Biełaruska šukała pieśniu na biełaruskaj movie dla pieršaha tanca na viasielli. Pieramoh chit, jakomu 40 hadoŭ
A jakija varyjanty naohuł prapanujuć?
«Biełaruś! Padkažycie, kali łaska, pieśniu na biełaruskaj movie dla pieršaha tanca maładych, z ulikam cenzury».
Takoje pytańnie zadała biełaruska ŭ tredzie. U kamientaryjach da jaje dopisu chutka razharnułasia sapraŭdnaja muzyčnaja rada: dziasiatki ludziej pačali prapanoŭvać svaje varyjanty — ad kłasiki «Pieśniaroŭ» da sučasnych indzi-hurtoŭ.
Kali mierkavać pa kolkaści łajkaŭ i paŭtornych zhadvańniaŭ, u biełarusaŭ vyjavilisia vidavočnyja favaryty.
Pieršaje miesca: «Začarovanaja» ad «Pieśniaroŭ»
Favarytam abmierkavańnia stała pieśnia «Začarovanaja» hurta «Pieśniary» (aŭtar słoŭ — piśmieńnik Hienadź Buraŭkin). Jaje prapanavali niekalki čałaviek, a pa kolkaści łajkaŭ jana ŭpeŭniena abyšła ŭsich kankurentaŭ.
Pieśnia «Začaravanaja» ŭžo niekalki pakaleńniaŭ asacyjujecca z kachańniem. U joj niama dramatyčnych pryznańniaŭ, tolki ščyraje zachapleńnie čałaviekam pobač.
Razam ź joj niekalki čałaviek zhadali jašče adnu kampazicyju «Pieśniaroŭ» — «Stasia».
Druhoje miesca: «Zorka Vieniera» i «Biełaja lebiedź»
Druhoje miesca padzialili adrazu dźvie ramantyčnyja kampazicyi.
Heta i «Zorka Vieniera» na słovy Maksima Bahdanoviča. Jaje prapanoŭvali niekalki razoŭ, pryčym jak u kłasičnych vykanańniach, tak i ŭ bolš sučasnych interpretacyjach.
Taksama aŭdytoryja lubić pieśniu «Biełaja lebiedź» hurta «Novaje Nieba». Heta ŭžo bolš sučasnaja liryka, ale z tym ža nastrojem piaščoty i śvietłaha sumu.
Treciaje miesca: Naviband i «Šali» ad Vajciuškieviča z Šarkunovaj
Bronzu padzialili pamiž saboj kampazicyi hurta Naviband i pieśnia «Šali».
U vypadku Naviband havorka najčaściej išła pra pieśni «Abdymi» i «Prabač». Asabliva «Abdymi» vyhladaje naturalnym kandydatam dla pieršaha tanca: nazva sama pa sabie ŭžo hučyć jak viasielnaje pažadańnie.
Pobač pa papularnaści akazałasia kampazicyja «Šali» ŭ vykanańni Źmiciera Vajciuškieviča i Hanny Šarkunovaj — pieśnia pra tonkuju raŭnavahu pamiž dvuma čałaviekami. Heta biełaruskamoŭny kavier na pieśniu Shallow, jakuju vykonvajuć Lady Gaga i Bredli Kupier.
Praŭda, va ŭsim hetym narodnym rejtynhu jość adzin važny niuans — biełaruskaja cenzura. Naviband, Źmicier Vajciuškievič i Hanna Šarkunova znachodziacca ŭ «čornych śpisach» u Biełarusi, tamu pieśni vykonvajucca ŭ publičnych prastorach tolki nieaficyjna.
Kali b nie hetaja akaličnaść, top piesień moh by vyhladać inakš.
Što jašče prapanoŭvajuć biełarusy
Akramia vidavočnych lidaraŭ, u kamientarach sabrałasia cełaja kalekcyja biełaruskich piesień pra kachańnie — vielmi roznych pa nastroi, kožnaja sa svajoj atmaśfieraj.
Prychilniki sučasnaj biełaruskaj muzyki rajać źviarnuć uvahu na Uzari i jaho pieśniu «Mora». Heta lohkaja kampazicyja z amal kiniematahrafičnym nastrojem.
Niekalki čałaviek uzhadali Akute. U pryvatnaści, pieśniu «Zorka» — adnu z samych liryčnych u repiertuary hurta.
Siarod fołkavych i akustyčnych prapanoŭ vyłučyŭsia indzi-fołk duet Dobranoc ź pieśniaj «Kompas». U joj jość toje, što chiba mnohija šukajuć u šlubie — adčuvańnie čałavieka, jaki dapamahaje nie zhubicca ŭ žyćci.
Dla amataraŭ paezii i biełaruskaj kłasiki prapanoŭvali «Pa-nad biełym pucham višniaŭ» u vykanańni Aleny Saŭlenajcie.
Niekalki ŭdzielnikaŭ dyskusii zhadali kampazicyi Źmitra Vajciuškieviča. Akramia ŭžo pryviedzienych «Šalaŭ», hučała prapanova vybrać «Miesiac žoŭtaja łodka».
Siarod novych imionaŭ prahučali prapanovy pasłuchać pieśni «Nikoli» i «Padkažy mnie» ad Nevika,
a taksama «Napamin» prajekta Ruch.
Asobnuju nišu ŭ hetym śpisie zaniali pieśni dla tych, chto šukaje niešta jašče mienš vidavočnaje. Tak, adzin z udzielnikaŭ dyskusii prapanavaŭ kampazicyju «Dzień biez čar tvaich» u vykanańni Aleha Džahiera — biełaruskamoŭnuju viersiju viadomaha chita Day Without Your Love.
Jašče adna niečakanaja prapanova — «Nie złujsia» ad KaS. Heta ŭžo značna bolš sučasnaja historyja: pieśnia chutčej pra štodzionnuju blizkaść, žarty i ŭmieńnie być razam, niahledziačy na drobnyja svarki. Dla niefarmalnaha viasiella takaja kampazicyja mahła b stać adnym z samych aryhinalnych vybaraŭ.
I vartyja jašče valsy «Padajuć zory» i «Tolki z taboju», jakija byli mocna papularnyja ŭ narodzie. Voś jany ŭ vykanańni Jakava Navumienki i Natalli Ramanskaj…
…i Jakava Navumienki i Śviatłany Susiedčyk:
A niekatoryja ŭdzielniki dyskusii naohuł prapanavali niestandartny šlach: zamović pieśniu śpiecyjalna dla svajho viasiella. U kamientarach navat adhuknulisia muzyki, jakija skazali, što z zadavalnieńniem napisali b taki trek.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1515
Kamientary