku i viadzie jaje naŭprost da vyniščeńnia.
Abrador nie pryznaje zaklučeńnia trybunału i kipić ad abureńnia na sudździaŭ, jakija sankcyjavali falšavańnie vybaraŭ, tym samym razburajučy kanstytucyjny paradak (tut narod jak u voku mhnieńnie linčavaŭ by pradažny trybunał).
– Da djabła instytuty dziaržavy! – kryčyć jon i paviedamlaje, što sklikanyja na 16 vieraśnia narodny Kanstytucyjny Schod i Demakratyčnaja Kanvencyja, jakija buduć zasiadać akurat na placy Kanstytucyi, stvorać novy ŭrad.
Abrador vyklikaje siońnia emocyi, jakim jaho prychilniki nia viedajuć jak dać rady. Jany stajać uzdoŭž prajeznaj častki i vykrykvajuć svaju złość u kirunku prajaždžajučych mašynaŭ. Niekalki socień čałaviek blakujuć bližejšuju stancyju metro. Ścisnutyja ŭ koły, jany padskovajuć u rytmie lozunhaŭ: «Si no hay solucion, habra revolucion!» (Kali nia znojdzieccca rašeńnia, budzie revalucyja).
Radaść novaabranaha
U toj samy dzień na publicy dva razy paŭlajecca Felipe Kalderon. Jon kaža karotkuju pramovu, a poznym viečaram daje ŭ televizii svajo pieršaje interviju. Zapeŭnivaje, što budzie šanavać usialakija dumki i pohlady, što heta čas dyjalohu i parazumieńnia, bo chto začyniaje dźviery dyjalohu, začyniaje dźviery Meksycy.
Kalderon vykazaŭ pašanu da Abradora za jahonuju ŭvahu da patrebaŭ meksykanskaj biadnoty. Jon uchilajecca ad krytyki i dazvalaje sabie tolki mimalotnuju zaŭvahu, što siońnia pastava Abradora ničym nie dapamahaje krainie.
I tolki ŭ adnym 43-hadovy novaabrany prezydent niepachisny i rašučy – niama nijakich sumnievaŭ, što 1 śniežnia jon zojmie pasadu.
Jahonaja bieskłapotnaść krychu ździŭlaje. Cyrymonija prychodu da ŭłady, da jakoj PRD maje namier nie dapuścić (jak nie dapuściła kolki dzion tamu apošniaj važnaj pramovy prezydenta Foksa), – heta tolki rytuał. Značna bolš surjozna hučać pahrozy jaje deputataŭ, jakija ŭžo siońnia kažuć, što pieraškodziać Kalderonu vykonvać ŭładu.
Vajna, mienavanaja miram
Sudździ vybarčaha trybunału praihnaravali zaklik Abradora nie kiravacca pravavymi arhumentami. «Heta toje samaje, – zaŭvažaje meksykanski sacyjolah Rohier Bartra, – kali ad tych, chto ličyć hałasy, čakać, što jany nia buduć kiravacca arytmetykaj.
Ale hetkaja pryroda pratestu Abradora – jon patrabuje nie kiravacca pravavymi pałažeńniami, a prysłuchoŭvacca da hołasu narodu. Narod ža – heta jahonyja paplečniki, jakija razmachvajuć kułakami na štodzionnych mitynhach; usie inšyja – heta «jany».
Z hetaha pajadnańnia narodu z pravadyrom płyvie ŭžo słavuty zaklik, jaki vyjaŭlaje ŭsiu tajamnicu jahonaha pratestu: «Pieramoha Kalderona maralna niedapuščalnaja». Inšymi słovami: čort tam z hetym padlikam hałasoŭ, tolki ŭ nas jość maralnaje prava na ŭładu.
Jak i kožny radykalny refarmatar-revalucyjaner, Abrador stvaraje verbalny śviet, u jakim słovy słužać dla retušavańnia praŭdy. Jahony mirny ruch hramadzkaha supracivu nasamreč jość manifestacyjaj mocy i akupacyjaj centru horadu. Ujaŭnyja dokazy falšavańnia vybaraŭ abapirajucca na chłuśniu, što raspaŭsiudžvajecca siarod tych, dla kaho praŭda nahetulki pryjemnaja, nakolki jana adbivaje ichnyja imknieńni. Nazvanaja demakratyčnaj, kanvencyja, jakuju apazycyja sklikaje na 16 vieraśnia, – budzie sprobaj uzurpacyi ŭłady.
Jak ni paradaksalna, usio heta adbyvajecca tady, kali meksykanskija levyja majuć upłyŭ, jakoha nikoli raniej nia mieli. PRD – heta druhaja siła ŭ parlamencie, a jaje kandydat prajhraŭ prezydenckija vybary z adstavańniem usiaho 0,1%.
Heta mahutny palityčny kapitał, što źbiraŭsia kolki dziasiatkaŭ hadoŭ. I Abrador, idučy va-bank, moža adkinuć meksykanskuju lavicu na paru dziesiacihodździaŭ nazad.
