Jak adreahavali ŭ śviecie na apieracyju ZŠA i Izraila suprać Irana

Urad Vialikabrytanii zajaviŭ, što kraina nie ŭdzielničała ŭ apieracyi Izraila i ZŠA i nie chacieła b dalejšaj eskałacyi i pašyreńnia hetaha rehijanalnaha kanfliktu. Brytanskija ŭłady taksama padkreślili, što niadaŭna ŭmacavali svaje mahčymaści pa abaronie na Blizkim Uschodzie — vyklučna z metaj abarony svaich hramadzian, jakija znachodziacca ŭ rehijonie.

«Iranu nikoli nielha dazvalać raspracoŭvać jadziernuju zbroju, i mienavita tamu my pastajanna padtrymlivajem namahańni pa dasiahnieńni rašeńnia šlacham pieramoŭ», — havorycca ŭ zajavie ŭrada.

Va ŭradzie Hiermanii zajavili, što Bierlin byŭ zahadzia prainfarmavany Izrailem ab padrychtoŭcy ŭdaraŭ pa Iranie. Jak paviedamiŭ pradstaŭnik urada krainy, kancler Frydrych Mierc uvažliva sočyć za raźvićciom padziej i padtrymlivaje suviaź ź jeŭrapiejskimi partniorami. Na nastupnym tydni ŭ Vašynhtonie pavinna adbycca sustreča Mierca z Donaldam Trampam.

Rasija vystupiła z asudžeńniem «zahadzia spłanavanaha i niespravakavanaha aktu ŭzbrojenaj ahresii suprać suvierennaj i niezaležnaj dziaržavy — člena AAN».

U MZS RF apieracyju ZŠA i Izraila nazvali «biezrazvažnym krokam» i «niebiaśpiečnaj avanturaj», jakaja parušaje normy mižnarodnaha prava. U viedamstvie ličać, što ZŠA i Izrail damahajucca «razbureńnia kanstytucyjnaha ładu i źniščeńnia kiraŭnictva niepažadanaj im dziaržavy, jakaja admoviłasia padparadkoŭvacca siłavomu dyktatu i hiehiemanizmu».

Prezident Francyi Emanuel Makron zaklikaŭ da sklikańnia nadzvyčajnaha pasiedžańnia Savieta Biaśpieki AAN. Pa słovach Makrona, Tehieran pavinien zrazumieć, što ŭ jaho nie zastajecca inšaha vyjścia, akramia jak pačać «sumlennyja pieramovy» i admovicca ad svaich prahram pa stvareńni jadziernaj zbroi i mižkantynientalnych balistyčnych rakiet.

Kiraŭnik dypłamatyi Jeŭrapiejskaha sajuza Kaja Kałas zajaviła, što ŭ jaje adbyłasia razmova ź izrailskim kaleham Hideonam Saaram i ź inšymi aficyjnymi pradstaŭnikami krain rehijonu. Pa jaje słovach, ES razam z arabskimi partniorami vyvučajuć mahčymaści vyrašeńnia kanfliktu z dapamohaj dypłamatyi.

U ofisie premjer-ministra Italii Džordžy Miełoni zajavili, što salidarnyja z hramadzianskim nasielnictvam Irana. Italija patrabuje pavahi hramadzianskich i palityčnych pravoŭ irancaŭ.

Urad Šviejcaryi zajaviŭ, što «hłyboka zaniepakojeny» paviedamleńniami ab udarach. Ułady krainy zaklikali baki, uciahnutyja ŭ kanflikt, da «poŭnaha vykanańnia mižnarodnaha prava» i «maksimalnaj strymanaści». Taksama ŭ Ciurychu źviarnuli asablivuju ŭvahu na nieabchodnaść abarony hramadzianskaha nasielnictva.

Premjer-ministr Aŭstralii Entani Ałbaniezie zajaviŭ, što jaho kraina salidarnaja z «advažnym narodam Irana ŭ jaho baraćbie suprać pryhniotu». Pry hetym jon padtrymaŭ namahańni ZŠA pa niedapuščeńni źjaŭleńnia ŭ Irana jadziernaj zbroi.

• 1
• 0
• 1
• 0
• 0
• 0
• 0
• 0