Suprać zabarony na pieravozki rasijskaj nafty vystupili Hrecyja i Malta
Hrecyja i Malta vystupili suprać prapanovy Jeŭrakamisii całkam zabaranić marskija pieravozki rasijskaj nafty. Pavodle infarmacyi ahienctva Bloomberg, mienavita hetyja dźvie krainy ES najbolš žorstka raskrytykavali ideju zamianić dziejnuju cenavuju stolu poŭnaj zabaronaj transpartnych, strachavych i brokierskich pasłuh. Svaju niazhodu Afiny i Valeta vykazali na pasiadžeńni pasłoŭ ES, dzie abmiarkoŭvaŭsia novy pakiet sankcyj.
Pradstaŭniki abiedźviuch krain aścierahajucca, što takaja miera moža surjozna ŭdaryć pa jeŭrapiejskaj sudnachodnaj halinie i pryvieści da rostu cenaŭ na enierharesursy. Akramia taho, jany zapatrabavali dadatkovych tłumačeńniaŭ nakont mahčymych sankcyj suprać zamiežnych partoŭ, jakija prymajuć rasijskuju naftu, a taksama adnosna ŭzmacnieńnia kantrolu za prodažam sudnaŭ, kab jany nie traplali ŭ rasparadžeńnie Rasii.
Raniej Jeŭrakamisija prapanavała admovicca ad miechanizmu cenavaj stoli i ŭvieści zabaronu na klučavyja marskija pasłuhi. Heta inicyjatyva stała centralnym elemientam 20‑ha pakieta sankcyj ES, prymierkavanaha da čaćviortaj hadaviny pačatku poŭnamaštabnaj vajny Rasii suprać Ukrainy. Adnak realizacyja takoj miery mahčymaja tolki pry padtrymcy krain «Vialikaj siamiorki», pry hetym pazicyja ZŠA pakul zastajecca niapeŭnaj. Da ŭviadzieńnia cenavaj stoli padobnyja abmiežavańni ŭ ES užo dziejničali.
Paśla pačatku vajny Hrecyja značna pavialičyła ŭdzieł u pieravozkach rasijskaj nafty i atrymlivała prybytak ad prodažu starych tankieraŭ Rasii, jakoj daviałosia terminova farmiravać dadatkovy fłot sa znošanych sudnaŭ. Pavodle acenak ekśpiertaŭ, dola hrečaskich tankieraŭ u eksparcie rasijskaj nafty da 2023 hoda vyrasła z traciny da pałovy. Malta taksama fihuravała ŭ padobnych ździełkach.
Novy sankcyjny pakiet ES praduhledžvaje i inšyja abmiežavańni: suprać kampanij u Kitai i šerahu inšych krain, jakija pastaŭlajuć Rasii kamplektujučyja dla vajskovaj pramysłovaści, suprać kryptavalutnych apierataraŭ i niekalkich bankaŭ u Centralnaj Azii i Łaosie, jakich padazrajuć u abychodzie sankcyj. Asobna prapanujecca ŭpieršyniu vykarystać miechanizm suprać abychodu sankcyj i zabaranić ekspart abstalavańnia ŭ Kyrhyzstan, adnak Hiermanija aścierahajecca niehatyŭnych nastupstvaŭ dla dvuchbakovych adnosin i prapanuje zamiest hetaha ŭvieści sistemu kvotaŭ.
Dla ŭchvaleńnia sankcyj nieabchodnaja zhoda ŭsich krain ES, tamu kančatkovyja paramietry pakieta jašče mohuć źmianicca. U Brusieli spadziajucca zaviaršyć uzhadnieńnie da kanca lutaha. Pavodle zajaŭ kiraŭnictva ES, 20‑ty pakiet sankcyj płanujecca zaćvierdzić da 24 lutaha 2026 hoda.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja50
Kamientary