U maci televiadučaj i śpiavački Kaciaryny Vadanosavaj — Neli Vadanosavaj — adbyłosia krovaźlićcio ŭ mozh. Pra heta sama Vadanosava paviedamiła ŭ fejsbuku.
«U majoj maci krovaźlićcio ŭ mozh. Zdaryŭsia siońnia insult na vačach u Jana. Jany byli ŭdvox doma. My pryjechali za 10 chvilin. Mamu praapieravali. Jaje paralizavała. Nie prychodzić u śviadomaść. Sutarhi. Skazali, šancaŭ mała. Chto moža, pamaliciesia», — napisała Kaciaryna Vadanosava.
Maci televiadučaj bolš za hod tamu vyjechała ź Biełarusi praź cisk z boku KDB i padałasia na mižnarodnuju abaronu. Apošnim časam jana žyła razam ź siamjoj dački ŭ Biełastoku.
Uvosień polskaja pamiežnaja słužba pryniała rašeńnie ab jaje departacyi ŭ Litvu z-za biurakratyčnych nieparazumieńniaŭ: ułady nie ŭličyli, što sprava ab mižnarodnaj abaronie jašče razhladałasia i byŭ pryznačany sud. Paźniej departacyju admianili.
Pryčynaj pahrozy vysyłki stała toje, što žančyna ŭjechała ŭ Polšču pa litoŭskaj vizie. Heta źviazana z tak zvanym Dublinskim rehłamientam, jaki vyznačaje, jakaja kraina niasie adkaznaść za razhlad chadajnictva ab prytułku abo mižnarodnaj abaronie.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki19
Kamientary