Ad Prypiaci da Kaŭkaza. Jak siamja z-pad Minska padarožničaje na kempiery
U Biełarusi tysiačy miescaŭ, jakija varta ŭbačyć, — ad staražytnych zamkaŭ da malaŭničych bierahoŭ rek. Siamja Dajniekaŭ ź Leskaŭki pad Minskam užo šeść hadoŭ padarožničaje z kempieram na pryčepie, i kožnaja pajezdka dla ich — pryhoda, jakaja daruje pačućcio svabody, piša pristalica.by.
Ad pieršaha pryčepa da aŭtanomnaha kempiera: što chavajecca ŭnutry
Šeść hadoŭ tamu kiraŭnik siamji Dźmitryj Dajnieka kupiŭ pieršy kempier. Jon kaštavaŭ piać tysiač dalaraŭ — stareńki pryčep patrabavaŭ układańniaŭ. Paśla ramontu na im siamja vypraviłasia ŭ pieršaje vialikaje padarožža, jakoje padaryła im pačućcio svabody, jakuju jany nie zachacieli hublać.
Druhi kempier byŭ šyrejšy i daŭžejšy, ale ŭ biełaruskich lasach i na vuzkich prasiołkavych darohach na takim nie raźviarnucca — manieŭranaść akazałasia važniejšaj.
U vyniku siamja vyrašyła viarnucca da kampaktnaha pamieru i zrabić staŭku na kamfort. Tak jany kupili treci, ciapierašni aŭtadom.
Pa słovach haspadaroŭ, jon całkam aŭtanomny, uciepleny i raźličany na marazy da minus 40°C. Unutry — ciopłyja padłohi z padahrevam, aciapleńnie, śviatło, duš, tualet, haračaja vada. Jość navat paŭnavartasnaja kuchnia z pavierchniaj dla hatavańnia, rakavinaj i chaładzilnikam, dzie padčas pajezdak ranicaj Viktoryja hatuje śniadanki dla siamji. Abiedziennaja zona taksama praduhledžanaja, uviečary jana pieratvarajecca ŭ spalnaje miesca. Darečy, spalnych miescaŭ u kempiery čatyry, tak što źmiaščajecca ŭsia siamja. I navat televizar jość.
«Usio heta pracuje ad soniečnych panelaŭ na dachu — ich na kožnym kempiery my stavili sami. Jašče staić inviertar na 220 volt: možna zaradzić telefon, padklučać noŭtbuk, karystacca fienam. Tut usio pad rukoj», — raskazvaje Dźmitryj.
U śpiecyjalnym adsieku kempiera zachoŭvajecca ŭsio, što moža spatrebicca ŭ pajezdcy: pałatki, pachodnaja łaźnia, zapas vady i hazavyja bałony dla pryhatavańnia ježy. Časta biaruć z saboj i rovary — kab daśledavać navakolle.
Lubimyja maršruty: ad Prypiaci da Kaŭkaza
Samyja ciopłyja ŭspaminy siamji Dajniekaŭ źviazanyja z padarožžami pa Biełarusi. Ich lubimaje miesca adpačynku — raka Prypiać. Tudy jany jeździać čaściej za ŭsio.
«Maje dziaŭčatki, Vika i Ksiuša, jak i ja, abažajuć rybačyć. Zaŭsiody biarom z saboj vudy i mator. Na Prypiaci mnie pakaryŭsia som vahoj 47 kiłahramaŭ, — uspaminaje jon. — Ciahnuŭ jaho da bieraha ŭ adzinočku amal cełuju hadzinu. Paśla fotasiesii, viadoma, adpuścili. Sami my rybu nie jamo, ale časta sušym, kab pačastavać siabroŭ», — śmiajecca jon.
Dla siamji Dajniekaŭ 300 kiłamietraŭ da Prypiaci — drobiaź. Samaje doŭhaje ich padarožža doŭžyłasia amal try tydni. Tady na kempiery jany prajechali bolš za 7 tysiač kiłamietraŭ — praz Abchaziju, Sočy, Piacihorsk, Vałhahrad, Čačniu i Dahiestan.
Za hety čas jany nasałodzilisia vieličču hor, krajavidami, ad jakich pierachaplaje dychańnie, i paznajomilisia z na dziva haścinnymi ludźmi. Viktoryja kaža, što takija pajezdki zapaminajucca na ŭsio žyćcio.
Čamu Biełaruś — raj dla kempieraŭ
Muž i žonka adznačajuć, što ŭ Biełarusi možna stać z pryčepam dzie zaŭhodna. U Jeŭropie ž za stajanku časta prosiać hrošy, časam supastaŭnyja z arendaj numara ŭ hateli. U hetym jany bačać hałoŭnuju pieravahu padarožžaŭ pa rodnaj krainie.
Za šeść hadoŭ siamja zajmieła mnostva siabroŭ u roznych kutkach Biełarusi i navat za jaje miežami. Usiudy, kudy jany pryjazdžajuć, ich sustrakajuć ciopła.
U płanach u siamji — kupić «Pašpart vandroŭnika» i abjeździć usie kutki krainy, dzie jany jašče nie byli.
Samy paśpiachovy błohier-sadavod Bresta pierarabiŭ stary furhon u dačny domik VIDEA
«A sens arandavać kvateru?» Historyja biełaruskaj pary, jakaja žyvie ŭ aŭtadomie i padarožničaje pa Jeŭropie
«Pamiž adpačynkam u Turcyi i pachodam na katamaranie pa Jasieldzie vybiraju druhoje». Brescki pradprymalnik raskazaŭ pra pieravahi adpačynku na radzimie
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1515
Kamientary