U Finskim zalivie znoŭ paškodzili kabiel, jaki źviazvaje Finlandyju i Estoniju

Jak paviedamlaje kampanija Elisa, dziakujučy reziervovaj struktury sietki incydent nie paŭpłyvaŭ na akazańnie pasłuh u abiedźviuch krainach. Adnak u asobnych klijentaŭ, jakija karystajucca arandavanymi pramymi kanalnymi złučeńniami praz hety kabiel, mahli ŭźniknuć ciažkaści.

U kampanii adznačyli, što znachodziacca na suviazi z paciarpiełymi klijentami i ŭžo zadziejničali alternatyŭnyja kabieli dla adnaŭleńnia złučeńnia. Taksama pačałasia padrychtoŭka da ramontu paškodžanaha ŭčastka.

Na situacyju adreahavaŭ i prezident Finlandyi Alaksandr Stub. Jon paviedamiŭ, što finskija ŭłady pravieryli sudna, jakoje padazrajuć u datyčnaści da paškodžańnia padvodnych kabielaŭ u Finskim zalivie. Kiraŭnik dziaržavy padziakavaŭ pamiežnaj słužbie, palicyi, siłam abarony, rehulataram i inšym słužbam za zładžanuju pracu i efiektyŭnaje ŭzajemadziejańnie.

Pa jaho słovach, ułady praciahvajuć uvažliva sačyć za raźvićciom padziej. Prezident padkreśliŭ, što Finlandyja hatovaja da roznych vyklikaŭ biaśpiecy i pry nieabchodnaści apieratyŭna na ich reahuje.

Jak stała viadoma, Finlandyja zatrymała sudna «Fitburh» pad ściaham karybskaj astraŭnoj dziaržavy Sent-Vinsent i Hrenadziny, jakoje ruchałasia ŭ rajonie paškodžanaha telekamunikacyjnaha kabiela.

Jak paviedamlaje vydańnie Yle, padazronaje sudna vyjavili ŭ svabodnaj ekanamičnaj zonie Finlandyi patrulny karabiel «Turva» i viertalot pamiežnaj słužby. Pamiežniki zaŭvažyli, što jakarny łancuh sudna znachodzicca ŭ vadzie. Ekipaž paśla taho paprasili padniać jakar i nakiravacca ŭ finskija terytaryjalnyja vody.

Zhodna z danymi servisu Marinetraffic, sudna zaraz znachodzicca kala ŭźbiarežža paŭvostrava Porkała i nakiroŭvałasia ŭ izrailski port Chajfa. Yle adznačaje, što «Fitburh» i jaho numar IMO nie ŭklučanyja ŭ aficyjnyja śpisy sankcyj. Adnak ža ŭ bazie Open Sanctions sudna paznačana jak «cikavaje», pakolki było źviazana z padsankcyjnym «rasijskim marskim rehistram sudnapłaŭstva».

Heta nie pieršy padobny incydent u rehijonie. Hod tamu, 25 śniežnia 2024 hoda, u Finskim zalivie taksama byŭ paškodžany padvodny elektrakabiel Estlink 2, jaki złučaje Finlandyju i Estoniju. Tady taksama paciarpieli dva kabieli suviazi kampanii Elisa i adzin kabiel CITIC Telecom. Pavodle źviestak ŚMI, kala miesca paškodžańnia znachodzilisia dva sudny, adno ź jakich paśla zatrymali.

Paśla taho vypadku premjer-ministr Estonii Krysten Michał zajaviŭ pra nieabchodnaść uzmacnieńnia abarony krytyčnaj infrastruktury, nie vyklučyŭšy pryciahnieńnia da hetaha sajuźnikaŭ pa NATA.

• 0
• 0
• 0
• 0
• 0
• 0
• 2
• 0