Ofis Cichanoŭskaj: Pavodziny Charysavaj nielha apraŭdać ciskam

U chodzie pravierki ŭ Ofisie vyvučyli apublikavanyja aŭdyjazapisy, materyjały pierapiski, historyju braŭzieraŭ, prahramy i fajły, a taksama praviali analiz pracoŭnych pryład i akaŭntaŭ, jakimi karystałasia Alina Charysava. 

Padkreślivajecca, što kamunikacyja Charysavaj, jakaja maje vałanciorskaje pahadnieńnie z Ofisam Śviatłany Cichanoŭskaj, ź nieviadomymi asobami, jakija pradstaŭlalisia supracoŭnikami ŭkrainskich śpiecyjalnych słužbaŭ, «hruba parušaje ŭnutranyja pratakoły biaśpieki, jakija dziejničajuć u Ofisie».

Tym nie mienš, padčas praviedzienaj pravierki

«nie było vyjaŭlena paćviardžeńniaŭ pieradačy jakoj-niebudź adčuvalnaj, słužbovaj abo niepubličnaj infarmacyi, zdolnaj nanieści škodu dziejnaści Ofisa, biaśpiecy jaho supracoŭnikaŭ i supracoŭnic, partnioraŭ, a taksama biełarusaŭ i biełarusak, jakija źviartalisia pa dapamohu. Analiz najaŭnych materyjałaŭ taksama nie paćvierdziŭ faktaŭ pieradačy ŭnutranych dakumientaŭ abo inšych zakrytych źviestak. 

Pravierka pracoŭnych i asabistych pryład, akaŭntaŭ i dastupnych materyjałaŭ nie vyjaviła prykmiet atrymańnia ŭznaharodžańnia za mierkavanaje supracoŭnictva z trecimi asobami, uklučajučy vykarystańnie kryptavalutnych kašalkoŭ abo atrymańnie inšych płaciažoŭ, a taksama pošukavych zapytaŭ, źviazanych z atrymańniem hrašovych srodkaŭ jakim-niebudź čynam, ci śladoŭ vykarystańnia prahram dla pieravodu hrošaj z dapamohaj kryptavalut». 

Što da aŭdyjazapisaŭ i skrynšotaŭ, raspaŭsiudžanyja ŭ ramkach prapahandysckaj kampanii, to śćviardžajecca, što

«istotnaja častka apublikavanych aŭdyjamateryjałaŭ utrymlivaje prykmiety hienieracyi z vykarystańniem technałohij štučnaha intelektu, što stavić pad sumnieŭ ich sapraŭdnaść». 

Supracoŭniki techničnaj słužby praanalizavali pracoŭny akaŭnt Aliny Charysavaj i nie vyjavili jakoj-niebudź padazronaj aktyŭnaści. 

Niahledziačy na śćviardžeńni Charysavaj, što jana na praciahu doŭhaha času była abjektam pieraśledu i sprob uździejańnia z boku łukašenkaŭskich śpiecsłužbaŭ, padkreślivajecca, što

«nazvanyja abstaviny nie mohuć razhladacca jak padstava dla adstupleńnia ad ustanoŭlenych praviłaŭ biaśpieki». 

Na hety momant udzieł Aliny Charysavaj u luboj dziejnaści Ofisa prypynieny, a pravierka incydentu praciahvajecca.

U Ofisie abiacajuć, što

«buduć pierahledžanyja dziejnyja pratakoły biaśpieki i praviedzienyja dadatkovyja treninhi dla supracoŭnikaŭ i supracoŭnic, a taksama vałancioraŭ i asob, jakija ŭzajemadziejničajuć z Ofisam u ramkach ekśpiertnaj i kansultacyjnaj dziejnaści». 

• 26
• 0
• 5
• 10
• 0
• 0
• 0
• 0