U prajekcie «Ŭ» zadziejničany vieteran FSB

Siarhiej Badziuk — čałaviek ź bijahrafijaj: nieadnarazovy čempijon Eŭropy pa paŭerliftynhu, były supracoŭnik Hałoŭnaha ŭpraŭleńnia vyviedki Rasiei i veteran FSB, jaki da ŭsiaho pracavaŭ na kiroŭnych pasadach na miasakambinatach, u bankach, naftavych kampanijach, a ciapier aktyŭna zdymajecca ŭ rasiejskim kino. Badziuk syhraje hałoŭnuju rolu ŭ klipie biełaruskaha prajektu na pieśniu «Nia kožny».

Prajekt «U nieskładovaje» byŭ stvorany byłym hitarystam hurta «J:mors» Ramanam Arłovym z metaj prasunuć biełaruskamoŭnuju muzyku ŭ Rasieju. U im zadziejničanyja viadučyja ajčynnyja muzykanty — lidery hurtoŭ «Pałac», Pomidor/off, «Stoks», «Charli», «Dziecidziaciej». Pieršy kancert u Maskvie hetaja zornaja kamanda daje 5 červienia ŭ klubie «Miecco-fortie», što la stancyi metro «VDNCH», pry padtrymcy hramadzkaj kampanii «Budźma biełarusami». Udzieł u kancercie taksama biare hurt «Pałac». Dzieja budzie zvacca «Sini pašpart» (uładalniki biełaruskich pašpartoŭ atrymajuć peŭnuju źnižku na ŭvachod). Miarkujecca, što takija kancerty stanuć peryjadyčnymi. Siarod tych, chto moža vystupić u Maskvie ŭ bližejšy čas u miežach hetaj akcyi — hurty «Krama» i «Dziecidziaciej».

Na nastupny dzień u Maskvie pačniecca praca nad klipam na pieśniu «Nia kožny» prajektu «U nieskładovaje». Zdymać budzie režyser Vital Čyžoŭ, były hieneralny pradusar biełaruskaha Pieršaha muzyčnaha telekanału, jaki źjechaŭ pracavać na telekanał NTV. «Videa pra biełaruskija realii i na biełaruskaj movie, źniataja siarod krajavidaŭ Maskvy pavinna źviarnuć na siabie ŭvahu», — upeŭniena zajaviŭ «Tuzinu Hitoŭ» pradusar prajektu Raman Arłoŭ. Na rolu hałoŭnaha hieroja klipa zaprošany rasiejec ukrainskaha pachodžańnia Siarhiej Badziuk — čałaviek z fantastyčnaj bijahrafijaj: nieadnarazovy čempijon Eŭropy pa paŭerliftynhu, były supracoŭnik Hałoŭnaha ŭpraŭleńnia vyviedki Rasiei i veteran FSB, jaki da ŭsiaho pracavaŭ na kiroŭnych pasadach na miasakambinacie, u bankach, naftavych kampanijach. Z 2004 hodu Badziuk zaniaŭsia aktorskaj karjeraj (hraŭ u filmach «Purpurnyje obłaka», «Mustanh», «Antikiller-3» dy inšych). Pradusary biełaruskaha prajektu miarkujuć dałučyć u budučyni da supracy z «U nieskładovym» jašče šerah rasiejskich zorak.

Pieśnia «Nia kožny» prajektu «U nieskładovaje» biare ŭdzieł u hit-paradzie na «Tuzinie Hitoŭ».

• 0
• 0
• 0
• 0
• 0
• 0
• 0
• 0