Vyzvalenaja 13 śniežnia palitźniavolenaja nie viedała, što ciažarnaja: pra dzicia jana daviedałasia na piatym miesiacy
Karyna praviała ŭ źniavoleńni 1 hod i 2 miesiacy. 13 śniežnia jaje razam z hrupaj palitviaźniaŭ vyvieźli ź Biełarusi — spačatku va Ukrainu, a zatym u Polšču, paśla čaho dziaŭčyna pierajechała ŭ Hiermaniju. Užo paśla vyzvaleńnia vyśvietliłasia, što žančyna była ciažarnaj. Zaraz jana na piatym miesiacy i čakaje syna, piša kanał «Rozovyje Kosynki».
Karyna raspaviadaje, što padčas źniavoleńnia ŭ jaje amal hod nie było mienstruacyi. Jana źviazvała heta sa stresam i prablemami sa zdaroŭjem, jakija pačalisia paśla ŭtrymańnia na Akreścina.
«Na IČU Akreścina ja mocna pieraachaładziłasia — lažała na padłozie ŭ adnoj majcy i tonkich štanach. Heta byŭ kaniec vieraśnia, aciapleńnia jašče nie było. Paźniej, kali mianie vazili ź SIZA da ŭrača ŭ horadzie, mnie pastavili adnieksit — zapaleńnie. Tamu praktyčna hod nie było miesiačnych, i ja dumała, što heta z-za pieraachaładžeńnia i stresu».
Vosieńniu 2025 hoda ŭ dziaŭčyny było spatkańnie z mužam. Praź miesiac paśla hetaha Karyna źviarnułasia da hiniekołaha ŭ SIZA. Jaje niepakoili mocnyja boli ŭ hrudziach i paciahvańnie ŭnizie žyvata.
«Ja skazała, što hrudzi balać tak, što da ich niemahčyma dakranucca, i što ciahnie niz žyvata, nibyta voś-voś pačnucca miesiačnyja, ale jany nie prychodziać. Heta była maja druhaja ciažarnaść, i ja razumieła, što heta mohuć być jaje prykmiety. Ja vielmi prasiła zrabić test».
Test joj nie dali, ale adpravili na UHD.
«Doktar doŭha hladzieła i skazała, što pa falikule vidać: miesiačnyja pačnucca litaralna praz paru dzion.
Jana skazała, što ja na sto adsotkaŭ nie ciažarnaja i ŭsio heta z-za stresu».
Karyna ŭspaminaje, što tady zasmuciłasia — joj było składana pryniać, što intuicyja jaje padviała.
«Paśla spatkańnia mnie pryśniŭsia son, što ja łaŭlu rybu. Ja padumała, što heta znak ciažarnaści, ale vyrašyła, što prosta nakruciła siabie».
Praz tydzień jana znoŭ pryjšła da ŭrača: miesiačnyja tak i nie pačalisia, bol u hrudziach nie prachodziŭ. Jana znoŭ paprasiła test.
«Mnie skazali, što hrudzi balać z-za vitaminaŭ, jakija ja prymała, a zatrymka — z-za stresu. Pryznačyli preparat dla narmalizacyi cykła i skazali paprasić rodnych dasłać jaho ŭ miedbanderoli. Mianie zapeŭnili, što na UHD ciažarnaść dakładna ŭžo było b vidać».
Paśla hetaha Karyna pierastała nastojvać. Pra ciažarnaść jana daviedałasia ŭžo paśla vyzvaleńnia — na piatym miesiacy.
«U mianie pačaŭ niby napuchać žyvot. Spačatku ja dumała, što prosta papraviłasia mienavita ŭ žyvacie. Jašče adčuvała pulsacyju — navat žartavała mužu, što ŭ mianie niby kiški varušacca. Ja huhliła, i tam pisali, što heta moža być pulsacyja brušnoj aorty i treba iści da doktara».
Mienstruacyi ŭsio jašče nie było, i Karyna vyrašyła kupić hamieapatyčnyja kropli dla adnaŭleńnia cykła. U instrukcyi było paznačana, što pry zatrymcy pažadana zrabić test na ciažarnaść.
«Ja padumała: nu mała li, raptam ja zaciažarała ŭžo paśla taho, jak pryjechała da muža ŭ Hiermaniju».
Test pakazaŭ dźvie pałoski. Karyna była ŭpeŭnienaja, što termin zusim maleńki — dva-try tydni. Jana zapisałasia da hiniekołaha.
«Urač skazała, što pry takim terminie budzie vahinalnaje UHD. Ale kali pačała hladzieć, raptam skazała: «Nie, termin vialiki. Užo druhi trymiestr».
Ja tady nie adčuła radaści. Ja vielmi spužałasia. Tamu što za hety čas było šmat nahruzak: na invientarnych rabotach ja ciahała kamiani, nasiła ciažkija sumki. U pieršym trymiestry chvareła na hryp i branchit, prymała leki, jakija ciažarnym nielha. Plus pastajanny stres i pierajezdy — Biełaruś, Ukraina, Polšča, Hiermanija — usio za karotki čas».
Padčas ahladu doktar doŭha maŭčała.
«Hetyja chviliny byli vielmi strašnymi. A potym jana skazała: usio dobra. Pakazała sercajka i dała pasłuchać, jak jano bjecca. Ja niekalki razoŭ pierapytała, ci dakładna ŭsio ŭ paradku, i jana mianie zapeŭniła, što tak».
Karyna kaža, što sama ciažarnaść stała dla jaje radasnaj navinoj — jana chacieła druhoje dzicia.
«Šokam byŭ mienavita termin. I jašče kryŭda — što hetaha nie ŭbačyli na UHD abo, mahčyma, nie zachacieli ŭbačyć».
Zaraz jana kaža, što zrabiła dla siabie važnuju vysnovu:
«Ja dakładna zrazumieła, što treba daviarać svajoj intuicyi. Navat śpiecyjalist moža pamylicca. Treba prysłuchoŭvacca da svajho arhanizma i znakaŭ — a ich było vielmi šmat».
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki25
Kamientary