Statkievič zaklikaŭ Łukašenku nie źbivać ukrainskich dronaŭ, kali jany buduć lacieć na rasijskija retranślatary

Statkievič piša, što jaho staŭleńnie da ŭltymatumu Zialenskaha z patrabavańniem prybrać rasijskija retranślatary, vidavočnaje — «kamu ŭ Biełarusi spadabajecca, kali našu krainu buduć abstrelvać dronami dy rakietami».

Ale sprava nie ŭ staŭleńni, a ŭ tym, kab nie dapuścić eskałacyi kanfliktu, kaža jon, bo Ukraina, miarkuje Statkievič, naniasie pavietrany ŭdar pa tych retranślatarach, kali ich nie prybrać. 

Jon kaža, što retranślatary dla naviadzieńnia dronaŭ — važnaja častka rasijskaj infrastruktury pavietranych udaraŭ, bo vykarystoŭvać dla naviadzieńnia dronaŭ spadarožnikavuju sistemu Iłana Maska Starlink Rasija zaraz nie moža.

«Raźmiaščeńnie rasijskich retranślataraŭ u siabie — pramy i vidavočny saŭdzieł u rasijskich pavietranych udarach. Vielmi imavierna, što hetyja retranślatary skarystoŭvalisia dla ŭdaraŭ pa Kijevu i pa Kijeva-Piačerskaj łaŭry. Adlehłaści ad našaj miažy da Kijeva, dy jašče pry vykarystańni vyšak, pra jakija zhadvaje Zialenski, heta dazvalajuć. Tamu Ukrainie žyćciova nieabchodna niejtralizacyja takich retranślataraŭ. Pry tym, Kijeŭ maje mahčymaść spasyłacca na mižnarodnaje prava i realizacyju svajho zakonnaha prava na samaabaronu. Dy j uzhadać rolu Biełarusi ŭ rasijskim «blickryhu» ŭ 2022 hodzie», — piša jon.

Jon dadaje, što naŭrad ci Maskva dazvolić «tutejšamu «suvierenu» prybrać jaje retranślatary ci, chacia b, pieranieści ich dalej ad ukrainskaj miažy. «Tym bolej, što jana zacikaŭlena ŭciahnuć Biełaruś u vajnu na svaim baku, — miarkuje Statkievič.

Tamu, chutčej za ŭsio, udar pa retranślatarach budzie naniesieny, dadaje jon.

Ale hałoŭnaje zaraz, kab ukrainski ŭdar abmiežavaŭsia tolki hetymi retranślatarami dy nie pryvioŭ da eskałacyi kanfliktu i ŭciahvańnia našaj krainy ŭ vajnu, ličyć Statkievič. 

«Biełaruskamu režymu pryjdziecca niejak ža adkazvać na ŭdar, kali toj zdarycca. Budzie składana abmiežavacca tolki dypłamatyčnymi demaršami, bo taki adkaz vykliča nehatyŭnuju reakcyju rasčaravanaha Kramla i jaho prapahandy. Ale hetuju reakcyju možna pieražyć. Kali ž adkazać udaram na ŭdar, to miaža pamiž Ukrainaj i Biełaruśsiu, bolšaść jakoj prachodzić pa paleskich bałotach, abciažarvaje naziemnyja dziejańni vojskaŭ.

U vyniku, kanflikt ad pačatku ci praź niekatory čas niepaźbiežna piarojdzie ŭ abmien rakietnymi i dronavymi ŭdarami. Niekalki dziasiatkaŭ biełaruskich «Pałanezaŭ» i rasijskich «Iskanderaŭ» skončacca chutka. Navat, kali Maskva i padzielicca jašče niekalkimi sotniami «Šachiedaŭ»(ci «Hieraniaŭ»), usio roŭna, hety abmien udarami vielmi chutka piarojdzie ŭ stadyju adnabakovych udaraŭ Ukrainy, bo jaje pieravaha, navat pierad RF, u masavaj vytvorčaści i dakładnym prymianieńni dronaŭ siaredniaj i vialikaj dalnaści robicca vidavočnaj.

A pra Biełaruś i kazać niama pra što. Ja navat nie maju na ŭvazie ryzyku dla režyma va ŭzbrajeńni vialikaj kolkaści darosłych biełarusaŭ u vypadku kanfliktu «na ziamli». Ale, pry masavych pavietranych udarach Ukrainy, źjaviacca realnyja pahrozy nie tolki dla biełaruskaj pramysłovaści dy infrastruktury, ale i dla ŭsich hramadzian našaj krainy. Takich pahroz lepiej paźbiehnuć», — piša Statkievič. 

Što ž rabić biełaruskim uładam, kab nie dapuścić niehatyŭnaha raźvićcia padziej?

Jon ličyć, što kali prosta ciahnuć čas, jość imaviernaść narvacca na raptoŭny ŭdar, što pavialičvaje ryzyku čałaviečych achviar.

«Dumaju, što, u lubym vypadku, treba naładzić sistemu apaviaščeńnia hramadzian ab pavietranaj pahrozie ŭ pałasie ad ukrainskaj miažy da hetych retranślataraŭ, abaviazać miascovyja ŭłady i viaskovaje nasielnictva ŭ hetaj pałasie abstalavać bambaschoviščy, choć u padvałach šmatkvaternych damoŭ ci navat va ŭłasnych sklepach», — piša jon.

Akramia taho, jon ličyć, što nie treba imknucca źbivać ukrainskija drony i rakiety srodkami biełaruskaj supraćpavietranaj abarony.

«Zienitnych rakiet mała i jany darahija, a hałoŭnaje — navošta źbivać toje, što laciać da rasijskich retranślataraŭ? Tolki, kab abłomki tych ukrainskich dronaŭ ci biełaruskich zienitnych rakiet padali na hałovy mirnaha nasielnictva?

I ŭžyvać biełaruskija srodki radyjoelektronnaj baraćby taksama nie varta — nieviadoma kudy palacić źbitaja z maršrutu rakieta ci dron.

Karaciej, kali Pucin admovicca prybrać svaje retranślatary, to ich prybiare Zialenski. Tutejšyja ŭłady mohuć navat pieradać apošniamu — prybiraj, zaminać nie budziem.

Tolki dalej bić nie treba. Jak u tym aniekdocie: «Dy čaho ŭžo tam — lapi!»

Dla biełarusaŭ hałoŭnaje — zachavać svaich suhramadzian i nie dać jašče bolš uciahnuć našu krainu ŭ čužuju vajnu», — piša Statkievič. 

• 27
• 0
• 1
• 1
• 0
• 2
• 0
• 0