Maskva zahaniaje ŭ stojła

Łukašenka vydaŭ sakret pališyniela: Biełaruś ratyfikavała Mytny kodeks.

Hetaje pryznańnie vyrvałasia ŭ impecie, kali jon davaŭ čarhovy adłup Miadźviedzievu. Toj ździekliva paraiŭ kalehu nie ŭlahać u spam, a ruchać napierad Mytny źviaz. Łukašenka adpłaciŭ toj samaj manietaj, nazvaŭšy repliku rasijskaha prezidenta bałbatnioj.

Voś u takim kanstruktyŭnym kantekście (sapraŭdny dyjałoh sajuźnikaŭ!) i prahučała, nie biez honaru navat: «Pavinien vam skazać, što my ni na jotu nie zrabili kroku nazad, ni na milimietr nie adstajom u Mytnym źviazie ni ad Rasii, ni ad Kazachstana. My na siońniašni dzień ratyfikavali ŭsie damovy i pahadnieńni, jakija datyčacca Mytnaha źviazu. Ale jany hetaha nie viedajuć. Harantyju vam daju, što nie viedajuć. U advarotnym vypadku nie było b hetaj bałbatni pa televizary.

Mytny kodeks my ratyfikavali. My siońnia ŭ toj ža sistemie kaardynat, što i jany».

Dziva što nie viedajuć! Ad 30 červienia, kali pajšła pahałoska pra patajemnaje rašeńnie deputataŭ, usie jany, jak i astatnija tutejšyja dziejačy, maŭčali by myła źjeŭšy. Kali b nie siońniašni palemičny pinh-ponh ź Miadźviedzievym, to kryłataja nacyja biełarusaŭ tak i čuchała b repu: dyk było toje ci nie było?

Kažu «kryłataja», bo siońnia ŭ kazionna-patetyčnaj pramovie na płoščy Pieramohi aficyjny kiraŭnik zajaviŭ, što «kožny z nas pačuvajecca svabodnym hramadzianinam svabodnaj krainy, i hetaje pačućcio litaralna akrylaje, natchniaje na ździajśnieńni i pieraŭtvareńni».

Fihieju z henych śpičrajteraŭ. «Litaralna» — heta značyć, što ŭsie nasielniki siniavokaj respubliki musiać vyhladać, jak chieruvimy. Tut ža havorycca akurat fihuralna.

Dy chalera ź joj, ź biezhustoŭnaj stylistykaj. Hałoŭnaje — u sutnaści:

za kaho trymajuć viarchi hety nibyta volny lud, kali navat nie ličać patrebnym elemientarna prainfarmavać ab pryniatym «narodnymi abrańnikami» rašeńni?

A jašče bolej istotnaje toje, što

na fonie takoj naviny ŭsia heta antymaskoŭskaja fronda łopajecca jak mylnaja burbałka. Kali ratyfikavali — značyć, Maskva marudna, ale niaŭchilna zahaniaje ŭ svajo mytnaje stojła.

Tamu i dazvalaje sabie Miadźviedzieŭ pahardu: brykajsia, brykajsia, maŭlaŭ, usio adno nikudy nie dzieniešsia!

• 0
• 0
• 0
• 0
• 0
• 0