Polskaje MZS čakaje ŭbačyć nastupstvy adkryćcia dvuch KPP «u najbližejšyja tydni i miesiacy»
Efiekty adkryćcia dvuch punktaŭ propusku na miažy ź Biełaruśsiu buduć bačnyja ŭ najbližejšyja tydni i miesiacy. Pra heta ŭ efiry TVPinfo zajaviŭ namieśnik ministra zamiežnych spraŭ Marcin Basacki, piša Reform.news.
«Efiekty hetaha žestu, vidavočna žestu, jaki dobry, ale nie dla biełaruskaha režymu, a dla tysiač, socień tysiač ludziej, jakija buduć karystacca hetymi dvuma pamiežnymi pierachodami, palakaŭ i polskich biznesaŭ, efiekty hetaha žestu ŭbačym u najbližejšyja tydni, a moža być miesiacy», — skazaŭ jon.
«Całkam upeŭnieny, što haspadarčyja nastupstvy dla hetaha rehijona, dla Padlašša, buduć značnymi. Heta ŭžo viadoma zaraz. Ci atrymajecca razam z tym dypłamatyčnymi dziejańniami, darečy, nie tolki polskimi, zrabić tak, kab byŭ i značny palityčny efiekt, pahladzim. Polskaja dypłamatyja i polskaja dziaržava pastajanna nad hetym pracujuć», — dadaŭ namieśnik ministra.
Viadučy ranišniaj prahramy Maryjuš Pikarski pasprabavaŭ damahčysia ad Basackaha, ci raźličvaje polski bok na vyzvaleńnie Andžeja Pačobuta. Namieśnik ministra paličyŭ za lepšaje ŭchilicca ad pramoha adkazu.
«Prašu prabačeńnia, ale pieramovy, jakija iduć pamiž strukturami polskaj dziaržavy, u tym liku z udziełam dypłamatyi, z, nazaviem heta tak, druhim bokam, pakul pavinny zastavacca ŭ tajamnicy, ale, jak ja kazaŭ, spadziajusia, što vyniki buduć», — skazaŭ Basacki.
Namieśnik ministra kanstatavaŭ, što Alaksandr Łukašenka byŭ i zastajecca blizkim palityčnym i stratehičnym partnioram Uładzimira Pucina.
«Ale, jak my bačym, nie tolki Polšča pačynaje hulać z Łukašenkam ci biełaruskimi ŭładami ŭ hulniu, jakaja pavinna ŭ niejkaj stupieni asłabić napružanaść na našaj uschodniaj miažy. Takuju hulniu, i heta nijakaja nie tajamnica, viaduć taksama amierykancy», — skazaŭ jon.
Maryjuš Pikarski zasumniavaŭsia, što Alaksandr Łukašenka advierniecca ad svajho maskoŭskaha sajuźnika.
«Viedajecie, dziakujučy hetym namahańniam, u asnoŭnym amierykanskim, i nie tolki amierykanskim, było vyzvalena amal sto palitviaźniaŭ, uklučajučy palakaŭ, jak vy vydatna viedajecie.
Ci budzie heta aznačać novyja raŭndy vyzvaleńnia źniavolenych? Pahladzim. Heta, biezumoŭna, častka amierykanskaj dypłamatyi. Heta meta polskaj dypłamatyi. Čym bolš niaščasnych ludziej, jakija hadami tamilisia ŭ zaścienkach Łukašenki, zdabuduć svabodu, tym lepš», — adkazaŭ ministr.
Viadučy ŭdakładniŭ, ci mohuć być zakryty adkrytyja pierachody, kali biełaruski bok nie zrobić taho, što ad jaho čakajecca.
«Ja nie chaču hadać. Adnak, viadoma, u adnosinach ź inšymi dziaržavami, asabliva z takimi niesiabroŭskimi nam, jak režym Łukašenki, zaŭsiody toje, što robim, što robiać usie demakratyčnyja dziaržavy, źviazana z umovami.
Pabačym, što budzie adbyvacca, pabačym, jak ułady Biełarusi adkažuć na hety biezumoŭna vyhadny dla ich žest. Jak ja ŭžo skazaŭ, my zrabili heta dla taho, kab palaki, polski biznes, polskija pradprymalniki i žychary ŭschodniaj Polščy, asabliva Padlašša, mahli svabodna padarožničać, u tym liku vieści biznes ź Biełaruśsiu. Ale, jak i ŭsio ŭ takich adnosinach sa składanym i niesiabroŭskim partnioram, heta ŭmoŭny praces», — adkazaŭ namieśnik ministra.
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ8
Chto taja biełaruska, jakuju ekstradavali ŭ ZŠA dla suda za kantrabandu detalaŭ dla samalotaŭ
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii3434
Kamientary