U Łatvii rezka pavialičyŭsia zbožžavy tranzit ź Biełarusi. Za dzieviać miesiacaŭ u 913 razoŭ bolš, čym za ŭvieś minuły hod

Z 1 da 24 vieraśnia praz Łatviju tranzitam pieravieźli 253 623 tony zbožža z Rasii — amal udvaja bolš, čym za ŭvieś vierasień minułaha hoda. Ź Biełarusi za hety ž pieryjad prajšło tranzitam 40 101 tona zbožža. Pry hetym u vieraśni 2025 hoda biełaruskija zbožžavyja praz Łatviju tranzitam uvohule nie pieravozilisia.

Usiaho z pačatku hoda da 24 vieraśnia praz Łatviju tranzitam pieravieźli 593 663 tony rasiejskaha zbožža. Heta na 8,9% mienš, čym za ŭvieś 2025 hod. Biełaruski tranzit za hety pieryjad skłaŭ 116 847 ton — u 913 razoŭ bolš, čym letaś.

Značny rost naziraŭsia i ŭ žniŭni. Tady praz Łatviju tranzitam pieravieźli 158 983 tony zbožža z Rasii — na 55,9% bolš, čym u žniŭni 2025 hoda. Ź Biełarusi za miesiac prajšło 26 726 ton, tady jak hodam raniej biełaruskich zbožžavych tranzitam praz Łatviju nie było.

VID adznačaje, što zakanadaŭstva Jeŭrasajuza zabaraniaje ŭvozić u ES tavary, jakija pachodziać ź niekantralavanych Ukrainaj terytoryj. Havorka idzie pra Krym, a taksama častki Danieckaj, Chiersonskaj, Łuhanskaj i Zaparožskaj abłaściej, jakija Rasija aneksavała. Hetyja abmiežavańni raspaŭsiudžvajucca i na tranzit.

Kab pierakanacca ŭ pachodžańni zbožža, łatvijskija mytniki pravodziać vybaračnyja pravierki. U pradprymalnikaŭ mohuć zapatrabavać dakładnyja źviestki pra miesca vyroščvańnia pšanicy, jaje sort i paćviardžeńnie, što jana nie pachodzić ź niekantralavanych Ukrainaj terytoryj. Taksama praviarajucca maršrut pastaŭki da miažy ES, nakładnyja, damovy, transpartnyja dakumienty, rachunki za pieravozku i inšyja materyjały.

Pavodle VID, u vyniku pravierak mytnaja słužba nie atrymała dokazaŭ, jakija paćviardžali b padazreńni, što pravieranaja pšanica mahła pachodzić ź niekantralavanych Ukrainaj terytoryj.

U VID taksama padkreślivajuć, što za vykanańnie sankcyj adkazvaje nie tolki mytnia. Usie kampanii, jakija ŭdzielničajuć u tranzicie zbožža, pavinny samastojna praviarać hruzy pierad zaklučeńniem damoŭ na ich pieravozku, pierahruzku, zachoŭvańnie i dalejšaje transpartavańnie.

Za pieršyja vosiem miesiacaŭ 2026 hoda ŭ vyniku kantrolnych mierapryjemstvaŭ łatvijskaj mytni ŭ 842 vypadkach byli praduchilenyja parušeńni sankcyj. U 467 vypadkach kampanijam admovili va ŭžyvańni zajaŭlenaj mytnaj pracedury da hruzaŭ.

U VID paviedamlajuć, što najbolš časta parušeńni sankcyj źviazanyja ź niapravilnym paznačeńniem koda tavaru pavodle Kambinavanaj namienkłatury ES, padavańniem iłžyvych źviestak pra krainu pachodžańnia abo pryznačeńnia, padrobkaj dakumientaŭ i nievykanańniem umoŭ pierachodnaha pieryjadu, praduhledžanych sankcyjnymi praviłami.

• 2
• 0
• 0
• 1
• 0
• 0
• 0
• 0