Janukovič u Bruseli dabivajecca dałučeńnia da Eŭraźviazu

Zona volnaha handlu i palepšanaja «dobrasusiedzkaja» palityka – voś usio, na što moža raźličvać Ukraina z boku EZ. Pra ŭstupleńnie ŭ EZ Kijevu pakul što niama čaho i maryć.

U sieradu pavinien raspačacca vizyt Viktara Janukoviča ŭ Brusel, a ŭžo siońnia Eŭrakamisija pavinna pryniać prajekt t.zv. pieramoŭnickaha mandatu, na padstavie jakoha Eŭraźviaz pačnie vieści pieramovy z Ukrainaj pra formu novaha pahadnieńnia pra supracoŭnictva. Termin papiaredniaha pahadnieńnia, jakoje dziejničaje ŭ dadzieny momant, skančvajecca napačatku 2008 h.

Paśla pieramohi pamarančavaj revalucyi ŭva Ŭkrainie ŭ Bruseli zapanavaŭ aptymizm. Sioj-toj z palitykaŭ EZ – hałoŭnym čynam palaki – navat pačaŭ pierakonvać, što Ŭkraina pavinna atrymać ad Eŭraźviazu «eŭrapiejskuju perspektyvu», inšymi słovami – abiacańnie členstva. U dalokaj budučyni, biezumoŭna, naprykład, praz 20 hod.

Adnak ciapier Ukraina nia moža raźličvać navat na heta. "Ciapier vielmi niavyhadny momant. Šmat jakija dziaržavy navat słuchać nie žadajuć pra novaje pašyreńnie supolnaści, nia kažučy pra Baŭharyju i Rumyniju. I tamu ni ad Eŭrakamisii, ni ad Rady EZ nie pastupić prapanova, kab u novym pahadnieńni źjaviŭsia jaki-niebudź zapis, jaki moh chacia b navieści na dumku pra členstva", – kaža adzin z polskich dyplamataŭ.

«Užo navat sama nazva budučaha pahadnieńnia adpaviednaja. Kali napačatku 90-ch Polšča, hetak ža jak i inšyja krainy rehijonu, padpisvała z EZ «pahadnieńnie pra abjadnańnie», dyk u vypadku z Ukrainaj hetaja nazva nie ŭžyvajecca. Taksama nia budzie vieścisia havorka ni pra jakuju «eŭrapiejskuju perspektyvu», – śćviardžaje naš surazmoŭca.

Eŭrakamisija paćviardžaje hety pesymistyčny scenar. – Niama sumnievaŭ, što novaje pahadnieńnie z Ukrainaj nia budzie ničoha pradvyznačać – ni ŭ adzin, ni ŭ druhi bok. My chočam nablizić da siabie Ukrainu, ale na dadzienym etapie nia buduć prymacca nijakija rašeńni adnosna jaje budučaha statusu – raspaviała Ema Udvin, pradstaŭnica kamisaru EZ pa zamiežnych spravach Benity Ferera-Valdner.

A heta aznačaje adno: Ukraina budzie vymušana zadavolicca stvareńniem zony volnaha handlu z EZ. I to heta adbudziecca pry ŭmovie, što Ŭkraina budzie pryniataja ŭ Suśvietnuju handlovuju arhanizacyju – što pakul jašče nia vyznačana.

«Pytańnie, ci budzie hetaha dastatkova Kijevu. Kali hladzieć na ekanamičnyja dadzienyja, dyk ukraincam, moža, i varta ŭvachodzić u hetkuju mytnuju zonu», – kaža Jacak Saryjuš-Volski, eŭradeputat ad Hramadzianskaj platformy i vice-staršynia Eŭraparlamentu.

Inšyja eksperty, adnak, padkreślivajuć, što ŭvachod u zonu volnaha handlu budzie aznačać dla ŭkraincaŭ taksama i peŭnyja abmiežavańni, naprykład, jany musiać tady padparadkoŭvacca praviłam EZ akazańnia hramadzkaj dapamohi.

Takim čynam, premjer Ukrainy Viktar Janukovič, pajechaŭšy ŭ Brusel, nia zmoža abjavić ni pra jaki pierałom. Jahony vizyt u Eŭrakamisiju i Radu EZ budzie bolš vizytam vietlivaści i «aznajamlalnym», čym bahatym na kankretnyja spravy.

"Ale dobra, što ŭvohule vizyt adbyvajecca. Janukovič budzie, peŭna, staracca razmaŭlać bolš eŭrapiejskim tonam, čym u siabie doma", - kamentuje Saryjuš-Volski.

• 0
• 0
• 0
• 0
• 0
• 0
• 0
• 0